మాస్కోకు రాను.. నువ్వే కీవ్‌కు రా: చర్చలకు రమ్మన్న పుతిన్‌తో జెలెన్‌స్కీ

ఉక్రెయిన్-రష్యా దేశాల మధ్య చాలా రోజులుగా యుద్ధం కొనసాగుతున్న విషయం అందరికీ తెలిసిందే. అయితే శాంతి చర్చల కోసం మాస్కోకు రమ్మంటూ తాజాగా రష్యా అధ్యక్షుడు వ్లాదిమిర్ పుతిన్.. ఉక్రెయిన్ అధ్యక్షుడు వోలోడిమిర్ జెలెన్‌స్కీకి ఆహ్వానం పంపారు. అయితే ఈ ప్రతిపాదనను జెలెన్‌స్కీ నిర్మొహమాటంగా తిరస్కరించారు. నేను అక్కడికి రాను, కావాలంటే మీరే కీవ్‌కు రావాలంటూ సూచించారు. అంతేకాకుండా ఉక్రెయిన్‌పై నిత్యం క్షిపణి, బాంబు దాడులు చేస్తున్న 'ఉగ్రవాద దేశం' రాజధానికి తాను వెళ్లలేనని జెలెన్‌స్కీ అమెరికన్ మీడియాకు ఇచ్చిన ఇంటర్వ్యూలో వెల్లడించారు.

"పుతిన్‌కు నిజంగా చర్చలు జరపాలని ఉంటే.. ఆయన కీవ్‌కు రావచ్చు" అని జెలెన్‌స్కీ యూరోన్యూస్‌కు ఇచ్చిన ఇంటర్వ్యూలో తెలిపారు. రష్యా-ఉక్రెయిన్ అధ్యక్షుల మధ్య ముఖాముఖి చర్చలు జరిపేందుకు అమెరికా అధ్యక్షుడు డొనాల్డ్ ట్రంప్ గత కొంతకాలంగా కృషి చేస్తున్నారు. గత నెల అలస్కాలో ట్రంప్, పుతిన్‌ల మధ్య జరిగిన శిఖరాగ్ర సమావేశంలో ఇరువురు నాయకుల మధ్య ద్వైపాక్షిక లేదా త్రైపాక్షిక సమావేశం జరిపేందుకు ట్రంప్ ప్రధాన లక్ష్యంగా పెట్టుకున్నారు.

 ఆ తర్వాత ట్రంప్ మాట్లాడుతూ.. ఉక్రెయిన్ అధ్యక్షుడు వాషింగ్టన్‌‌ను సందర్శించి.. యూరోపియన్ నాయకులతో మాట్లాడిన తర్వాత పుతిన్‌తో సమావేశం అవుతారని చెప్పారు. అయితే రష్యా అదనపు షరతులను విధిస్తూ ఈ నిర్ణయాన్ని నిలిపివేస్తోంది. అదే సమయంలో ఉక్రెయిన్ నగరాలపై షెల్లింగ్‌ను పెంచుతోంది. ఈ వారంలో పుతిన్.. జెలెన్‌స్కీతో మాస్కోలో సమావేశం కావడానికి 'సిద్ధంగా' ఉన్నట్లు తెలిపారు. ఈ ఆహ్వానం వెనుక సమావేశం జరగకుండా నిరోధించే ఒక వ్యూహం ఉందని జెలెన్‌స్కీ అభిప్రాయపడ్డారు.

గురువారం పారిస్‌లో జరిగిన శిఖరాగ్ర సమావేశం తర్వాత జెలెన్‌స్కీ మాట్లాడుతూ.. "ఒకవేళ మీరు సమావేశం జరగకూడదని భావిస్తే.. నన్ను మాస్కోకు ఆహ్వానించాలి" అని వ్యాఖ్యానించారు. అయినప్పటికీ రష్యా నాయకత్వం వ్యక్తిగత సమావేశం కోసం ఏవైనా అవకాశాలను ప్రస్తావించడం కూడా ఒక గొప్ప విజయమే అని ఆయన అన్నారు. ఈ నెల సెప్టెంబర్ మొదటి ఐదు రోజుల్లో రష్యా ఉక్రెయిన్‌పై 1300 కంటే ఎక్కువ డ్రోన్లు, దాదాపు 900 గైడెడ్ బాంబులు, సుమారు 50 క్షిపణులను ప్రయోగించిందని జెలెన్‌స్కీ శనివారం సోషల్ మీడియా వేదికగా వెల్లడించారు. ఈ దాడులు దేశంలోని 14 ప్రాంతాలలో జరిగాయని యూరోన్యూస్ పేర్కొంది.

పుతిన్ ఆహ్వానాన్ని జెలెన్‌స్కీ తిరస్కరించడం ఉక్రెయిన్ ఆత్మవిశ్వాసం, సార్వభౌమత్వానికి ప్రతీకగా నిలుస్తోంది. రష్యా చేస్తున్న దాడులకు తలవంచకుండా.. స్వదేశంలోనే నిలబడి పోరాడతామని ఈ చర్య ద్వారా జెలెన్‌స్కీ ప్రపంచానికి సందేశం ఇచ్చారు. ఈ పరిణామం భవిష్యత్తులో శాంతి చర్చల దిశను ఎలా మారుస్తుందో చూడాలి.