India vs Oman: "ఆ ఇద్దరూ ఎందుకు లేరు?" – సూర్యకుమార్ నిజం చెప్పేశాడు!

ఆసియా కప్ 2025 టోర్నమెంట్‌లో భాగంగా ఒమన్‌తో జరుగుతున్న మ్యాచ్‌లో భారత జట్టు టాస్ గెలిచి మొదట బ్యాటింగ్ చేయాలని నిర్ణయించింది. ఇప్పటివరకు టోర్నీలో ఏ ఒక్క మ్యాచ్‌లోనూ ముందుగా బ్యాటింగ్ చేయలేదని, అందుకే ఈ నిర్ణయం తీసుకున్నామని టీమిండియా కెప్టెన్ సూర్యకుమార్ యాదవ్ తెలిపారు."మేము ముందుగా బ్యాటింగ్ చేస్తాం. టోర్నీలో ఇప్పటివరకు chasing చేశాం. కానీ మా బ్యాటింగ్ లైనప్‌కి పరీక్ష పడే అవకాశం రావాలని భావించాం. సూపర్-4కు ముందు ఇదొక మంచి ప్రాక్టీస్ అవుతుంది. గత రెండు మ్యాచ్‌లా ఇదిలా రాణించాలని ఆశిస్తున్నాం. అదే జోరును కొనసాగించాలనుకుంటున్నాం. పిచ్ బాగుంది. మా ఓపెనర్లు దాన్ని చక్కగా అంచనా వేయగలరు," అని అన్నారు.ఈ మ్యాచ్ కోసం టీమిండియా తుది జట్టులో రెండు మార్పులు చేసింది. హర్షిత్ రాణా జట్టులోకి రాగా, మరో ఆటగాడి పేరు ఒక్కసారిగా మర్చిపోయిన సూర్యకుమార్, "నేను ఇప్పుడు రోహిత్ శర్మలా తయారయ్యాను," అంటూ నవ్వేశారు.జస్‌ప్రీత్ బుమ్రా, వరుణ్ చక్రవర్తి ఈ మ్యాచ్‌కు అందుబాటులో లేరు. వారి స్థానాల్లో అర్ష్‌దీప్ సింగ్, హర్షిత్ రాణాలు తుది జట్టులోకి వచ్చారు. బెంచ్‌కి ఉన్న ఆటగాళ్లకు అవకాశాలు కల్పించాలనే ఉద్దేశంతో ఈ మార్పులు చేశామని కెప్టెన్ తెలిపారు.ఇక ఒమన్ కెప్టెన్ జతీందర్ సింగ్ మాట్లాడుతూ, "టాస్ గెలిచి ఉంటే మేమూ ముందుగా బ్యాటింగ్ ఎంచుకునే వాళ్లమే. ఈ టోర్నమెంట్ మాకు గొప్ప అనుభవం. మా జట్టులో యువ ఆటగాళ్లే ఎక్కువ. పెద్దగా అనుభవం లేకపోయినా, తమ ప్రతిభను చూపించేందుకు ఇది మంచి వేదిక. భారత్‌తో ఆడటం గొప్ప అవకాశం," అని అన్నారు. ఒమన్ జట్టులోనూ రెండు మార్పులు చోటు చేసుకున్నాయి.
*తుది జట్లు:
-భారత్:అభిషేక్ శర్మ, శుభ్‌మన్ గిల్, సంజు శాంసన్ (వికెట్ కీపర్), సూర్యకుమార్ యాదవ్ (కెప్టెన్), తిలక్ వర్మ, శివమ్ దూబే, హార్దిక్ పాండ్యా, అక్షర్ పటేల్, హర్షిత్ రాణా, అర్ష్‌దీప్ సింగ్, కుల్దీప్ యాదవ్.
-ఒమన్:ఆమిర్ కాలీమ్, జతీందర్ సింగ్ (కెప్టెన్), హమ్మద్ మీర్జా, వినాయక్ శుక్లా (వికెట్ కీపర్), షా ఫైసల్, జిక్రియా ఇస్లాం, ఆర్యన్ బిష్ట్, మహమ్మద్ నదీమ్, షకీల్ అహ్మద్, సమయ్ శ్రీవాస్తవ, జితెన్ రమనాండి.