క్రికెట్ మాస్టర్ ధోనీకి ఈ టాలెంట్ ఉందని ఊహించారా?

మహేంద్ర సింగ్ ధోనీ (MS Dhoni).. భారత క్రికెట్‌లో ‘కెప్టెన్ కూల్’గా పేరుగాంచిన వ్యక్తి. మైదానంలో ఎంత ఉత్కంఠభరిత పరిస్థితులు వచ్చినా.. లేదా మ్యాచ్ గెలుపోటములు అతి సున్నితంగా ఉన్నా.. ఆయన ముఖంలో మాత్రం ఎలాంటి కంగారు కనిపించదు. వికెట్ల వెనకనుండే తన జట్టును విజయం వైపు నడిపించేందుకు చాకచక్యంగా ఎత్తుగడలు వేస్తుంటాడు. మైదానంలో కానీ, డ్రెస్సింగ్ రూమ్‌లో కానీ చిరాకు, కోపం కనబడదు. కానీ, అలాంటి శాంతస్వభావం ఉన్న ధోనీలో కూడా ఓ ఆగ్రహభరిత కోణం దాగి ఉందని చెబుతున్నారు. ఆయనతో కలిసి ఆడిన మోహిత్ శర్మ తన అనుభవాన్ని తాజాగా ఓ ఇంటర్వ్యూలో పంచుకున్నారు.ధోనీ కెప్టెన్‌గా ఉన్నప్పుడు మోహిత్ శర్మ (Mohit Sharma) చెన్నై సూపర్ కింగ్స్ తరఫున నాలుగేళ్లు ఆడాడు. భారత జట్టులోనూ ఆయనతో కలిసి ప్రదర్శన ఇచ్చాడు. ఒకసారి ఛాంపియన్స్ లీగ్ టీ20లో కోల్‌కతా నైట్ రైడర్స్‌తో మ్యాచ్ జరుగుతున్నప్పుడు ఆసక్తికర సంఘటన చోటుచేసుకుంది. బౌలింగ్ కోసం ధోనీ ఈశ్వర్ పాండేను పిలిచాడు. కానీ మోహిత్, తాన్నే పిలిచారని అనుకుని బౌలింగ్ ఎండ్‌కు పరుగెత్తాడు. అంపైర్ కూడా అదే అనుకున్నారు. మరోవైపు ఈశ్వర్ పాండే కూడా అదే ఎండ్‌కి చేరుకోవడంతో చిన్న గందరగోళం నెలకొంది. దీంతో ఆ ‘కూల్ కెప్టెన్’ ఒక్కసారిగా మండిపోయి మోహిత్‌పై గట్టిగా అరిచాడట.తర్వాతి ఓవర్ వేసిన మోహిత్ యూసఫ్ పఠాన్ వికెట్ తీసినా.. ధోనీ కోపం మాత్రం వెంటనే చల్లారలేదని ఆయన చెబుతున్నారు. ధోనీ కెప్టెన్సీలోనే మోహిత్ శర్మ జట్టులోకి వచ్చాడు. 2013 నుంచి 2015 మధ్య సీఎస్కే తరఫున బౌలింగ్‌లో మంచి ప్రదర్శన ఇచ్చాడు. ఈ వ్యవధిలో 47 మ్యాచ్‌ల్లో 57 వికెట్లు పడగొట్టాడు. ఐపీఎల్ 2014లో అత్యధిక వికెట్లు తీసి పర్పుల్ క్యాప్ గెలుచుకున్నాడు. 2015 వన్డే ప్రపంచకప్ జట్టులో కూడా ఆయనకు స్థానం లభించింది.