అమెరికాపై చైనాతో కలిసి రష్యా, ఉత్తర కొరియా కలిసి కుట్రలు? ట్రంప్ సంచలన ఆరోపణలు

చైనాతో కలిసి రష్యా, ఉత్తర కొరియాలు అమెరికాపై కుట్రలు చేస్తున్నాయని డొనాల్డ్ ట్రంప్ సంచలన ఆరోపణలు చేశారు. పుతిన్ తీరు తనను తీవ్ర నిరాశకు గురిచేసిందని, వాషింగ్టన్‌పై మూడు దేశాలూ కుట్ర చేస్తున్నాయని ధ్వజమెత్తారు. బీజింగ్ సైనిక పరేడ్‌లో రష్యా అధ్యక్షుడు వ్లాదిమిర్ పుతిన్, ఉత్తర కొరియా నేత కిమ్ జోంగ్ ఉన్‌లు చైనా అధ్యక్షుడు షీ జిన్‌పింగ్‌తో కలిసి అమెరికాపై "కుట్ర" పన్నుతున్నారని ట్రంప్ చేసిన వ్యాఖ్యలపై మాస్కో స్పందించింది. ట్రంప్ ఆరోపణలను తోసిపుచ్చిన రష్యా.. ఇవి సత్యదూరమైనవని స్పష్టం చేసింది. అంతేకాదు, ట్రంప్ మాటలు నవ్వుకునేలా ఉన్నాయని, ఆయన ఆరోపించినట్టు పుతిన్ ఎటువంటి కుట్రలు చేయడం లేదని తేల్చిచెప్పింది.

ఇక, తన సొంత సామాజిక మాధ్యమం ట్రూత్ సోషల్‌లో పోస్ట్ పెట్టిన అమెరికా అధ్యక్షుడు డొనాల్డ్ ట్రంప్.. రెండో ప్రపంచ యుద్ధంలో చైనా స్వాతంత్య్రాన్ని రక్షించడం కోసం అమెరికన్లు భారీ మూల్యం చెల్లించాల్సి వచ్చిందని అన్నారు. ‘‘చైనాకు అమెరికా అందించిన అపారమైన మద్దతు, 'స్నేహపూర్వకంగా లేని విదేశీ ఆక్రమణదారుడి నుంచి స్వేచ్ఛను పొందేందుకు అమెరికన్లు రక్తాన్ని చిందించారా? లేదా? అనేది జిన్‌పింగ్ సమాధానం చెప్పాల్సిన ప్రశ్న. విజయం, కీర్తి కోసం చైనా పోరాటంలో చాలా మంది అమెరికన్లు మరణించారు’’ అని ట్రంప్ వ్యాఖ్యానించారు.,

‘‘వారి ధైర్యం, త్యాగాలకు సరైన గౌరవం దక్కుతుందని, గుర్తుంచుకుటారని నేను ఆశిస్తున్నాను! చైనా అధ్యక్షుడు షీ జిన్‌పింగ్, అద్బుతమైన చైనా ప్రజలు వేడుకలు గొప్పగా జరుపుకోవాలని కోరుకుంటున్నాను’’ అని పోస్ట్ పెడుతూ...‘‘ అమెరికాకు వ్యతిరేకంగా కుట్ర పన్నుతున్నందున వ్లాదిమిర్ పుతిన్, కిమ్ జోంగ్ ఉన్‌లకు నా హృదయపూర్వక అభినందనలు తెలియజేయండి’’ అంటూ డొనాల్డ్ ట్రంప్ ముగించారు.

ఈ ఆరోపణలపై రష్యా అధికార టెలివిజన్ అడిగిన ప్రశ్నకు క్రెమ్లిన్ విదేశాంగ శాఖ అధికారి యూరీ ఉషకోవ్ ఖండించారు. ‘ఎవరూ కుట్రలు పన్నడం లేదు, ఎవరూ ఏమీ కుట్రలు చేయడం లేదు, ఎలాంటి కుట్రలు లేవని నేను చెప్పాలనుకుంటున్నాను అని ఉషకోవ్ అన్నారు. ‘ట్రంప్ వ్యంగ్యంగా మాట్లాడి ఉండొచ్చు.. ఎవరికీ అలాంటి ఆలోచన కూడా లేదు.. ఈ ముగ్గురు నాయకులలో ఎవరికీ అలాంటి ఆలోచన లేదు’ అని స్పష్టం చేశారు. ‘ప్రస్తుతం అమెరికా అధ్యక్షుడు యంత్రాంగం, ట్రంప్ వ్యక్తిగతంగా పోషిస్తోన్న పాత్ర

‘ప్రస్తుత అంతర్జాతీయ పరిస్థితిలో అమెరికా ప్రస్తుత యంత్రాంగం, అధ్యక్షుడు ట్రంప్ వ్యక్తిగతంగా పోషించిన పాత్రను అందరూ అర్థం చేసుకున్నారని నేను చెప్పగలను’ అని చురకలు అంటించారు. సైనిక పెరేడ్‌ను ఉద్దేశించి మాట్లాడిన జిన్‌పింగ్.. ప్రపంచం ప్రస్తుతం శాంతా; యుద్ధమా? అనేది పరిస్థితి ఎదుర్కొంటోందని వ్యాఖ్యలు చేసిన అనంతరం.. ట్రంప్ సోషల్ మీడియాలో పోస్ట్ పెట్టడం గమనార్హం.