వీధి కుక్కలపై ప్రేమ.. 38 సెకన్లలోనే 8 చెంప దెబ్బలు, అయినా భోజనం పెట్టిన మహిళ

వీధి కుక్కల వ్యవహారం ప్రస్తుతం దేశవ్యాప్తంగా తీవ్ర చర్చకు దారితీస్తోంది. వీధి కుక్కల దాడుల్లో చిన్నారులు, పెద్దలు తీవ్ర గాయాలపాలవుతుండటం, ప్రాణాలు కోల్పోతుండటం తీవ్ర ఆందోళనకు గురి చేస్తోంది. ఇలాంటి ఘటనలు జరిగినప్పుడు వీధి కుక్కల నియంత్రణకు తీసుకోవాల్సిన చర్యలపై పెద్ద ఎత్తున డిమాండ్లు వెల్లువెత్తుతుంటాయి. అదే సమయంలో జంతు ప్రేమికులు మాత్రం.. వీధి కుక్కలకు మద్దతుగా నిలుస్తూ ఉంటారు. ఇటీవల సుప్రీంకోర్టు.. వీధి కుక్కల విషయంలో ఇచ్చిన తీర్పు దేశవ్యాప్తంగా చర్చల్లో నిలిచింది. వీధుల్లో ప్రమాదకరంగా తిరిగే కుక్కలను గుర్తించి.. వాటిని షెల్టర్లకు తరలించాలని ఇటీవలె ఢిల్లీ ప్రభుత్వానికి సుప్రీంకోర్టు ఆదేశాలు జారీ చేసిన సంగతి తెలిసిందే. ఢిల్లీతోపాటు ఢిల్లీ ఎన్‌సీఆర్ పరిధిలోనూ ఈ ఆదేశాలు వర్తిస్తాయని కోర్టు స్పష్టం చేసింది.

ఈ క్రమంలోనే తాజాగా ఓ ఘటన తీవ్ర దుమారానికి కారణం అవుతోంది. ఉత్తర్‌ప్రదేశ్‌లోని ఘజియాబాద్‌లో శుక్రవారం సాయంత్రం ఓ మహిళ కుక్కకు ఆహారం పెట్టింది. అయితే అలా కుక్కకు భోజనం పెట్టడం చూసిన ఓ వ్యక్తి.. వద్దని ఆమెను వారించాడు. అయినప్పటికీ ఆమె అదేమీ పట్టించుకోకుండా.. ఆ కుక్కకు ఆహారం పెట్టింది. అది చూసి తీవ్ర ఆగ్రహానికి గురైన ఆ వ్యక్తి.. ఆ మహిళ చెంప చెళ్లుమనిపించాడు. ఒకసారి కాదు రెండుసార్లు కాదు.. ఏకంగా 8 సార్లు ఆమె చెంపపై కొట్టాడు. ఇదంతా కేవలం 38 సెకన్లలోనే జరిగిపోవడం గమనార్హం. ఘజియాబాద్‌లోని విజయ్ నగర్ ప్రాంతంలో ఉన్న బ్రహ్మపుత్రా ఎన్‌క్లేవ్ సొసైటీలో ఈ సంఘటన చోటు చేసుకుంది. ఇక ఆ మహిళను కొట్టిన వ్యక్తిని కమల్ ఖన్నా అని గుర్తించారు. ఆ మహిళను యషికా శుక్లా అని తెలిపారు.

ఆ అపార్ట్‌మెంట్‌ కాంప్లెక్స్‌లో ఉన్న వీధి కుక్కకు.. యషికా శుక్లా ఆహారం పెడుతుంటే.. దాన్ని చూసిన కమల్ ఖన్నా. అడ్డుకున్నాడు. అపార్ట్‌మెంట్ వద్ద కుక్కకు ఎందుకు ఆహారం పెడుతున్నావు అని ప్రశ్నించాడు. అందుకు ఆమె ఇందులో తప్పేముంది అంటూ సమాధానం ఇచ్చింది. దీంతో తీవ్ర ఆగ్రహానికి గురైన కమల్ ఖన్నా.. యషికా శుక్లాను చెంప దెబ్బ కొట్టాడు. అయినా ఆమె ఆగకుండూ కుక్కకు ఆహారం పెడుతూనే ఉండటంతో.. కమల్ ఖన్నా చెంప దెబ్బలు కొడుతూనే ఉన్నాడు. అయితే అది కుక్కలకు ఆహారం పెట్టేందుకు ప్రత్యేకంగా ఏర్పాటు చేసిన ప్రదేశమని యషికా శుక్లా పేర్కొంది.

ఇక యషికా శుక్లాపై కమల్ ఖన్నా దాడి చేయడాన్ని ఆమె ఫ్రెండ్ తన సెల్‌ఫోన్‌లో రికార్డ్ చేసింది. ఆ వీడియోలో "అక్కా.. వీడియో రికార్డ్ చేయి.. ఇతను నన్ను కొడుతున్నాడు" అంటూ యషికా శుక్లా అరవడం వినిపిస్తుంది. దానికి "అవును, రికార్డ్ చేసుకో" అని కమల్ ఖన్నా ధైర్యంగా సమాధానం చెప్పడం కూడా రికార్డ్ అయింది. ఇక ఈ వీడియోను సోషల్ మీడియాలో పోస్ట్ చేయడంతో తీవ్ర దుమారం రేపింది. దీంతో రంగంలోకి దిగిన పోలీసులు కేసు నమోదు చేసి.. నిందితుడు కమల్ ఖన్నాను అదుపులోకి తీసుకున్నారు.

ఈ ఘటన జరగడానికి కొన్ని గంటల ముందే.. ఢిల్లీతోపాటు రాజధాని ప్రాంతాల్లోని వీధి కుక్కలను తరలించాలని గతంలో ఇచ్చిన ఆదేశాలను సుప్రీంకోర్టు కొద్దిగా సవరించింది. మొదట్లో వీధి కుక్కలను పట్టుకుని షెల్టర్లకు తరలించాలని ఆదేశించిన సుప్రీంకోర్టు.. అది చాలా కఠినమైన ఆదేశాలు అని తాజాగా అభివర్ణించింది. ఈ నేపథ్యంలోనే వీధి కుక్కలకు వ్యాక్సిన్, స్టెరిలైజేషన్ చేసి వాటిని మళ్లీ ఆ ప్రాంతాల్లోనే వదిలివేయాలని తాజా ఉత్తర్వుల్లో సుప్రీంకోర్టు వెల్లడించింది. అయితే రేబిస్ లేదా ఇతర హింసాత్మక ప్రవర్తన ఉన్న వీధి కుక్కలను మాత్రమే పట్టుకుని షెల్టర్లలో ఉంచాలని స్పష్టం చేసింది. వీధి కుక్కలకు ఆహారం పెట్టేందుకు ప్రత్యేక ఫీడింగ్ కేంద్రాలను ఏర్పాటు చేయాలని సూచించింది.