"నేను రోహిత్ శర్మలా మారిపోయాను!" – సూర్య (వీడియో వైరల్)

టీమిండియా టీ20 కెప్టెన్ సూర్యకుమార్ యాదవ్ తాజాగా తన మాటలతో అందరినీ నవ్వించేశాడు. మతిమరుపు విషయంలో తాను రోహిత్ శర్మలా మారిపోయానని సరదాగా వ్యాఖ్యానించాడు. చిన్న చిన్న విషయాలు గుర్తు పెట్టుకోవడంలో తాను తడబడుతున్నానని అంగీకరించాడు.ఈ సంఘటన 2025 ఆసియా కప్‌లో ఒమన్‌తో జరిగిన మ్యాచ్ సందర్భంగా చోటు చేసుకుంది. టాస్ గెలిచిన సూర్యకుమార్ యాదవ్ ముందుగా బ్యాటింగ్ ఎంచుకున్నాడు. సూపర్–4 మ్యాచ్‌ల ముందు బాటింగ్ ప్రాక్టీస్ కావాలని ఈ నిర్ణయం తీసుకున్నట్లు వెల్లడించాడు. ఈ మ్యాచ్ ద్వారా జట్టు బ్యాటర్లను పరీక్షించే ఉద్దేశంతో ఆ నిర్ణయం తీసుకున్నామన్నాడు.తుది జట్టులో రెండు మార్పులు చేశామని చెప్పిన సూర్య... హోస్ట్ రవి శాస్త్రి అడిగిన వెంటనే ఆ ఆటగాళ్ల పేర్లను గుర్తు చేసేందుకు కొద్దిగా ఇబ్బంది పడ్డాడు. చివరికి హర్షిత్ రాణా పేరు చెప్పగలిగినా, ఇంకొక ఆటగాడు ఎవరో గుర్తు రాలేదని చెప్పాడు. “నేను కూడా రోహిత్ శర్మలా తయారయ్యాను” అని నవ్వుతూ స్పందించాడు.
అతను చెప్పినట్లుగా:"మేము ముందుగా బ్యాటింగ్ చేయనున్నాం. ఇప్పటివరకు టోర్నీలో మేము బ్యాటింగ్‌తో ఆరంభించలేదు. మా బ్యాటర్ల సామర్థ్యాన్ని పరీక్షించాలనుకుంటున్నాం. సూపర్-4కి ముందు మాకు ఇది మంచి ప్రాక్టీస్ అవుతుంది. మొదటి రెండు మ్యాచ్‌ల్లో వచ్చిన జోరును కొనసాగించాలనుకుంటున్నాం. పిచ్ కూడా బాగానే ఉంది. మా ఓపెనర్లు మంచి ఆరంభం ఇస్తారని ఆశిస్తున్నాం."ఈ మ్యాచ్‌లో జస్‌ప్రీత్ బుమ్రా మరియు వరుణ్ చక్రవర్తిలకు విశ్రాంతి ఇవ్వగా, వారి స్థానాల్లో అర్ష్‌దీప్ సింగ్ మరియు హర్షిత్ రాణా జట్టులోకి వచ్చారు.వాస్తవానికి టాస్ సమయంలో తుది జట్టు మార్పులు ప్రకటించడంలో రోహిత్ శర్మ కూడా గతంలో చాలా సార్లు తడబడిన సంగతి తెలిసిందే. పిచ్ పరిస్థితుల ఆధారంగా చివరి నిమిషంలో మార్పులు జరగడం వల్లే ఇది జరుగుతుంటుంది.
*తుది జట్లు ఇలా ఉన్నాయి:
-ఒమన్: ఆమిర్ కాలీమ్, జతీందర్ సింగ్ (కెప్టెన్), హమ్మద్ మీర్జా, వినాయక్ శుక్లా (వికెట్ కీపర్), షా ఫైసల్, జిక్రియా ఇస్లాం, ఆర్యన్ బిష్ట్, మహమ్మద్ నదీమ్, షకీల్ అహ్మద్, సమయ్ శ్రీవాస్తవ, జితెన్ రమనాండి.
-భారత్: అభిషేక్ శర్మ, శుభ్‌మన్ గిల్, సంజు శాంసన్ (వికెట్ కీపర్), సూర్యకుమార్ యాదవ్ (కెప్టెన్), తిలక్ వర్మ, శివమ్ దూబే, హార్దిక్ పాండ్యా, అక్షర్ పటేల్, హర్షిత్ రాణా, అర్ష్‌దీప్ సింగ్, కుల్దీప్ యాదవ్.