తగ్గనున్న సినిమా టికెట్ ధరలు.. పాప్‌కార్న్‌‌పైనా ఊరట,,,జీఎస్టీ కొత్త రేట్లు

శుక్రవారం ఆఫీస్ డ్యూటీ అయిపోయింది. వీకెండ్ వచ్చేస్తుంది. సరదాగా భార్యాపిల్లలతో కలిసి సినిమా చూడాలని వెళ్లాలనుకుంటున్నారా? టికెట్ రేట్లు ఎక్కువగా ఉన్నాయని ఆగిపోతున్నారా? మళ్లీ సినిమాకు వెళ్తే బ్రేక్‌లో పాప్‌కార్న్ తీసుకోవాలి కదా.. ఈ రేట్లు ఎక్కువగా ఉన్నాయని ఆలోచిస్తున్నారా..? అయితే ఇది ఆలోచించేముందు ఒక్కసారి ఇది తెలుసుకోండి. వీటికి సంబంధించి రేట్లు కాస్త అందుబాటులోకి రానున్నాయి. అవును.. 56వ జీఎస్టీ మండలి సమావేశంలో కీలక నిర్ణయాలు తీసుకుంది కేంద్ర ప్రభుత్వం. చాలా వరకు నిత్యావసరాల ధరలు తగ్గే దిశగా.. జీఎస్టీ రేట్లు తగ్గించింది. ఇక్కడే సినిమా టికెట్లు, పాప్‌కార్న్‌కు సంబంధించి కూడా జీఎస్టీ రేట్లను ప్రకటించింది. ఈ సెప్టెంబర్ 22 నుంచి ఇది అమలవుతుందని గుర్తుంచుకోవాలి.

>> రూ. 100 లోపు సినిమా టికెట్ ధరలు భారీగా తగ్గనున్నాయి. ఇక్కడ ప్రస్తుతానికి 12 శాతం జీఎస్టీ అమల్లో ఉండగా.. సెప్టెంబర్ 22 నుంచి ఇది 5 శాతానికి తగ్గనుంది. అంటే ఇప్పుడు టికెట్ ధర రూ. 100 ఉంటే జీఎస్టీతో కలిపి అది రూ. 112 అవుతుంది. 5 శాతం జీఎస్టీతో ఇది రూ. 105 అవుతుంది. ఇక ఫ్యామిలీలో ఐదుగురికి టికెట్ తీసుకుంటే.. ఇక్కడ ఎక్కువ ఆదా అవుతుందని చెప్పొచ్చు.

చాలా వరకు సింగిల్ స్క్రీన్ థియేటర్లు, చిన్న చిన్న పట్టణాల్లో థియేటర్లలో ధరలు ఈ స్థాయిలో ఉంటాయి కాబట్టి ఇక్కడ ఈ సినిమా హాళ్లకు నేరుగా ప్రయోజనం చేకూర్చే దిశగా నిర్ణయం తీసుకుంది. అయితే ఇదే సమయంలో రూ. 100 కుపైగా టికెట్ రేట్లు ఉంటే.. అక్కడ యథావిధిగా 18 శాతం జీఎస్టీ అమల్లో ఉంటుంది. ఈ రేట్లు ఎక్కువగా మల్టీప్లెక్స్‌లు, ప్రీమియం థియేటర్లలోనే ఉంటాయని చెప్పొచ్చు. మల్టీప్లెక్స్‌ల రాకతో ఆదరణ కోల్పోయిన సింగిల్ స్క్రీన్ థియేటర్లకు ఇది ఊరట కల్పించే అవకాశం ఉంది. జనం.. సినిమాలు చూసేందుకు.. ఖర్చుల్ని తగ్గించుకునేందుకు ఇటుచూసే అవకాశం ఉంటుంది.

పాప్‌కార్న్‌ జీఎస్టీ డిబేట్‌కు చెక్..

>> ఇక సినిమా అంటే పాప్‌కార్న్ గురించి కూడా చెప్పుకోవాలి. ఇంటర్వెల్‌లో ఇది లేనిదే సినిమా పూర్తి కాదు. అయితే చాలా వరకు పాప్‌కార్న్ రేట్లు సినిమా హాళ్లలో ఎక్కువగా ఉంటాయి. ఇక గతంలో పాప్‌కార్న్ జీఎస్టీపై పెద్ద వివాదమే నడిచింది. నిర్మలా సీతారామన్.. ఈ పాప్‌కార్న్‌పై వేర్వేరు జీఎస్టీ శ్లాబ్స్ ప్రకటించగా.. మీమ్స్ టాపిక్ అయింది.

గతంలో సాల్టెడ్, బటర్ కలిపిన పాప్‌కార్న్‌ను విడిగా (లూజ్) అమ్మితే 5 శాతం; ప్యాకేజ్డ్‌పాప్‌కార్న్‌పై 12 శాతం జీఎస్టీ, చక్కెర లేదా స్వీట్ కలిపిన క్యారమెల్ పాప్‌కార్న్ (ప్యాకేజ్డ్) అయితే 18 శాతం జీఎస్టీ ఇలా వేర్వేరుగా ఉండేది. ఇంకా క్యారమెల్ పాప్‌కార్న్ విడిగా అమ్మితే ఎంత జీఎస్టీ అనేది అప్పట్లో ప్రస్తావించలేదు. దీంతో ఒక్క పాప్‌కార్న్‌పై ఇన్ని రకాల శ్లాబులేంటి అని చర్చ జరిగింది. ఇప్పుడు దీనిపై స్పష్టత వచ్చింది. 12 శాతం జీఎస్టీని మొత్తంగా ఎత్తేయగా.. ఇప్పుడు ప్యాకేజ్డ్, విడిగా అమ్మే సాల్టెడ్ పాప్‌కార్న్‌ను 5 శాతం పరిధిలోకి తెచ్చింది. ఇక క్యారమెల్ పాప్‌కార్న్ 18 శాతం జీఎస్టీ పరిధిలోకి వచ్చింది. ఇక్కడ లూజ్, ప్యాకేజ్డ్ తేడా ఏం ఉండదు. షుగర్ కలిపారా లేరా అనేదే వర్తిస్తుంది. ఇక్కడ 12 శాతం జీఎస్టీ తగ్గడం ఊరట కలిగించే అంశం.