గ్రామాల్లో నగ్నంగా పురుషులు.. మహిళలను పొదల్లోకి లాక్కెళ్తూ

ఉత్తర్‌ప్రదేశ్‌లో న్యూడ్ గ్యాంగ్ సంచలనం రేపుతోంది. మీరట్ పట్టణానికి సమీపంలోని పలు గ్రామాల్లో పలువురు పురుషులు.. నగ్నంగా తిరుగుతున్నారు. గ్రామాల్లోకి చొరబడి.. మహిళ కనిపిస్తే చాలు.. వారిని చెట్ల పొదలు, ఎవరూ లేని ప్రాంతాలకు బలవంతంగా తీసుకెళ్లి దాడి చేస్తున్నారు. ఈ న్యూడ్ గ్యాంగ్ మీరట్‌ పరిసరాల్లో తీవ్ర చర్చనీయాంశంగా మారారు. దీంతో అక్కడి ప్రజలు భయాందోళనకు గురవుతున్నారు. ఇప్పటివరకు 4 సార్లు ఈ న్యూ్డ్ గ్యాంగ్ పలు గ్రామాల మహిళలపై దాడులు చేసినట్లు స్థానికులు పేర్కొన్నారు.

ఈ నేపథ్యంలోనే భారాలా అనే గ్రామంలో ఒక మహిళ ఒంటరిగా ఆఫీస్‌కు వెళ్తుండగా.. ఎవరూ లేని ప్రాంతంలో కొందరు నగ్నంగా ఉన్న యువకులు ఆమెను పక్కనే ఉన్న పొలంలోకి లాక్కెళ్లేందుకు ప్రయత్నించారని భారాలా గ్రామస్థులు వెల్లడించారు. ఆ న్యూడ్ గ్యాంగ్‌ను చూసి.. ఆ మహిళ అరుపులు, కేకలు వేయడంతో.. ఆ పురుషులు అక్కడి నుంచి పారిపోయినట్లు తెలిపారు. ఈ క్రమంలోనే ఆ న్యూడ్ గ్యాంగ్‌ను గుర్తించేందుకు.. స్థానికులు ఆ ప్రాంతంలో వెతికినా ఎవరూ దొరకలేదు. ఇక తనను తీసుకెళ్లేందుకు ప్రయత్నించిన పురుషులు ఒంటిపై ఎలాంటి బట్టలు లేకుండా నగ్నంగా ఉన్నారని బాధిత మహిళ వెల్లడించింది.

ఇక ఇతర గ్రామంలో మరో ముగ్గురు మహిళలకు ఇలాంటి అనూహ్య సంఘటనే ఎదురైందని.. అయితే భయం, సమాజంలో అవమాన భారంతో ఆ విషయాన్ని బయటికి వెల్లడించలేదని పేర్కొన్నారు. రోజురోజుకూ ఈ న్యూడ్ గ్యాంగ్ ఘటనలు పెరిగిపోతుడంటంతో బాధిత గ్రామాల ప్రజలు.. పోలీసులను ఆశ్రయించారు. భారాలా, దౌరాలా సహా పలు గ్రామస్థుల ఫిర్యాదుతో రంగంలోకి దిగిన పోలీసులు.. న్యూడ్‌ గ్యాంగ్‌ను చూసినట్లు చెప్పడంతో పోలీసులు కేసు నమోదు చేసుకుని దర్యాప్తు మొదలుపెట్టారు.

దీంతో పోలీసులు.. డ్రోన్లను ఉపయోగించి.. న్యూడ్ గ్యాంగ్ కోసం గాలింపు చేపడుతున్నారు. అయితే ఇప్పటివరకు ఎవరినీ అనుమానితులుగా గుర్తించలేదని పోలీసులు వెల్లడించారు. అయితే ఆయా గ్రామాలకు దగ్గర ఉన్న అటవీ ప్రాంతంలో ఈ న్యూడ్ గ్యాంగ్ ముఠాలు ఉన్నాయా అనేది తెలుసుకునేందుకు డ్రోన్‌లను ఉపయోగిస్తున్నట్లు తెలిపారు. ఇలాంటి ఘటనలు మళ్లీ జరగకుండా ఆయా గ్రామాల్లో పోలీసులను మోహరించినట్లు పేర్కొన్నారు.