గాజా బాధితులకు సాయం పేరుతో నిధులు సేకరించిన సిరియా జాతీయుడు

గాజాలో యుద్ధ బాధితుల ఆకలి తీరుస్తామంటూ మసీదుల్లో విరాళాలు సేకరించి, ఆ డబ్బుతో విలాసవంతమైన జీవితం గడుపుతున్న ఓ సిరియా జాతీయుడిని అహ్మదాబాద్ పోలీసులు అరెస్ట్ చేశారు. అలీ మేఘత్ అల్-అజ్హర్ (23) అనే ఈ యువకుడిని ఎల్లిస్‌బ్రిడ్జ్ ప్రాంతంలోని ఓ హోటల్‌లో అదుపులోకి తీసుకున్నారు. ఈ మోసంలో అతడికి సహకరించిన మరో ముగ్గురు పరారీలో ఉన్నారని, వారి కోసం గాలిస్తున్నామని అధికారులు వెల్లడించారు.పోలీసుల కథనం ప్రకారం, అలీ తన ముగ్గురు సహచరులతో కలిసి గుజరాత్‌లోని పలు మసీదులను లక్ష్యంగా చేసుకున్నాడు. గాజాలో ఆకలితో అలమటిస్తున్న కుటుంబాల వీడియోలను చూపిస్తూ, మానవతా దృక్పథంతో సాయం చేయాలని కోరేవారు. వారి మాటలు నమ్మిన ప్రజలు ఇచ్చిన విరాళాలను ఈ ముఠా తమ సొంత జల్సాల కోసం ఉపయోగించుకుంది. సేకరించిన డబ్బును గాజాకు పంపకుండా, ఖరీదైన హోటళ్లలో బస చేస్తూ విలాసవంతమైన జీవితం గడిపినట్టు దర్యాప్తులో తేలింది.అలీ జూలై 22న టూరిస్ట్ వీసాపై కోల్‌కతా మీదుగా భారత్‌లోకి ప్రవేశించాడు. దేశంలోని పలు ప్రాంతాల్లో పర్యటించి, ఆగస్టు 2న అహ్మదాబాద్‌కు చేరుకున్నాడు. ఇక్కడి రీగల్ రెసిడెన్సీ హోటల్‌లో మరో ముగ్గురు సిరియన్లతో కలిసి బస చేస్తున్నట్టు సమాచారం అందుకున్న పోలీసులు దాడి చేసి అతడిని పట్టుకున్నారు. అరెస్ట్ సమయంలో అలీ వద్ద 3,600 అమెరికన్ డాలర్లు, 25,000 రూపాయల భారత కరెన్సీని స్వాధీనం చేసుకున్నారు. పరారైన జకరియా, అహ్మద్, యూసెఫ్‌లపై లుక్‌ఔట్ నోటీసులు జారీ చేశారు.ఈ కేసులో దేశ భద్రతకు సంబంధించిన కోణం కూడా ఉండవచ్చని అనుమానిస్తున్న గుజరాత్ ఏటీఎస్, జాతీయ దర్యాప్తు సంస్థ (ఎన్ఐఏ) సంయుక్తంగా విచారణ చేపట్టాయి. టూరిస్ట్ వీసాపై వచ్చి నిధుల సేకరణ వంటి కార్యకలాపాల్లో పాల్గొనడం నిబంధనల ఉల్లంఘన కిందికి వస్తుంది. నిందితుల పాస్‌పోర్టుల గురించిన వివరాలను కూడా అధికారులు పరిశీలిస్తున్నారు. ప్రస్తుతం అలీని దేశం నుంచి బహిష్కరించే ప్రక్రియను ప్రారంభించినట్లు పోలీసులు తెలిపారు.