గొడవలు పెట్టేవాళ్లే శాంతి బహుమతులు కోరుకుంటారు: ట్రంప్‌పై సల్మాన్ సెటైర్

 ప్రముఖ టీవీ రియాలిటీ షో బిగ్ బాస్ 19 తాజా ఎపిసోడ్‌లో.. హోస్ట్ సల్మాన్ ఖాన్ కంటెస్టెంట్లపై గట్టిగా విరుచుకుపడ్డారు. ముఖ్యంగా కొందరు శాంతిని కోరుకుంటున్నామని చెప్పి.. ఇంట్లో గొడవలకు కారణమవుతున్న తీరుపై ఆయన ఆగ్రహం వ్యక్తం చేశారు. ఈ సందర్భంలోనే సల్మాన్ ఖాన్ ప్రస్తావించిన ఒక వ్యాఖ్య ఇప్పుడు దేశవ్యాప్తంగానే కాదు అంతర్జాతీయ స్థాయిలో కూడా చర్చనీయాంశంగా మారింది. ఆ వ్యాఖ్య అగ్రరాజ్యం అమెరికా అధ్యక్షుడు డొనాల్డ్ ట్రంప్‌పై చేసిన పరోక్ష విమర్శగా అందరూ భావిస్తున్నారు.

బిగ్ బాస్ షో ప్రారంభమైన తొలి వారం నుంచే మంచి టీఆర్పీ రేటింగ్స్‌ను సొంతం చేసుకుంది. ఈ వారాంతపు ఎపిసోడ్‌లో.. ఎప్పటిలాగే సల్మాన్ తనదైన శైలిలో ఇంటి సభ్యులకు హితబోధ చేశారు. వారి తప్పులను సున్నితంగా ఎత్తిచూపారు. అయితే ఆయన హౌస్‌మేట్స్‌ను మందలిస్తూ.. ఒకానొక సమయంలో పరోక్షంగా ట్రంప్‌ను లక్ష్యంగా చేసుకున్నారు. గొడవలు సృష్టించేవాళ్లే శాంతి బహుమతులు కోరుకుంటారని సల్మాన్ వ్యాఖ్యానించారు.

సల్మాన్ ఎవరి పేరు చెప్పకుండానే.. “ఈ ప్రపంచంలో ఏం జరుగుతోంది? ఎవరు ఎక్కువ గొడవలు పెడుతున్నారో వాళ్లే శాంతి బహుమతి కావాలని కోరుకుంటున్నారు” అని వ్యాఖ్యానించారు. ఈ వ్యాఖ్యను విన్నవారందరికీ అది డొనాల్డ్ ట్రంప్‌ను ఉద్దేశించి చేసినదిగా అర్థమైంది. గత కొన్ని నెలలుగా ట్రంప్ తన మధ్యవర్తిత్వంతో భారత్-పాకిస్థాన్, ఇజ్రాయెల్-పాలస్తీనా వంటి అంతర్జాతీయ వివాదాలను పరిష్కరించానని పలుమార్లు చెప్పుకున్నారు. మొత్తంగా ఏడు యుద్ధాలను ఆపానని.. అందుకోసం తనకు నోబెల్ శాంతి బహుమతి అందించాలని కోరారు. కానీ ఆ దేశాలు మాత్రం ట్రంప్ వాదనలను తోసిపుచ్చాయి. అయినప్పటికీ ఆయన మద్దతుదారులు మాత్రం నోబెల్ శాంతి బహుమతికి ట్రంప్ అర్హుడని వాదిస్తున్నారు. ఈ నేపథ్యంలో సల్మాన్ వ్యాఖ్య ప్రాధాన్యతను సంతరించుకుంది.

సల్మాన్ ఈ విధంగా ట్రంప్‌ను లక్ష్యంగా చేసుకున్న వీడియో క్లిప్ సోషల్ మీడియాలో విపరీతంగా వైరల్ అవుతోంది. సల్మాన్‌లోని ఈ కొత్త కోణాన్ని చూసి నెటిజన్లు ఆశ్చర్యపోయారు. చాలామంది ఆయన వాగ్ధాటికి నవ్వుకున్నారు. “సల్మాన్ ఖాన్ వార్తలు కూడా చూస్తారా? నేను అసలు ఊహించలేదు” అని ఒక అభిమాని ట్వీట్ చేశారు. రెడ్డిట్‌లో.. “సల్మాన్ భాయ్ బిగ్‌బాస్‌లో ట్రంప్‌పై సెటైర్ వేశారు” అనే క్యాప్షన్‌తో ఈ వీడియో క్లిప్‌ను షేర్ చేశారు. “భాయ్ అద్భుతమైన పని చేశారు” అని ఒక నెటిజన్ కామెంట్ చేయగా.. “ట్రంప్ ఎలా స్పందిస్తారో చూడాలి” అని మరొకరు జోక్ చేశారు.

సల్మాన్ ఖాన్ ప్రస్తుతం బిగ్ బాస్ 19 వీకెండ్ కా వార్ ఎపిసోడ్స్ హోస్ట్‌గా వ్యవహరిస్తున్నారు. ఈ షో ప్రారంభమైనప్పటి నుంచి మంచి ఆదరణ పొందుతోంది. బిగ్ బాస్ షో గడిచిన వారాల్లో కంటెస్టెంట్లలో ఒకరైన ఫర్హానా భట్‌కు సల్మాన్ గట్టిగా క్లాస్ పీకారు. శాంతి స్థాపన గురించి మాట్లాడే బదులు.. గొడవలు పెట్టడం మానేయమని హితవు పలికారు. ఇలాంటి సందర్భంలోనే ఆయన ప్రపంచ నేతలను కూడా టార్గెట్ చేయడం సల్మాన్ ఎంత కచ్చితంగా షో నిర్వహిస్తారో చెప్పడానికి నిదర్శనం. అంతేకాకుండా సల్మాన్‌కు సమాజంపై, ప్రపంచ వ్యవహారాలపై ఎంత అవగాహన ఉందో కూడా ఈ సంఘటన నిరూపించింది. సాధారణంగా బాలీవుడ్ ప్రముఖులు రాజకీయాల గురించి మాట్లాడటానికి అంతగా ఆసక్తి చూపరు. కానీ సల్మాన్ మాత్రం నిర్భయంగా తన అభిప్రాయాన్ని పరోక్షంగా వెల్లడించారు.