ప్రధాని మోదీ డిగ్రీ వివాదం కేసు.. ఢిల్లీ హైకోర్టు సంచలన తీర్పు

ప్రధాన మంత్రి నరేంద్ర మోదీ విద్యార్హతలకు సంబంధించి ఢిల్లీ హైకోర్టు సోమవారం సంచలన తీర్పు వెలువరించింది. మోదీ డిగ్రీకి సంబంధించిన సమాచారాన్ని బహిర్గతం చేయడం కుదరదని తేల్చిచెప్పింది. ఈ క్రమంలో ప్రధాన సమాచార కమిషన్ (CIS) ఇచ్చిన ఆదేశాలను హైకోర్టు కొట్టివేసింది. సమాచార హక్కు చట్టం కింద దాఖలైన దరఖాస్తుకు ప్రతిస్పందనగా ప్రధాని నరేంద్ర మోదీ విద్యార్హతల వివరాలను వెల్లడించాలని ఢిల్లీ యూనివర్సిటీకి ప్రధాన సమాచార కమిషన్ ఇచ్చిన ఆదేశాలను ఢిల్లీ హైకోర్టు ప్రధాన న్యాయమూర్తి జస్టిస్ సచిన్ దత్తా ధర్మాసనం నిలిపివేసింది. ప్రధాని విద్యార్హతలు, డిగ్రీ గురించి వివరాలు బహిర్గతం చేయాల్సిన అవసరం లేదని పేర్కొన్నారు.

అయితే, ఈ అంశంపై ఇరు పార్టీలు సుప్రీంకోర్టును ఆశ్రయించవచ్చని చెప్పారు. మోదీ డిగ్రీ వివరాలను బహిర్గతం చేయడంపై దాదాపు పదేళ్లుగా న్యాయ పోరాటం కొనసాగుతోంది. మోదీ తన ఎన్నికల అఫిడ్‌విట్‌లో 1978లో ఢిల్లీ యూనివర్శిటీ నుంచి డిగ్రీ పూర్తిచేసినట్టు చూపించారు. ఈ క్రమంలో ప్రధాని విద్యా రికార్డు కోసం 2016లోహక్కుల కార్యకర్త ఆర్టీఐ ద్వారా వివరాల కోరడంతో వివాదం మొదలైంది. మూడో పక్షానికి సంబంధించిన వివరాలను బయటపెట్టడం నిబంధనలకు విరుద్దమని ఢిల్లీ విశ్వవిద్యాలయం స్పష్టం చేసింది.

కానీ, చీఫ్ ఇన్ఫర్మేషన్ కమిషన్ ఈ వాదనతో ఏకీభవించలేదు. ఈ క్రమంలో 2016 డిసెంబరులో తనిఖీకి అనుమతించాలని యూనివర్సిటీని ఆదేశించింది. ధేశ ప్రధాని విద్యార్హతలు పారదర్శకంగా ఉండాలని ఇచ్చిన ఉత్తర్వులను సీఐసీ సమర్థించింది. ఈ వివరాలు పొందుపరిచిన రిజిస్టర్‌ను ప్రజాపత్రంగా పరిగణిస్తారని కూడా సమాచార కమిషన్ పేర్కొంది. దీంతో ఢిల్లీ యూనివర్సిటీ ఈ ఉత్తర్వులను సవాల్ చేస్తూ హైకోర్టును ఆశ్రయించింది. దీనిపై విచారణ చేపట్టిన ఢిల్లీ హైకోర్టు.. 2017 జనవరి 23 స్టే విధించింది. తాజాగా, యూనివర్సిటీకి అనుకూలంగా తీర్పు వెలువరించింది. యూనివర్సిటీ తరఫున సొలిసిటర్ జనరల్ తుషార్ మెహతా కోర్టుకు హాజరై వాదనలు వినిపించారు. ప్రధాని డిగ్రీ రికార్డులను బహిర్గతం చేయడానికి వర్సిటీకి ఎలాంటి అభ్యంతరం లేదని తెలిపారు. మోదీ 1978లో బీఏ డిగ్రీ పూర్తిచేశారని వివరించారు.