ఉపముఖ్యమంత్రి పవన్ కల్యాణ్ కు దసరా ఉత్సవాల ఆహ్వానం
Andhra Pradesh Telugu | Suryaa Desk | Published : Fri, Sep 19, 2025, 07:17 PM
విజయవాడ ఇంద్రకీలాద్రిపై అత్యంత వైభవంగా జరిగే శ్రీ కనకదుర్గమ్మ దసరా శరన్నవరాత్రి ఉత్సవాలకు హాజరు కావాల్సిందిగా రాష్ట్ర ఉప ముఖ్యమంత్రి పవన్ కల్యాణ్ కు ఆహ్వానం అందింది. దుర్గగుడి కార్యనిర్వహణాధికారి వి.కె. శీనా నాయక్ శుక్రవారం శాసనసభలో పవన్ కల్యాణ్ ను కలిసి ఉత్సవాలకు రావాలని ప్రత్యేకంగా కోరారు.అసెంబ్లీ సమావేశాల విరామ సమయంలో పవన్ కల్యాణ్ తో భేటీ అయిన శీనా నాయక్, ఆయనకు దసరా ఉత్సవాల ఆహ్వాన పత్రికను అందజేశారు. ఈ సందర్భంగా అమ్మవారి ప్రసాదాన్ని కూడా అందించారు. అనంతరం, ఆలయ అర్చకులు ఉప ముఖ్యమంత్రి పవన్ కల్యాణ్ కు వేద మంత్రోచ్ఛారణలతో ఆశీర్వచనాలు పలికారు.ఈ నెల 22వ తేదీ నుంచి ఇంద్రకీలాద్రిపై దసరా శరన్నవరాత్రి మహోత్సవాలు ప్రారంభం కానున్న విషయం తెలిసిందే. ఈ నేపథ్యంలో రాష్ట్ర ప్రభుత్వం తరఫున కీలక బాధ్యతల్లో ఉన్న ఉప ముఖ్యమంత్రిని సంప్రదాయబద్ధంగా ఆహ్వానించేందుకు ఆలయ అధికారులు వచ్చారు. ఈ కార్యక్రమంతో దసరా ఉత్సవాల ఏర్పాట్లు అధికారికంగా ఊపందుకున్నాయి
|
|