ధర 10 రూపాయలే.. 100 షేర్లు కొంటే 100 షేర్లు ఉచితం

స్మాల్ క్యాప్ కేటగిరిలోని ఆగ్రో సెక్టార్ కంపెనీ జూలియన్ ఆగ్రో ఇన్‌ఫ్రా టెక్ లిమిటెడ్ బంపర్ ఆఫర్ ప్రకటించింది. కంపెనీ బోర్డు ఆఫ్ డైరెక్టర్లు ఇటీవలే సమావేశమై తమ షేర్ హోల్డర్స్ బోనస్ షేర్లు ఇచ్చేందుకు ఆమోదం తెలిపారు. రికార్డ్ తేదీ లోపు ఇందులో 1 షేరు కొనుగోలు చేసి ఉంటే మరో షేరు ఉచితంగా లభిస్తుంది. మరోవైపు ఈ కంపెనీ స్టాక్ గత నెల రోజుల్లో 12 శాతం లాభాన్ని అందించింది. జూలియన్ ఆగ్రో ఇన్ఫ్రా టెక్ స్టాక్ రూ. 10 లోపు ధర ఉన్న ఒక పెన్నీ స్టాక్. మరి ఈ స్టాక్ గురించి తెలుసుకుందాం.

కంపెనీ ఎక్స్చేంజ్ ఫైలింగ్ ప్రకారం.. అర్హులైన వారికి 1:1 రేషియోలో బోనస్ షేర్లు జారీ చేసేందుకు కంపెనీ బోర్డు సిఫారసు చేసింది. అంటే రికార్డు డేట్ నాటికి రూ. 5 ఫేస్ వ్యాల్యూ ఉన్న 1 ఈక్విటీ షేరును తమ డీమ్యాట్ ఖాతాలో కలిగి ఉన్న వారికి అదనంగా రూ. 5 ఫేస్ వ్యాల్యూ ఉండే 1 ఈక్విటీ షేరును బోనస్ రూపంలో ఉచితంగా జారీ చేస్తారు. ఈ బోనస్ షేర్లు జారీ చేసేందుకు అర్హులైన షేర్ హోల్డర్లను నిర్ణయించేందుకు అవసరమైన రికార్డు తేదీని అక్టోబర్ 6, 2025గా కంపెనీ బోర్డు నిర్ణయించినట్లు తెలిపింది.

ఈ రోజు స్టాక్ మార్కెట్ ట్రేడింగ్ సెషన్లో జూలియన్ ఆగ్రో ఇన్‌ఫ్రా టెక్ లిమిటెడ్ షేరు ఆరంభంలో లాభాల్లో కొనసాగింది. ఒక దశలో ఇంట్రాడే హై స్థాయి రూ. 10.85ను తాగింది. అయితే మార్కెట్లు ముగిసే సమయానికి మదుపరులు లాభాల స్వీకరణకు దిగడంతో 2.09 శాతం నష్టంతో రూ. 9.86 వద్ద స్థిరపడింది. ఈ షేరు 52 వారాల గరిష్ఠ ధర రూ. 17.32, కనిష్ఠ ధర రూ. 6.55 వద్ద ఉన్నాయి. స్టాక్ పీఈ రేషియో 28.17గా ఉండగా డివిడెండ్ ఈల్డ్స్ 0.76 శాతంగా ఉన్నాయి.

గత వారం రోజుల్లో ఈ షేరు 7 శాతం లాభాన్ని అందించింది. గత నెల రోజుల్లో సుమారు 12 శాతం పెరిగింది. గత ఆరు నెలల్లో 1 శాతం మేర నష్టపోయింది. గత ఏడాది కాలంలో 19 శాతం నష్టాన్ని మిగిల్చింది. గత ఐదేళ్లలో ఈ షేర్ 47 శాతం లాభాలు అందించింది. ప్రస్తుతం ఈ కంపెనీ మార్కెట్ విలువ రూ. 39 కోట్ల వద్ద ఉంది.