క్యూ కడుతున్న కంపెనీలు.. ఆ జిల్లాలో 3 వేల ఎకరాల భూసమీకరణ

ఆంధ్రప్రదేశ్ ఆర్థిక రాజధానిగా విశాఖను తీర్చిదిద్దేందుకు ప్రభుత్వం చర్యలు చేపడుతోంది. విశాఖపట్నాన్ని పారిశ్రామికంగా మరింత అభివృద్ధి చేసేందుకు చర్యలు తీసుకుంటోంది. ఈ క్రమంలోనే విశాఖపట్నం భవిష్యత్ అవసరాల కోసం భూమిని సమీకరిస్తున్న సంగతి తెలిసిందే. సుమారుగా 3 వేల ఎకరాల భూమిని సమీకరిస్తున్నారు. విశాఖపట్నానికి పెద్దఎత్తున కంపెనీలు వసున్న నేపథ్యంలో.. వాటి ఏర్పాటు కోసం అవసరమైన భూములను సిద్ధం చేస్తున్నారు. ఈ క్రమంలోనే విశాఖ జిల్లా పరిధిలో 3 ఎకరాలతో ల్యాండ్ బ్యాంక్ ఏర్పాటు చేయాలని ప్రభుత్వం నిర్ణయం తీసుకుంది. ఆనందపురం, భీమునిపట్నం , పెందుర్తి, పద్మనాభం మండలాల పరిధిలో ఈ భూములను సమీకరించనున్నారు.

ఈ నేపథ్యంలో ఏపీ ఐటీ కార్యదర్శి కాటంనేని భాస్కర్ ఇటీవల విశాఖలో పర్యటించారు. క్షేత్రస్థాయిలో పర్యటించి.. అక్కడున్న భూములను పరిశీలించారు. అనంతరం అధికారులతో చర్చించారు. విశాఖలో వివిధ సంస్థల ఏర్పాటు కోసం ఇప్పటికే 200 ఎకరాల భూమిని కేటాయించారు. భవిష్యత్తులో మరిన్ని కంపెనీలు విశాఖకు వచ్చే అవకాశం ఉంది. ఈ నేపథ్యంలోనే భూ సమీకరణ చేపట్టనున్నారు. మరోవైపు విశాఖపట్నం, విజయనగరం , అనకాపల్లి జిల్లాల్లో భూసమీకరణ కోసం ప్రభుత్వం ఇప్పటికే ప్రకటన కూడా విడుదల చేసిన సంగతి తెలిసిందే.1941.19 ఎకరాల భూసమీకరణ కోసం ఆగస్ట్ నెలారంభంలో నోటిఫికేషన్ కూడా విడుదల చేశారు. 13 గ్రామాల పరిధిలో భూమిని సమీకరించాలని నిర్ణయించారు. విశాఖ గ్రోత్ హబ్‌లో భాగంగా ఈ భూసమీకరణ చేపట్టనున్నారు. వీఎంఆర్‌డీఏ ఈ ప్రక్రియను పర్యవేక్షిస్తోంది.

విశాఖ జిల్లా ఆనందపురం, పద్మనాభం మండలాల్లో 1,132 ఎకరాలు, అనకాపల్లి జిల్లా సబ్బవరం, అనకాపల్లి మండలాల్లో 783.69 ఎకరాలు, విజయనగరం జిల్లా డెంకాడ, భోగాపురం మండలంలో 25.41 ఎకరాల భూమిని సమీకరించేందుకు నోటిఫికేషన్ విడుదల చేశారు. భూసమీకరణలో భాగంగా స్వచ్ఛందంగా భూములు ఇచ్చిన వారికి రిటర్నబుల్ ప్లాట్లు కూడా కేటాయిస్తారు. 2016 వుడా భూసమీకరణ పథకం కింద ఈ ప్రక్రియ చేపట్టనున్నారు. భూ సమీకరణ కోసం సెప్టెంబర్, అక్టోబర్ నెలల్లో గ్రామసభలు నిర్వహించి స్థానికుల నుంచి ప్రజాభిప్రాయం తెలుసుకోనున్నారు.