పండగ సీజన్ కోసం అమెజాన్ భారీ నియామకాలు

ప్రముఖ ఈ-కామర్స్ సంస్థ అమెజాన్ ఇండియా, రాబోయే పండగ సీజన్‌ను దృష్టిలో ఉంచుకుని దేశవ్యాప్తంగా భారీగా తాత్కాలిక ఉద్యోగాలను సృష్టించింది. పెరిగిన డిమాండ్‌ను తట్టుకోవడానికి ఏకంగా 1.5 లక్షలకు పైగా సీజనల్ ఉద్యోగ అవకాశాలను కల్పించినట్లు సోమవారం ఒక ప్రకటనలో వెల్లడించింది. ఈ నిర్ణయం పండగ సమయంలో ఉపాధి కోసం ఎదురుచూస్తున్న వేలాది మందికి శుభవార్తగా నిలిచింది.దేశంలోని 400 నగరాల్లో ప్రత్యక్షంగా, పరోక్షంగా ఈ ఉద్యోగాలను భర్తీ చేయనున్నట్లు కంపెనీ తెలిపింది. హైదరాబాద్, బెంగళూరు, ముంబై, ఢిల్లీ, పూణె, లక్నో, కొచ్చి వంటి ప్రధాన నగరాలు ఈ జాబితాలో ఉన్నాయి. ఫుల్‌ఫిల్‌మెంట్ సెంటర్లు, సార్టింగ్ కేంద్రాలు, లాస్ట్-మైల్ డెలివరీ స్టేషన్లలో ఈ నియామకాలు చేపట్టనున్నారు. ఈ అవకాశాలలో వేలాది మంది మహిళలతో పాటు 2,000 మందికి పైగా దివ్యాంగులకు కూడా ప్రాధాన్యత ఇచ్చినట్లు అమెజాన్ పేర్కొంది. ఇప్పటికే చాలా మంది కొత్త సిబ్బంది విధుల్లో చేరినట్లు స్పష్టం చేసింది.ఈ విషయంపై అమెజాన్ ఆపరేషన్స్ వైస్ ప్రెసిడెంట్ అభినవ్ సింగ్ మాట్లాడుతూ, "పండగ సీజన్ ముగిసిన తర్వాత కూడా చాలా మంది మాతో తమ ప్రయాణాన్ని కొనసాగిస్తున్నారు. ప్రతి ఏటా ఎంతోమంది తిరిగి మాతో పనిచేయడానికి వస్తుండటం సంతోషంగా ఉంది. మా ఉద్యోగుల భద్రత, శ్రేయస్సుకు మేము అత్యంత ప్రాధాన్యత ఇస్తాం" అని వివరించారు.ఉద్యోగుల సంక్షేమం కోసం పలు చర్యలు తీసుకుంటున్నట్లు కంపెనీ తెలిపింది. డెలివరీ సిబ్బంది విశ్రాంతి కోసం దేశవ్యాప్తంగా 'ఆశ్రయ్' రెస్ట్ సెంటర్ల సంఖ్యను 100కి పెంచినట్లు పేర్కొంది. అలాగే, 80,000 మంది డెలివరీ అసోసియేట్లకు కళ్లు, దంతాలు, బీఎంఐ వంటి ఉచిత ఆరోగ్య పరీక్షలు అందిస్తున్నట్లు వెల్లడించింది. దీనితో పాటు, ఉద్యోగుల ఆర్థిక సౌలభ్యం కోసం ప్రతి నెల 20వ తేదీలోపు తమ జీతంలో 80 శాతం వరకు విత్‌డ్రా చేసుకునే 'ఎర్లీ యాక్సెస్ టు పే'  సదుపాయాన్ని కూడా కల్పిస్తున్నట్లు కంపెనీ తన ప్రకటనలో వివరించింది.