త్వరలోనే భారత్-అమెరికా వాణిజ్య చర్చలు ప్రారంభం

సుంకాల మేఘాలు కమ్ముకున్న వేళ... భారత్, అమెరికాల మధ్య ఆరో దశ వాణిజ్య చర్చలు త్వరలోనే ప్రారంభమవుతాయని, ఒప్పందం ఖరారు కానుందని విశ్వసనీయ వర్గాలు బుధవారం వెల్లడించాయి. వాస్తవానికి ఆగస్టు చివరి వారంలోనే ఈ చర్చలు జరగాల్సి ఉండగా.. భారత్‌పై ట్రంప్ 50 శాతం అదనపు సుంకాలు విధించడంతో వాయిదా పడ్డాయి. ఈ చర్చలు న్యూఢిల్లీలోనే జరిగే అవకాశం ఉందని పేర్కొన్నాయి. అమెరికా అధ్యక్షుడు డొనాల్డ్ ట్రంప్ సైతం భారత్‌తో వాణిజ్య చర్చలు పున:ప్రారంభమవుతాయని ట్రూత్ సోషల్‌లో హింట్ ఇచ్చారు. వాణిజ్య అడ్డంకులను అధిగమించడానికి ఇరు దేశాలూ చర్చలు కొనసాగిస్తున్నాయని ఆయన తెలిపారు.

‘‘రాబోయే వారాల్లో నా ఆప్త మిత్రుడు ప్రధాన మంత్రి నరేంద్ర మోదీతో మాట్లాడటానికి నేను ఎదురు చూస్తున్నాను. మన రెండు గొప్ప దేశాలకు విజయవంతమైన ముగింపుకు రావడంలో ఎటువంటి ఇబ్బంది ఉండదు ’’ అని ట్రంప్ పోస్ట్ పెట్టారు. వైట్‌హౌస్ వద్ద ట్రంప్ మాట్లాడుతూ.. భారత్-అమెరికా మైత్రిని చాలా ప్రత్యేకమైన సంబంధంగా పేర్కొంటూ.. మోదీ, తాను స్నేహితులుగా ఉంటామని నొక్కి చెప్పారు. ఈ ప్రకటన చేసిన కాసేపటికే ట్రంప్ తన సొంత సామాజిక మాధ్యమం ట్రూత్ సోషల్‌లో పై విధంగా స్పదించారు. ‘బాధపడాల్సిన పని లేదు. మనకు సందర్భానుసారంగా క్షణాలు మాత్రమే ఉంటాయి’ అని అన్నారు.

ట్రంప్ పోస్ట్‌పై కూడా ప్రధాని మోదీ సానుకూలంగా స్పందించారు. భారత్-అమెరికా ద్వైపాక్షిక సంబంధాలపై ట్రంప్ సానుకూల ఆలోచనలను తాను అభినందిస్తున్నానని, పరస్పరం స్పందిస్తున్నానని మోదీ అన్నారు. ధరలకు ప్రాధాన్యత ఇచ్చే వ్యవసాయం, డెయిరీ మార్కెట్లలోకి అమెరికా ప్రవేశాన్ని భారత్ నిరాకరించడంపై దీర్ఘకాలిక ప్రతిష్టంభన కొనసాగుతోంది. అయినప్పటికీ ట్రంప్ పదే పదే డిమాండ్ చేస్తున్నది ఏమిటంటే అక్టోబర్ గడువు నాటికి ఒక ఒప్పందం లేదా కనీసం ముందస్తు ఫ్రేమ్‌వర్క్ ఇరుపక్షాలు ఆశిస్తున్నాయని వర్గాలు తెలిపాయి.

అయితే, భారత్ వ్యవసాయం, పాడి పరిశ్రమపై తన వైఖరికి కట్టుబడి ఉండాలని కోరుకుంటుంది. చౌకైన అమెరికన్ వస్తువులు ఈ మార్కెట్లను నీరుగార్చడానికి, కోట్లాది మంది రైతులు, పశు పెంపకందారులు, మత్స్యకారులు, మహిళల జీవనోపాధిని దెబ్బతీస్తాయని భారత్ భావిస్తోంది. దీంతో పాటు మొక్కజొన్న, సోయాబీన్, యాపిల్, బాదం, ఇథనాల్ వంటి ఉత్పత్తులపై సుంకాలను తగ్గించాలనే ప్రతిపాదనలను కూడా భారతదేశం తోసిపుచ్చింది. దీనిని అనుమతించడం వల్ల భారత రైతులపై ప్రభావం పడుతుందని కేంద్రం వాదిస్తోంది. ఢిల్లీలోని ఎర్రకోట నుంచి చేసిన స్వాతంత్ర్య దినోత్సవ ప్రసంగంలో ‘రైతులు, మత్స్యకారులు, పశువుల పెంపకం దారులకు సంబంధించిన ఏదైనా హానికరమైన విధానానికి వ్యతిరేకంగా మోదీ గోడలా నిలబడుతున్నారు... భారత్ ఈ విషయంలో ఎప్పటికీ రాజీపడబోదని’ మోదీ ఖరాఖండీగా చెప్పారు.