పాకిస్థాన్ క్రికెట్ గ్రౌండ్‌పై బాంబు దాడి.. ఒకరు మృతి, పలువురికి గాయాలు

పాకిస్థా ఖైబర్ పఖ్తుంఖ్వా ప్రావిన్ససులోని ఓ క్రీడా మైదానంపై జరిగిన ఉగ్రదాడి తీవ్ర సంచలనం సృష్టించింది. బజౌర్ జిల్లాలోని ఖార్ తెహ్సిల్‌లో ఉన్న కౌసర్ క్రికెట్ గ్రౌండులో జరుగుతున్న ఒక క్రికెట్ మ్యాచ్‌పై ఉగ్రవాదులు బాంబు దాడికి పాల్పడ్డారు. ఈ దారుణమైన ఘటనలో ఒకరు మరణించగా.. పలువురు తీవ్ర గాయాలపాలయ్యారు. ఈ ఘటన జరిగిన వెంటనే మైదానంలో గందరగోళ పరిస్థితులు ఏర్పడ్డాయి. విషయం గుర్తించిన స్థానికులు వెంటనే క్షతగాత్రులను ఆస్పత్రికి తరలించగా.. చికిత్స కొనసాగుతోంది. భద్రతా బలగాలు, స్థానిక అధికారులు ఘటనా స్థలానికి చేరుకుని విచారణ చేపట్టారు.

శనివారం రోజున కౌసర్ క్రికెట్ గ్రౌండులో క్రీడాకారులు మ్యాచ్ ఆడుతున్నారు. దీన్ని చూసేందుకు అనేక మంది క్రికెట్ గ్రౌండ్‌కు చేరుకుని వీక్షిస్తున్నారు. ఈ సమయంలోనే ఒక్కసారిగా పేలుడు సంభవించింది. పెద్ద ఎత్తున శబ్దం రావడంతో అక్కడనున్న వాళ్లంతా ఉలిక్కిపడ్డారు. అయితే ఇది ఐఈడీ ద్వారా జరిగిన లక్షిత దాడి అని బజౌర్ జిల్లా పోలీస్ అధికారి వాకస్ రఫీక్ ధృవీకరించారు. క్రీడా మైదానంలో సాధారణంగా ప్రజలు విశ్రాంతి తీసుకునే ప్రదేశంలో ఈ పేలుడు జరిగిందని తెలిపారు. ఈ ఘటన జరిగిన వెంటనే మైదానంలో హాహాకారాలు, అరుపులు, భయంతో పరుగులు తీస్తున్న దృశ్యాలు కనిపించాయి. తీవ్ర రక్తస్రావంతో కొంతమంది మైదానంలో కుప్పకూలిపోయారు.

ఈ దాడికి ఏ ఉగ్రవాద సంస్థ బాధ్యత వహించినట్లు అధికారికంగా ప్రకటించకపోయినప్పటికీ.. పోలీసులు మాత్రం ఇది ఉగ్రవాదుల చర్య అని తెలిపారు. ఈ ప్రాంతంలో ఉగ్రవాదుల అణిచివేత కోసం భద్రతా బలగాలు ఇటీవల ప్రారంభించిన ఆపరేషన్ సర్బకాఫ్ నేపథ్యంలో ఈ దాడి జరిగినట్లు అనుమానాలు వ్యక్తం అవుతున్నాయి. ఆపరేషన్ సర్బకాఫ్‌కు ప్రతీకారంగానే ఈ దాడికి పాల్పడ్డారని పోలీసులు భావిస్తున్నారు.

ఈ బాంబు దాడికి ఒక వారం ముందు కూడా ఈ ప్రావిన్స్‌లో రెండు వేర్వేరు దాడులు జరిగాయి. ఇందులో ఒకదానిలో కోహాట్ జిల్లాలో పోలీసులు, ఉగ్రవాదులకు మధ్య జరిగిన ఎదురుకాల్పుల్లో ముగ్గురు ఉగ్రవాదులు హతమయ్యారు. అదే రోజు లచి తెహ్సిల్లోని దర్‌మలక్ పోలీసు చెక్ పోస్ట్ సమీపంలో పోలీసు వాహనంపై గుర్తు తెలియని వ్యక్తులు మెరుపుదాడికి పాల్పడగా ఒక పోలీసు కానిస్టేబుల్ మరణించారు. ఈ ప్రాంతంలో భద్రతా బలగాలు మిలిటెంట్ల కార్యకలాపాలను ఎదుర్కొనేందుకు నిరంతరం ప్రయత్నిస్తున్నాయి.