నిధుల దుర్వినియోగం చేశారని,,,శ్రీలంక మాజీ అధ్యక్షుడు రణిల్ విక్రమసింఘే అరెస్ట్

తన వ్యక్తిగత పనుల కోసం.. ప్రభుత్వ డబ్బును దుర్వినియోగం చేశారన్న ఆరోపణలతో శ్రీలంక మాజీ అధ్యక్షుడు అరెస్ట్ అయ్యారు. 2023లో శ్రీలంక అధ్యక్షుడిగా ఉన్న రణిల్ విక్రమసింఘే .. విదేశీ పర్యటనకు వెళ్లి తిరిగి వస్తుండగా.. మధ్యలో తన వ్యక్తిగత పర్యటనకు వెళ్లారని.. అయితే అందుకు ప్రభుత్వ నిధులను ఉపయోగించినట్లు ఆరోపణలు వచ్చాయి. దీంతో రంగంలోకి దిగిన శ్రీలంక క్రిమినల్ ఇన్వెస్టిగేషన్ డిపార్ట్‌మెంట్ (సీఐడీ) అధికారులు.. రణిల్ విక్రమసింఘేను శుక్రవారం అరెస్ట్ చేశారు. అనంతరం ఆయనను కోర్టులో హాజరు పరిచి సీఐడీ అధికారులు తమ కస్టడీలోకి తీసుకున్నారు.

2023 సెప్టెంబర్‌లో శ్రీలంక అధ్యక్షుడి హోదాలో రణిల్ విక్రమసింఘే.. క్యూబాలోని హవానాలో జరిగిన G77 సదస్సుకు హాజరయ్యారు. ఆ తర్వాత అక్కడి నుంచి తిరిగి వస్తూ.. బ్రిటన్‌లో ఆగారు. అక్కడ బ్రిటిష్ యూనివర్సిటీలో ప్రొఫెసర్‌గా పనిచేస్తున్న తన భార్య మైత్రీ విక్రమసింఘే స్నాతకోత్సవానికి రణిల్ విక్రమసింఘే హాజరయ్యారు. అయితే రణిల్ విక్రమసింఘే తన బ్రిటన్ పర్యటనకు సంబంధించిన ఖర్చులను కూడా.. శ్రీలంక ప్రభుత్వ నిధులను వినియోగించారని సీఐడీ అధికారులు ఆరోపిస్తున్నారు. అంతేకాకుండా రణిల్ విక్రమసింఘే.. తన వ్యక్తిగత పర్యటన కోసం వెళ్లినప్పటికీ.. ఆయన బాడీగార్డ్‌లకు కూడా శ్రీలంక ప్రభుత్వమే డబ్బులు చెల్లించిందని చెబుతున్నారు.

అయితే సీఐడీ చేస్తున్న ఆరోపణలను రణిల్ విక్రమసింఘే ఖండించారు. తన భార్య బ్రిటన్ పర్యటన ఖర్చులను ఆమెనే స్వయంగా భరించినట్లు చెప్పారు. అందులో ప్రభుత్వ నిధులను ఎక్కడా ఉపయోగించలేదని వాదించారు. రణిల్ విక్రమసింఘే సిబ్బందిని సీఐడీ అధికారులు.. ఖర్చుల గురించి విచారణ జరిపారు. ఇక విక్రమసింఘేను అరెస్ట్ చేసిన సీఐడీ అధికారులు.. కొలంబో ఫోర్ట్ మేజిస్ట్రేట్ ముందు హాజరుపరిచారు. వ్యక్తిగత అవసరాల కోసం ప్రభుత్వ నిధులు, వనరులను ఉపయోగించుకున్నారని అభియోగాలు మోపారు. అనంతరం ఆయనను అదుపులోకి తీసుకున్నారు.

  2022లో శ్రీలంకలో రాజకీయ సంక్షోభం తలెత్తిన సంగతి తెలిసిందే. అప్పటి అధ్యక్షుడు గోటబయ రాజపక్స రాజీనామా చేసి.. దేశం విడిచి పారిపోయిన తర్వాత.. ఆ దేశం తీవ్ర ఆర్థిక సంక్షోభంలో ఉన్న సమయంలో రణిల్ విక్రమసింఘే అధ్యక్షుడిగా బాధ్యతలు చేపట్టారు. 2022 జూలైలో శ్రీలంక అధ్యక్షుడిగా ఎన్నికైన రణిల్ విక్రమసింఘే.. దేశ ఆర్థిక వ్యవస్థ కుప్పకూలిపోకుండా.. క్రమంగా అభివృద్ధిలోకి తీసుకురావడంలో కీలక పాత్ర పోషించారు. దీంతో ఆయనకు మంచి పేరు వచ్చింది. కానీ.. గతేడాది సెప్టెంబర్‌లో జరిగిన శ్రీలంక అధ్యక్ష ఎన్నికల్లో మాత్రం.. ఆ మంచి పేరు తిరిగి తిరిగి ఆయనను అధ్యక్షుడిగా చేయలేకపోయాయి. ఇక ప్రభుత్వ నిధుల దుర్వినియోగం కేసులో రణిల్ విక్రమసింఘే అరెస్ట్ కావడంతో శ్రీలంక రాజకీయాల్లో మరోసారి పెను ప్రకంపనలు సృష్టిస్తున్నాయి.