టిక్‌టాక్ తిరిగి భారత్‌లోకి..? సోషల్ మీడియాలో సంచలన ప్రచారం!

ప్రపంచంలో అత్యధిక డౌన్‌లోడ్స్‌తో గుర్తింపు పొందిన ప్రముఖ షార్ట్ వీడియో కంటెంట్ యాప్ టిక్‌టాక్, మళ్లీ భారతదేశంలోకి అడుగుపెడుతుందా? అనే చర్చ ఇప్పుడు సోషల్ మీడియాలో హాట్ టాపిక్‌గా మారింది.కొన్ని వార్తా వేదికలు "అవును" అంటున్నాయి. గతంలో ఈ యాప్ ద్వారా అనేక మంది తమ ప్రతిభను ప్రదర్శిస్తూ కాలక్షేపం చేసిన సంగతి తెలిసిందే. ఇప్పుడు అదే టిక్‌టాక్ తిరిగి రాబోతుందన్న వార్తలు వినిపించడంలో ఆశ్చర్యం లేదు. అయితే ఇప్పటివరకు టిక్‌టాక్ సంస్థ నుంచి మాత్రం ఈ అంశంపై ఎటువంటి అధికారిక ప్రకటన వెలువడలేదు.భారతదేశంలో షార్ట్ వీడియో యాప్స్‌కు పునాది వేసిన యాప్‌లలో టిక్‌టాక్‌ ప్రథమం అనే చెప్పాలి. ఇది కరోనా కాలానికి ముందే భారత మార్కెట్లోకి వచ్చి, రికార్డు స్థాయిలో యూజర్లను ఆకర్షించింది. అప్పట్లో ఈ యాప్‌కు యువతలో విపరీతమైన క్రేజ్ ఉండేది.అయితే, 2020లో కొన్ని రాజకీయ పరిణామాలు మరియు భద్రతా కారణాలతో టిక్‌టాక్‌ను భారత్‌లో నిషేధించారు. ఇప్పుడా నిషేధం ఎత్తివేయబోతున్నారా? అనే ప్రశ్నను తెరపైకి తీసుకొచ్చేలా తాజా పరిణామాలు జరుగుతున్నాయి.ఇటీవల భారత్-చైనా సంబంధాలు కొంత మెరుగవుతున్నట్లు భావించబడుతున్న క్రమంలో, వాణిజ్య పరంగా రెండు దేశాల మధ్య పునఃప్రవేశానికి అవకాశాలున్నాయని విశ్లేషకులు అభిప్రాయపడుతున్నారు. కొందరు టిక్‌టాక్ వెబ్‌సైట్‌ను లాగిన్ అయినట్లు చెప్పడం కూడా ఈ ఊహాగానాలకు బలమిస్తోంది.టిక్‌టాక్ బ్యాన్‌కు గల ప్రధాన కారణాలుచైనా‌కు చెందిన టిక్‌టాక్ యాప్‌పై అప్పట్లో యూజర్ల వ్యక్తిగత సమాచారం సురక్షితంగా లేకపోవడం, గోప్యత ఉల్లంఘన ఆరోపణలు వచ్చాయి. ఈ నేపథ్యంలో ఐటీ చట్టం సెక్షన్ 69A ప్రకారం 2020లో భారత ప్రభుత్వం ఈ యాప్‌ను నిషేధించింది.అంతకు ముందు, 2019లో మద్రాస్ హైకోర్టు టిక్‌టాక్‌పై తాత్కాలికంగా స్టే విధించిన విషయం తెలిసిందే. ఆ తర్వాత 2021లో కేంద్ర ప్రభుత్వం ఈ యాప్‌ను పూర్తిగా బ్యాన్ చేస్తూ నిర్ణయం తీసుకుంది.ప్రస్తుతం పరిస్థితులు ఎలా ఉన్నా, ప్రభుత్వ అనుమతి లేకుండా టిక్‌టాక్ మళ్లీ భారత మార్కెట్లోకి రావడం సాధ్యం కాదు. దీంతో ఈ వార్తలపై స్పష్టత రావాలంటే అధికారిక సమాచారం కోసం కొద్ది రోజులు ఎదురుచూడాల్సిందే.