హెల్త్ ఇన్సూరెన్స్ ఎప్పుడు తీసుకోవాలి

ద్రవ్యోల్బణం అనేది పెరుగుతూ పోతుంటుంది. ఈ క్రమంలోనే మన ఖర్చులు కూడా పెరుగుతుంటాయి. ముఖ్యంగా వైద్య ఖర్చులు భరించలేని స్థాయిలో ఉంటాయి. అందుకే అందరికీ ఆరోగ్య బీమా ఉండాలనే అభిప్రాయం కలుగుతోంది. కరోనా తర్వాతి కాలంలో దీని అవసరం ఇంకా తెలిసొచ్చింది. హెల్త్ ఇన్సూరెన్స్ అనేది.. వైద్య ఖర్చుల్ని భారీగా తగ్గిస్తుంది. మనకు ఎంతో ఆదా చేస్తుందని చెప్పొచ్చు. దీంతో అత్యవసర సమయాల్లో కుటుంబానికి అండగా నిలుస్తుంది. ఇక్కడ పెద్ద పెద్ద ఆపరేషన్ల వరకు కూడా హెల్త్ ఇన్సూరెన్స్ కవర్ చేస్తుంది. అందుకే.. ప్రతి ఒక్కరూ తమ స్థోమతకు తగ్గట్లుగా తగినంత ఆరోగ్య బీమా కొనుగోలు చేయాల్సిన అవసరం ఎంతైనా ఉంది. అయితే మీరు ఇక్కడ ఎంత పాలసీ తీసుకోవాలి.. ఎప్పుడు తీసుకోవాలి.. వంటి విషయాలపై కాస్త అవగాహన పెంపొందించుకోవాలి. ఈ వివరాల్ని చూద్దాం.

>> కుటుంబంలో నలుగురైదుగురు ఉన్నట్లయితే.. అక్కడ బీమా కవరేజీ మొత్తం కుటుంబ పెద్ద (సంపాదించే వ్యక్తి) వార్షిక వేతనానికి సమానంగా ఉండాలి. లేకపోతే కనీసం రూ. 10 లక్షల హెల్త్ ఇన్సూరెన్స్ ఉండాలి. తక్కువ ఆదాయం ఉన్న వారు కూడా.. ప్రస్తుత వైద్య ఖర్చుల నేపథ్యంలో కనీసం రూ. 5 లక్షల కవరేజీ ఉండే పాలసీ తీసుకోవాలని సూచిస్తున్నారు.

>> ఇంకా మీరు బీమా తీసుకోవాలనుకుంటే ఫ్యామిలీ ఫ్లోటర్ ప్లాన్ బెటర్ అని చెబుతున్నారు. ఇక్కడ కుటుంబ సభ్యులందరికీ ఒకే బీమా వర్తిస్తుంది. అందరికీ ఏదైనా సమస్య ఒకే సంవత్సరంలో రాకపోవచ్చు కాదు ఇది బెటర్ అని సలహాలు ఇస్తున్నారు. ఇక్కడ కూడా రూ. 10 లక్షల వరకు పాలసీని సూచిస్తున్నారు.

>> మీరు ఇన్సూరెన్స్ కవరేజీపై నిర్ణయం తీసుకునేముందు.. బీమా కొనుగోలు చేసే వ్యక్తి వయసును కూడా లెక్కలోకి తీసుకోవాల్సి ఉంటుంది. ఎక్కువగా సీనియర్ సిటిజెన్స్‌కు అనారోగ్యాలు వచ్చే అవకాశం ఎక్కువగా ఉంటుంది కాబట్టి వీరికి తగినంత మొత్తంతో పాలసీ తీసుకోవాలి. సీనియర్ సిటిజెన్లకు ప్రీమియం కాస్త ఎక్కువే ఉంటుంది.

>> మీ ఆదాయం తక్కువగా ఉండి.. ఎక్కువ ప్రీమియం చెల్లించలేకపోతుంటే.. అప్పుడు తక్కువ బీమా తీసుకోవడమే ఉత్తమం. మీరు పనిచేసే సంస్థల్లో గ్రూప్ పాలసీ ఉన్నట్లయితే.. తక్కువ బీమా మొత్తంతో పాలసీ ఎంచుకోవచ్చు లేదా టాపప్ కూడా చేయించుకోవచ్చు.

>> పాలసీ కవరేజీ మొత్తం ఎంచుకునేముందు.. వైద్య చరిత్రను తనిఖీ చేయాలి. ఇప్పటికే కుటుంబంలో తరచుగా వ్యాధుల బారిన పడే వారు ఉన్నట్లయితే ఎక్కువ బీమా తీసుకోవాల్సి వస్తుంది. ఇంకా మెరుగైన ప్రైవేట్ ఆస్పత్రుల్లో చికిత్స చేయించాల్సి వస్తే కూడా వైద్య ఖర్చులు ఎక్కువగా ఉంటాయి కాబట్టి ఎక్కువ బీమా మొత్తాన్ని తీసుకోవాల్సి ఉంటుంది.

రక్తపోటు, మధుమేహం, ఊబకాయం ఇలాంటి వ్యాధులు మీకు తరచుగా వస్తున్నట్లయితే.. ఎక్కువ బీమా మొత్తాన్ని ఎంచుకోవడమే మేలు. సిటీల్లో పొల్యూషన్ మధ్య నివసిస్తుంటే కూడా వ్యాధులు వచ్చే అవకాశం ఉంటుంది కాబట్టి.. ఇక్కడ కూడా ఎక్కువ కవరేజీ ఉండేలా ప్లాన్ చేసుకోవాలి.