హిట్‌మ్యాన్ ఫిట్‌నెస్ ట్రాన్స్‌ఫర్మేషన్ సీక్రెట్ ఇదే! ఆ డ్రగ్స్ అస్సలు వాడలేదు!!

టీమిండియా లెజెండ్రీ బ్యాటర్, వన్డే కెప్టెన్ రోహిత్ శర్మ ఇటీవల తన ట్రాన్స్‌ఫర్మేషన్‌తో అందర్నీ ఆశ్చర్యపరిచాడు. ఫిట్‌నెస్ కారణంగా ఎన్నో విమర్శలు ఎదుర్కొన్న హిట్‌మ్యాన్ ఇప్పుడు తన బాడీతో అందరి నోళ్లూ మూయించాడు. చూస్తూ చూస్తుండగానే భారీగా తగ్గి టీమిండియా ఫిట్‌నెస్ టెస్ట్ యో - యోను కంప్లీట్ చేశాడు. అయితే, రోహిత్ కష్టపడి డైట్, ఫిట్‌నెస్ వర్కవుట్స్‌తోనే తగ్గాడని.. ఫ్యాషన్ డ్రగ్స్ వల్ల కాదంటూ సెలబ్రిటీ న్యూట్రిషనిష్ట్ ర్యాన్ ఫెర్నాండో చెప్పాడు.

ప్రపంచవ్యాప్తంగా జీఎల్‌పీ-1 మందులు బరువు తగ్గే "ట్రెండ్"గా మారాయి. అమెరికా టెన్నిస్ స్టార్ సెరెనా విలియమ్స్ ప్రసవానంతరం ఈ మందులు వాడారని, కానీ అది వైద్యుల సలహాతోనే అని ఫెర్నాండో వివరించారు. అయితే రోహిత్ శర్మ లేదా యువరాజ్ సింగ్ మాత్రం ఆ మార్గాన్ని ఎంచుకోలేదంటూ ఆయన స్పష్టం చేశాడు.

"నేను రోహిత్ శర్మ డైట్‌పై పని చేశాను. ఆయన అద్భుతమైన ఫిట్‌నెస్‌ని చూపించారు. యో-యో టెస్ట్‌ను అత్యుత్తమ స్థాయిలో పాస్ అయ్యాడు. శరీర కాంపోజిషన్ కొందరికి ఆకర్షణీయంగా అనిపించకపోవచ్చు, కానీ ఆయన ఫలితాలు ఆయన ఫిట్‌నెస్‌నే చెబుతున్నాయి. శరీర పరిమాణం ఆయన శక్తికి, పవర్ గేమ్‌కు బలమైంది” అని ఫెర్నాండో అన్నాడు.

క్యాన్సర్‌ను జయించిన యువరాజ్ సింగ్ కూడా తన ట్రాన్స్‌ఫర్మేషన్‌ను సైంటిఫిక్ టెస్టింగ్ ద్వారా సాధించాడు. జీనెటిక్ టెస్టింగ్, మైక్రోబయోమ్ విశ్లేషణ, కస్టమైజ్డ్ డైట్‌తో మార్పు తెచ్చుకున్నా, తన ప్రియమైన పరాఠాలను మాత్రం వదల్లేదు.

“ఇవి ఫ్యాషన్ పిల్స్ కావు. వాడకం తప్పుగా జరిగితే కండరాలు తగ్గిపోవడం, పోషక లోపాలు, మానసిక ఆధారపడటం జరుగుతుంది. భారతదేశంలో పర్యవేక్షణ బలహీనంగా ఉండటం వల్ల జిమ్ ట్రైనర్లు కూడా విదేశాల నుంచి ఒజెంపిక్ తెప్పించమని క్లయింట్స్‌కు చెబుతున్నారు” అని ఫెర్నాండో హెచ్చరించాడు.

“నా ఆటగాళ్లకు ఇవి ఎప్పటికీ ఇవ్వను. ఇవి కండరాలను దెబ్బతీస్తాయి, ప్రదర్శనను తగ్గిస్తాయి. ఇది సైన్సుకీ, నైతికతకీ విరుద్ధం. క్రికెటర్ల శరీరంపై ట్రోలింగ్ చేయడం చాలా దారుణం. ఆటగాళ్లు చాలా సెన్సిటివ్‌గా ఉంటారు. ఎప్పటికప్పుడు బాడీని చూసుకోవాలి, బ్లడ్ టెస్టులు చేయించుకోండి. మీ గట్ మైక్రోబయోమ్ తెలుసుకోండి. మీ జెనటిక్ మ్యాప్‌ను అర్థం చేసుకోండి” అంటూ ఫెర్నాండో అందరికీ సూచనలు ఇచ్చాడు.