పానీపూరీ కోసం నడిరోడ్డుపై ట్రాఫిక్ ఆపేసిన మహిళ

పానీపూరీ తినేందుకు చాలా మంది ఎగబడిపోతూ ఉంటారు. ఇక అమ్మాయిలకు పానీపూరీ ఎంత ఇష్టమో ప్రత్యేకంగా చెప్పనక్కర్లేదు. పానీపూరీ అంటే పురుషుల కంటే మహిళలే ఎంత ఎక్కువగా ప్రాణం ఇస్తారో మనందరికీ తెలిసిందే. ఒక పానీపూరీ బండి కనిపిస్తే చాలు.. ప్రపంచాన్ని మరిచిపోయి, అదేదో ప్రాణ వాయువు దొరికినట్లు కొందరు తింటుంటారు. పానీపూరీ వేసే వాడికి అలుపు రావాలి కానీ.. తినే వారికి మాత్రం రాదు అన్నట్లు లాగించేస్తూ ఉంటారు. కడుపు నిండిపోయినాసరే.. ఒక మసాలా పూరీ లేకపోతే స్వీట్ పూరీ ఇవ్వండి అంటూ పానీపూరీ బండి ఓనర్‌ను బతిమిలాడతారు. ఇక ఎండా కాలం, వర్షా కాలం, చలి కాలం.. ఏది వచ్చినా పానీపూరీ మాత్రం కడుపులో వేయాల్సిందే. అయితే ఓ మహిళ మాత్రం తనకు పానీపూరీ తక్కువగా వచ్చాయని నానా రచ్చ చేసింది. గుజరాత్‌లో జరిగిన ఈ సంఘటనకు సంబంధించిన వీడియో ఇప్పుడు సోషల్ మీడియాలో తెగ వైరల్ అవుతోంది.

గుజరాత్‌లోని వడోదర నగరంలోని సుర్‌సాగర్ సరస్సు సమీపంలో ఈ సంఘటన చోటు చేసుకుంది. పానీపూరీ బండి వద్దకు వెళ్లిన ఓ మహిళ.. తినడం ప్రారంభించింది. అయితే రూ.20కి ఆరు పానీపూరీలు ఇస్తా అని ఆ బండి ఓనర్ చెప్పాడు. అయితే తనకు 4 పానీపూరీలు మాత్రమే వేశాడని ఆ మహిళ తీవ్ర ఆగ్రహానికి గురైంది. దీంతో ఆ మహిళకు, పానీపూరీ బండి ఓనర్‌కు తీవ్ర వాగ్వాదం జరిగింది. ఆ పానీపూరీ బండి యజమాని ఎంత చెప్పినా.. ఆ మహిళ వినకుండా తనకు మరో 2 గోల్ గప్పాలు ఇవ్వాలంటూ డిమాండ్ చేసింది.

అనంతరం రోడ్డు మధ్యలో కూర్చుని నిరసన వ్యక్తం చేసింది. దీంతో ఆ రోడ్డుబై భారీగా ట్రాఫిక్ జామ్ ఏర్పడింది. స్థానికులు, వాహనదారులు, ఆ మార్గంలో నడిచివెళ్లేవారు ఎంత చెప్పినా ఆమె అక్కడి నుంచి లేవలేదు. దీంతో వారంతా ఆ మహిళ రోడ్డుపై కూర్చొని ఉండటాన్ని ఫోటోలు, వీడియోలు తీసి సోషల్ మీడియాలో పోస్ట్ చేశారు. ఇక మరికొందరు పోలీసులకు ఫిర్యాదు చేయగా.. వారు సంఘటనా స్థలానికి చేరుకుని పరిస్థితిని ఆ మహిళకు నచ్చజెప్పే ప్రయత్నం చేశారు.

పోలీసులు చెప్పినప్పటికీ.. ఆ మహిళ మాత్రం వెనక్కి తగ్గలేదు. ఓవైపు ఏడుస్తూనే.. తనకు పానీపూరీ ఇవ్వాలని కోరింది. తాను రూ.20 చెల్లించానని.. అందుకు 6 పానీపూరీ ఇవ్వడం.. తనకు న్యాయంగా రావాల్సిన హక్కు అని వాదించింది. పైగా తన వద్దకు వచ్చిన పోలీసులు.. వాటిని ఇప్పించాలని డిమాండ్ చేసింది. దీంతో కొన్ని గంటల పాటు ఆ ప్రాంతంలో ఇదే రచ్చ కొనసాగింది.

చివరికి పోలీసులు ఆ మహిళను నడిరోడ్డుపై నుంచి పక్కకు తీసుకెళ్లడంతో ట్రాఫిక్ క్లియర్ అయింది. కానీ.. చివరికి ఆమెకు పానీపూరీలు పోలీసులు ఇప్పించారా లేదా అనేది మాత్రం తెలియరాలేదు. ఈ వీడియో నెట్టింట వైరల్ కావడంతో.. నెటిజన్లు రకరకాల కామెంట్లు పెడుతున్నారు.