కోచింగ్ సెంటర్ టెర్రస్ పైనుంచి దూకబోయిన నీట్ విద్యార్థిని

దేశవ్యాప్తంగా నీట్ విద్యార్థుల ఆత్మహత్యలు, ఆత్మహత్యాయత్నాలు ఆగడం లేదు. ఇష్టం లేని చదువులు చదవలేక.. తల్లిదండ్రులను ఇబ్బంది పెట్టలేక.. చాలా మంది యువకులు, యువతులు ప్రాణాలు తీసుకుంటున్న సంఘటనలు ఇటీవలి కాలంలో చాలా చూస్తున్నాం. ఇష్టం లేక కొందరు.. ఎంత చదివినా అది బుర్రకెక్కక మరికొందరు.. బలవన్మరణాలకు పాల్పడుతున్నారు. అదే సమయంలో నీట్ అంటే పరీక్షల ఒత్తిడి, మార్కుల టెన్షన్ ఉంటుంది. వాటిని తట్టుకోలేక.. నీట్‌లో సీటు రాదనే భయాలు.. రిజల్ట్స్ భయాలతో చాలా మంది ఆత్మహత్యలకు పాల్పడుతున్నారు. ఇక నీట్ కోచింగ్‌లకు దేశవ్యాప్తంగా రాజస్థాన్ బాగా ఫేమస్. రాజస్థాన్‌లోని కోటాలో నీట్ విద్యార్థుల ఆత్మహత్య చేసుకున్న వార్తలు మనం ఎన్నో చూశాం. తాజాగా రాజస్థాన్ రాజధాని జైపూర్‌లో అలాంటి సంఘటనే ఒకటి చోటు చేసుకుంది.

నీట్ పరీక్షలకు సిద్ధమవుతున్న ఒక విద్యార్థిని.. శుక్రవారం మధ్యాహ్నం సుమారు 2 గంటల సమయంలో.. ఆత్మహత్యాయత్నం చేసింది. ఒక ప్రముఖ కోచింగ్ సెంటర్‌లో నీట్ కోచింగ్ తీసుకుంటున్న యువతి.. ఆ భవనం పైకెక్కి దూకేస్తానని అందర్నీ బెదిరించింది. దీంతో అక్కడ ఉన్నవారంతా తీవ్ర భయాందోళనలకు గురయ్యారు. చివరికి అక్కడ ఉన్నవారు నచ్చజెప్పి.. దగ్గరికి వెళ్లి ఆమెను అతి కష్టం మీద కిందికి తీసుకువచ్చారు. అనంతరం ఆమె సమస్యను అడిగి తెలుసుకున్నారు.

ఈ ఘటనపై స్పందించిన పోలీసులు.. ఆత్మహత్యకు యత్నించిన ఆ విద్యార్థిని.. గత కొంతకాలంగా తీవ్ర మానసిక ఒత్తిడితో బాధపడుతోందని తెలిపారు. నీట్ కోచింగ్‌లో భాగంగా నిర్వహించే పరీక్షలు రాయడం ఆ యువతి మానేసిందని.. ఈ విషయం తల్లిదండ్రులకు తెలిస్తే తిడతారని భయపడి.. ప్రాణాలు తీసుకోవాలనే కఠిన నిర్ణయం తీసుకున్నట్లు పోలీసులు వెల్లడించారు.

ఇక ఆ యువతి.. బిల్డింగ్‌ పైకి ఎక్కి.. దూకేందుకు ప్రయత్నించగా.. అక్కడ ఉన్న వారు వీడియో తీసి సోషల్ మీడియాలో పెట్టడంతో తెగ వైరల్ అవుతోంది. ఆ విద్యార్థిని.. కోచింగ్ సెంటర్ బిల్డింగ్ అంచున కూర్చొని.. కాళ్లను వేలాడ దీసి.. కిందికి దూకేస్తానని బెదిరించడం ఆ వీడియోల్లో కనిపిస్తోంది. అది గమనించిన కోచింగ్ సెంటర్ సిబ్బంది, స్థానికులు.. ఆ యువతిని రక్షించడానికి చేసిన ప్రయత్నాలు కూడా ఆ వీడియోలో ఉన్నాయి. యువతి ఆత్మహత్య చేసుకునేందుకు ప్రయత్నించడంతో.. ఆ రోడ్డుపై భారీగా జనం గుమిగూడారు.

ఈ క్రమంలోనే కోచింగ్ సెంటర్‌ సిబ్బంది.. మెల్లగా ఆ బిల్డింగ్ పైకి ఎక్కి.. ఆ యువతి వద్దకు చేరుకున్నారు. ఎట్టకేలకు ఆమెను కిందికి దూకకుండా అడ్డుకున్నారు. వారిలో ఒకరు ఆ యువతిని బలవంతంగా పట్టుకుని వెనక్కి లాగడంతో పెను ప్రమాదం తప్పింది. దీంతో అక్కడ ఉన్నవారంతా ఊపిరిపీల్చుకున్నారు. ఈ ఘటన గురించి ఆ యువతి తల్లిదండ్రులకు కోచింగ్ సెంటర్ నిర్వాహకులు సమాచారం అందించారు. అనంతరం వారు తమ కుమార్తెను ఇంటికి తీసుకువెళ్లారు. అయితే ఈ ఘటనపై ఎలాంటి ఫిర్యాదు నమోదు కాలేదని పోలీసులు వెల్లడించారు.