బాయ్‌కాట్‌ డిమాండ్‌ల మధ్య భారత్‌ వర్సెస్ పాక్ మ్యాచ్‌పై క్లారిటీ ఇచ్చిన బీసీసీఐ

పహల్గాం ఉగ్రదాడి తర్వాత తొలిసారి ఆసియాకప్‌ 2025లో భాగంగా భారత్ పాకిస్థాన్ క్రికెట్ మ్యాచ్ జరగనుంది. అయితే ఉగ్రవాదులను తయారు చేసే పాకిస్థాన్‌తో వ్యాపార, క్రీడా సంబంధాలకు ముగింపు పలకాలనే డిమాండ్‌లు భారీగా వినిపిస్తున్నాయి. దీంతో భారత్, పాక్ మ్యాచ్‌ను బాయ్‌కాట్ చేయాలని సోషల్ మీడియాలో కామెంట్లు వస్తున్నాయి. కాగా వరల్డ్ ఛాంపియన్‌ షిప్‌ ఆఫ్ లెజెండ్స్ లీగ్‌లో భాగంగా ఇటీవల ఇండియా ఛాంపియన్స్ జట్టు.. పాకిస్థాన్‌తో మ్యాచ్‌ను బాయ్‌కాట్ చేసింది. లీగ్ దశలో ఓసారి.. సెమీఫైనల్‌లో మరోసారి ఇదే రిపీట్ చేసింది. తాను పాక్‌తో ఎట్టిపరిస్థితుల్లోనూ ఆడబోమని శిఖర్ ధావన్, హర్బజన్ సింగ్ లాంటి మాజీ ప్లేయర్లు తేల్చిచెప్పారు.

ఇక ఆసియాకప్ 2025లో పాకిస్థాన్‌తో మ్యాచ్‌ను సైతం బాయ్‌కాట్ చేయాలని చాలా మంది మాజీ క్రికెటర్లు డిమాండ్ చేస్తున్నారు. కానీ బీసీసీఐ మాత్రం భారత ప్రభుత్వ సూచనలు పాటిస్తామని ముందు నుంచీ చెబుతోంది. ఇటీవల కేంద్రం ప్రభుత్వం ఈ విషయంపై స్పందించింది. ద్వైపాక్షిక సిరీస్‌లో ఆడేందుకు అనుమతి లేదని.. కానీ ఐసీసీ ఈవెంట్స్‌, ఆసియాకప్ లాంటి టోర్నీలో తటస్థ వేదికల్లో పాక్‌తో మ్యాచ్ ఆడితే ఇబ్బంది లేదని చెప్పింది. దీంతో ఆసియాకప్‌లో భారత్‌-పాక్ మ్యాచ్‌కు మార్గం సుగమం అయింది.

మరో రెండు రోజుల్లో దుబాయ్ వేదికగా దాయాదుల పోరు జరగనుంది. ఈ నేపథ్యంలో బాయ్‌కాట్ డిమాండ్‌ల మధ్య భారత క్రికెట్ జట్టు బ్యాటింగ్ కోచ్‌ సితాన్షు కొటక్ స్పందించారు. ఆసియాకప్‌లో టీమిండియా.. అన్ని మ్యాచ్‌లు ఆడుతుందని స్పష్టం చేశారు. అది పాకిస్థాన్‌ అయినా ఇబ్బందేమీ లేదని పేర్కొన్నారు. భారత ఆటగాళ్లు ప్రస్తుతం ఈ మ్యాచ్‌పైనే ఫోకస్ పెట్టారని వ్యాఖ్యానించారు. భారత్, పాకిస్థాన్‌ మ్యాచ్‌ అంటే ఇప్పుడే కాదని.. ఎప్పుడైనా ఉత్కంఠ ఉంటుందని సితాన్షు కొటక్ చెప్పారు. ఈ ప్రకటనతో దాయాదుల మ్యాచ్ కచ్చితంగా జరుగుతుందని టీమిండియా స్పష్టం చేసినట్లయింది. ఆసియాకప్‌లో తమ తొలి మ్యాచ్‌లో భారత్‌.. యూఏఈని చిత్తు చేసింది. రెండో మ్యాచ్‌లో పాకిస్థాన్‌తో తలపడనుంది. ఆదివారం రాత్రి 8 గంటలకు దుబాయ్ వేదికగా టీమిండియా, పాకిస్థాన్ తలపడనున్నాయి.