‘అలా వచ్చి అరెస్ట్ చేయడానికి వీల్లేదు’,,,ఏపీ పోలీసులపై హైకోర్టు ఆగ్రహం

పోలీసులు తీరుపై ఆంధ్రప్రదేశ్ హైకోర్టు తీవ్ర ఆగ్రహం వ్యక్తం చేసింది. పోలీసులు సివిల్ దుస్తుల్లో రావడానికి వీల్లేదని.. అలా చేయడం నిబంధనలకు విరుద్ధమని కోర్టు స్పష్టం చేసింది. సివిల్ దుస్తుల్లో వచ్చి.. అరెస్ట్ చేస్తామంటే కుదరదని కోర్టు తెలిపింది. అలానే గతంలో డీకే బసు కేసులో సుప్రీం కోర్టు ఇచ్చిన తీర్పును ఈ సందర్భంగా హైకోర్టు గుర్తు చేసింది. సివిల్ దుస్తుల్లో వచ్చి.. తమ విధులను అడ్డుకున్నారంటే ఎలా అని ప్రశ్నించింది. ఎస్‌బీ(స్పెషల్ బ్రాంచ్) పోలీసులు కోవూరు మాజీ శాసనసభ్యుడు నల్లపురెడ్డి ప్రసన్నకుమార్ రెడ్డి వాహనం చెక్ చేసే సందర్భంగా చోటు చేసుకున్న తోపులాటకు సంబంధించిన కేసులో.. ప్రసన్నకుమార్ రెడ్డి దాఖలు చేసిన పిటిషన్ మీద హైకోర్టు తాజాగా విచారణ జరిపింది.

ఈ సందర్భంగా కోర్టు కీలక వ్యాఖ్యలు చేసింది. పోలీసులు సివిల్ దుస్తుల్లో లా అండ్ ఆర్డర్ విధులు నిర్వర్తిస్తామంటే కుదరదని కోర్టు స్పష్టం చేసింది. అసలు పోలీసులకు సివిల్ దుస్తుల్లో విధులు నిర్వర్తించే అవకాశమే లేదన్నది. కనీసం వారు సఫారీ దుస్తుల్లో ఉన్న అర్థం చేసుకోవచ్చని కోర్టు అభిప్రాయపడింది. ప్రసన్నకుమార్ రెడ్డి దాఖలు చేసిన పిటిషన్ విచారణ సందర్భంగా పిటిషనర్ తరఫున న్యాయవాది వాదనలు వినిపించారు.

  తోపులాట జరిగిన సమయంలో ప్రసన్నకుమార్ రెడ్డి లేరని.. ఆయన ఎవరిని తోసేయలేదని ప్రసన్నకుమార్ రెడ్డి తరఫు న్యాయవాది కోర్టుకు తెలిపారు. దీనికి సంబంధించిన ఫొటోలను పరిశీలిస్తే.. అన్ని విషయాలు తెలుస్తాయన్నారు. న్యాయవాది ఇచ్చిన ఫొటోలను పరిశీలించిన న్యాయమూర్తి.. వాటిల్లో సివిల్ దుస్తుల్లో ఉన్న వారి గురించి ఆరా తీశారు. వారు పోలీసులని పిటిషనర్ తరఫు న్యాయవాది చెప్పడంతో న్యాయమూర్తి ఆశ్చర్యపోయారు. పోలీసులు సివిల్ దుస్తుల్లో విధులు నిర్వర్తిండం ఏంటని ఆయన ప్రశ్నించారు. అందుకు రాష్ట్ర పబ్లిక్ ప్రాసిక్యూటర్ బదులిస్తూ.. స్పెషల్ బ్రాంచ్ పోలీసులు సివిల్ దుస్తుల్లోనే విధులు నిర్వర్తిస్తారని చెప్పుకొచ్చారు.

అయితే పబ్లిక్ ప్రాసిక్యూటర్ ఇచ్చిన సమాధానంతో న్యాయమూర్తి ఏకీభవించలేదు. పోలీసులు ఎప్పుడూ కూడా యూనిఫాంలోనే ఉండి విధులు నిర్వహించాల్సి ఉంటుందని తెలిపారు. ఈ అంశంలో పోలీసు మాన్యువల్‌ను కూడా చెక్ చేస్తామని తెలిపారు. అలానే సివిల్‌ దుస్తుల్లో వచ్చి ఏమైనా చేస్తామంటే ఎలా అని ప్రశ్నించారు. తోపులాట ఘటనలో గాయపడ్డారని చెబుతున్న కానిస్టేబుల్‌.. పోలీసు దస్తుల్లో లేరని తెలిపారు. యూనిఫాంలో లేనప్పుడు పోలీసని ఎలా గుర్తిస్తారని తెలిపారు.

అయితే ఇంటెలిజన్స్, ఎస్‌బీ పోలీసులకు యూనిఫాం ఉండదని పబ్లిక్ ప్రాసిక్యూటర్ చెప్ప్పారు. అప్పుడు న్యాయమూర్తి స్పందిస్తూ.. అలా అయితే వారు లా అండ్‌ ఆర్డర్‌ విధులు ఎలా నిర్వర్తిస్తారని ప్రశ్నించారు. ఇరుపక్షాల వాదనలు విన్న న్యాయమూర్తి తదుపరి విచారణను వచ్చే నెల అనగా సెప్టెంబర్ 8కి వాయిదా వేశారు.