సారా టెండూల్కర్ కొత్త ప్రయాణం.. కాబోయే వదినతో కలిసి ఫిట్‌నెస్ స్టూడియో!

పిల్లలు ఎదిగి, పేరు ప్రఖ్యాతులు సంపాదించి తల్లిదండ్రులను గర్వపడేలా చేయడం కన్నా పెద్ద ఆనందం వారికి మరొకటి ఉండదు. తమ పిల్లలు జీవితంలో స్థిరపడాలని, అభివృద్ధి చెందాలని ప్రతి తల్లిదండ్రి ఆశిస్తారు.అలాంటి గర్వకారణమే ఇప్పుడు సారా టెండూల్కర్ అయ్యింది. భారత క్రికెట్ దిగ్గజం సచిన్ టెండూల్కర్ కుమార్తె సారా తన కొత్త ప్రయాణాన్ని ప్రారంభించింది. ఈ విషయాన్ని సచిన్ టెండూల్కర్ తన ఎక్స్ (మాజీ ట్విట్టర్) ఖాతాలో పంచుకుంటూ, భావోద్వేగానికి లోనయ్యారు.ముంబైలో సొంత పైలేట్స్ స్టూడియో ప్రారంభించిన సారాను చూసి సచిన్ ఎంతో ఆనందం వ్యక్తం చేశారు. కృషి, నమ్మకం, పట్టుదలతో సారా ఈ స్థాయికి చేరుకుందని, ఇది తాను ఎంతో ఇష్టపడే రంగం కూడా అని ఆయన చెప్పుకొచ్చారు. తన కలను సాధించేందుకు సారా చేస్తున్న ప్రయత్నాలు తమకు ఎంతో గర్వంగా ఉన్నాయని పేర్కొన్నారు.ఈ సందర్భంగా జరిగిన ప్రారంభోత్సవ వేడుకకు సంబంధించిన ఫొటోలు, క్షణాలను సచిన్ తన సోషల్ మీడియా ద్వారా పంచుకున్నారు. ఈ కార్యక్రమానికి సచిన్, ఆయన భార్య అంజలి, సారా హాజరయ్యారు. అలాగే సారాతో కలిసి ఆమె కాబోయే వదిన సానియా చందోక్ కూడా రిబ్బన్ కట్ చేయడంలో భాగస్వామ్యమయ్యారు. అయితే, ఇటీవలే నిశ్చితార్థం చేసుకున్న సారా సోదరుడు అర్జున్ టెండూల్కర్ మాత్రం ఈ వేడుకల్లో కనిపించలేదు."ఒక తల్లిదండ్రిగా, పిల్లలు తమ మనసుకు నచ్చిన పనిని ఎంచుకుని, దానిలో విజయం సాధిస్తే... ఆ క్షణం మాటల్లో చెప్పలేని ఆనందాన్ని కలిగిస్తుంది. సారా ఎంతో నిబద్ధతతో, ఒకదాని తర్వాత ఒకదాన్ని నిర్మించుకుంటూ తన డ్రీమ్ ప్రాజెక్ట్‌ అయిన ఈ పైలేట్స్ స్టూడియోను ఏర్పాటు చేసింది. ఆరోగ్యం, న్యూట్రిషన్, ఫిట్‌నెస్ వంటి అంశాలు మా కుటుంబంలో ఎప్పటికీ ముఖ్యమైనవే. ఇప్పుడు ఆ అంశాలనే సారా తనదైన శైలిలో ముందుకు తీసుకెళ్తుండటం చూస్తుంటే ఆనందం కలుగుతోంది. ఆమె ఈ కొత్త ప్రయాణంలో విజయాలు సాధించాలి అనే మనస్ఫూర్తిగా కోరుకుంటున్నాం" అంటూ సచిన్ తన పోస్ట్‌లో తెలిపారు.