IPL 2026: పృథ్వీ షా సీఎస్‌కే జెర్సీలో..? వైరల్ వీడియోపై అభిమానుల ఊహాగానాలు

ముంబై యువ ఓపెనర్ పృథ్వీ షా ఇటీవల కాలంలో ప్రదర్శన కన్నా వివాదాల కారణంగా ఎక్కువగా వార్తల్లో నిలుస్తున్నాడు. ఫామ్ లేకపోవడం, ఫిట్‌నెస్ లోపాలు, వివిధ వివాదాల కారణంగా అతను ముంబై జట్టు నుంచి ఒక్కొంచెంగా నిష్క్రమించాల్సి వచ్చింది.ఐపీఎల్ 2025 వేలంలో కూడా అతనికి ఎవరు కనీస బిడ్ కూడా వేయకపోవడం, అతని కేరియర్‌పై ప్రశ్నార్థకాన్ని మిగిల్చింది.టీమిండియాకు అరంగేట్రం టెస్ట్‌లోనే సెంచరీ చేసి అందరి దృష్టిని ఆకర్షించిన షా, ఆశించిన స్థాయిలో స్థిరపడలేకపోయాడు. క్రమంగా ముంబై రంజీ జట్టులో స్థానం కోల్పోయాడు. విజయ్ హజారే, ముస్తాక్ అలీ టోర్నీల్లో కూడా కనీస గుర్తింపు తేవలేని ఆటతీరు అతనిపై మరింత ఒత్తిడిని తెచ్చింది.ఈ పరిస్థితుల్లో ముంబై నుంచి మహారాష్ట్ర తరఫున ఆడేందుకు షా బదిలీ అయ్యాడు. తన కొత్త ప్రయాణాన్ని బుచ్చిబాబు టోర్నీలో శుభారంభం చేస్తూ తొలి ఇన్నింగ్స్‌లోనే శతకం బాదడం విశేషం. దీంతో అభిమానులు “పృథ్వీ షా 2.0” అంటూ పిలవడం ప్రారంభించారు.ఈ టోర్నీ తమిళనాడు క్రికెట్ అసోసియేషన్ నిర్వహించగా, చెన్నై వేదికగా ఛత్తీస్‌ఘడ్‌తో జరిగిన మ్యాచ్‌లో షా ఈ సెంచరీ చేశాడు. ఈ ప్రదర్శన తర్వాత అభిమానులలాగే సీఎస్‌కే ఫ్రాంచైజీ కూడా అతనిపై ఆసక్తిని చూపింది.తమ అధికారిక సోషల్ మీడియా పేజ్‌లో షా మాట్లాడుతూ కనిపించే ఓ వీడియోను సీఎస్‌కే షేర్ చేసింది. ఇందులో చెన్నైతో తన అనుబంధాన్ని గుర్తుచేసుకుంటూ, ఈ నగరాన్ని తనకు చాలా ప్రత్యేకంగా భావిస్తున్నట్టు షా వెల్లడించాడు.ఈ వీడియోలో షా తీరూ, అతనికి సీఎస్‌కే హ్యాండిల్ ఇచ్చిన ప్రాధాన్యత చూస్తే – వారి మధ్య ఏదో అంతర్గతంగా జరుగుతోందన్న అనుమానం అభిమానుల్లో కలుగకమానదు. సాధారణంగా సీఎస్‌కే, తమ జట్టులో లేని ఆటగాళ్లను ఈ రేంజ్‌లో హైలైట్ చేయడం చాలా అరుదు.ఈ పరిణామాల నేపథ్యంలో అభిమానులు IPL 2026లో షా సీఎస్‌కే జెర్సీలో కనిపించడం ఖాయమని భావిస్తున్నారు. ఒకవేళ ఇదే నిజమైతే, ఆయుశ్ మాత్రేతో కలిసి షా ఓపెనింగ్ జోడీగా రంగంలోకి దిగే అవకాశం ఉంది.