వివాదంలో మరో నేత.. సస్పెండ్ చేసిన జనసేన పార్టీ

జనసేన పార్టీ నేతలు ఇటీవలి కాలంలో తరుచూ వివాదాల్లో చిక్కుకుంటున్న సంగతి తెలిసిందే. శ్రీశైలంలో ఫారెస్ట్ సిబ్బందిపై జరిగిన దాడి కేసులో.. జనసేన నేతను పోలీసులు ఏ1గా చేర్చిన సంగతి తెలిసిందే. అంతకుముందు శ్రీకాళహస్తి జనసేన నేత కోట వినుత కేసు గురించి తెలిసిన విషయమే. డ్రైవర్ హత్య కేసులో కోట వినుతను పోలీసులు అరెస్ట్ చేస్తే.. ఇటీవలే బెయిల్ మీద బయటకు వచ్చారు. తాజాగా మరోచోట జనసేన నేత అత్యుత్సాహం.. ఆ పార్టీకి ఇబ్బందికరంగా మారింది. డ్యూటీలో ఉన్న ఓ హోంగార్డుపై జనసేన నేత దాడి చేశారు. ఈ ఘటనలో హోంగార్డుకు తీవ్ర గాయాలయ్యాయి. దీంతో పోలీసులు కేసు నమోదు చేసి దర్యాప్తు ప్రారంభింంచారు. ఈ నేపథ్యంలో జనసేన పార్టీ అతన్ని పార్టీ నుంచి సస్పెండ్ చేసింది. ఈ ఘటన మచిలీపట్నంలో చోటుచేసుకుంది.

పోలీసులు వెల్లడించిన వివరాల ప్రకారం.. మోహన్ రావు అనే వ్యక్తి మచిలీ పట్నం పోలీస్ స్టేషన్‌లో హోంగార్డుగా పని చేస్తున్నారు. అయితే గత ఆదివారం రోజు రాత్రి మోహనరావు మరో కానిస్టేబుల్‌తో కలిసి నైట్ బీట్ నిర్వహించారు. రాత్రి వేళ గస్తీలో భాగంగా ఇద్దరూ కలిసి బందరువిశ్వబ్రాహ్మణుల కాలనీకి వెళ్లారు. అయితే అర్ధరాత్రి 12 గంటల సమయంలో అదే ప్రాంతంలో ఉంటున్న కర్రి మహేష్‌ అనే జనసేన నేత అక్కడకు వచ్చి హోంగార్డుతో గొడవకు దిగారు. హోంగార్డు మోహనరావును దుర్భాషలాడుతూ అతనిపై దాడి చేశారు. ఈ ఘటనలో మోహనరావుకు తీవ్ర గాయాలు కాగా.. పక్కనున్న కానిస్టేబుల్‌ వెంటనే అతన్ని మచిలీపట్నం ఆస్పత్రికి తరలించారు. ఈ నేపథ్యంలో బాధితుడు మోహనరావు ఫిర్యాదు మేరకు పోలీసులు కర్రి మహేష్ మీద121(1), 351(2) బీఎన్‌ఎస్‌ సెక్షన్ల కింద కేసు పెట్టారు.

మరోవైపు హోంగార్డుపై దాడి చేశారంటూ కర్రి మహేష్‌పై ఆరోపణలు రావటంతో జనసేన పార్టీ అధిష్టానం స్పందించింది. పార్టీ క్రమశిక్షణా నియమావళిని ఉల్లంఘించారంటూ కర్రి మహేష్‌ను పార్టీ నుంచి సస్పెండ్ చేసింది. పార్టీ అధిష్టానం నుంచి వచ్చిన ఆదేశాలతో కర్రి మహేష్‌ను పార్టీ నుంచి సస్పెండ్ చేసినట్లు జనసేన మచిలీపట్నం నియోజకవర్గ ఇన్‌ఛార్జి బండి రామకృష్ణ వెల్లడించారు. కర్రి మహేష్‌ జనసేన క్రియాశీలక సభ్యత్వాన్ని రద్దు చేశామని.. జనసేన పార్టీ కార్యక్రమాలకు ఆయనను దూరంగా ఉంచుతామని సోమవారం వెల్లడించారు.ఈ ఘటనలో పోలీసుల విచారణ తర్వాత.. ఆ వివరాలను అధిష్టానానికి నివేదిస్తామని.. ఆ తర్వాత అధిష్టానం నిర్ణయం ఆధారంగా కర్రి మహేష్ సభ్యత్వంపై పునరాలోచన చేస్తామని బండి రామకృష్ణ తెలిపారు.