ఏకంగా రూ.300 కోట్లతో,,,,దేశంలోనే అత్యంత ఖరీదైన దుర్గా మండపం

దేశంలో దసరా శరన్నవరాత్రి ఉత్సవాలు కొద్ది గంటల్లో ప్రారంభం కాబోతుండగా.. ఆకట్టుకునేలా మండపాలను తీర్చిదిద్దుతున్నారు. ఈ క్రమంలో అత్యంత ఖరీదైన దుర్గా మండపాన్ని మధ్యప్రదేశ్‌లోని ఇండోర్‌లో ఏర్పాటుచేస్తున్నారు. ఇందుకోసం ఏకంగా రూ.300 కోట్లతో ఈ మండపాన్ని ఏర్పాటుచేస్తుండగా.. ఒక్కోటి 50 అడుగుల ఎతులో 12 జ్యోతిర్లింగాలను ఇందులో ఉంచుతున్నారు. మహాలయ అమావాస్య ముగిసిన తర్వాత.. పాడ్యమితో మొదలై.. దశమి వరకూ శరన్నవరాత్రి ఉత్సవాలు కొనసాగుతాయి. ఈ ఏడాది సెప్టెంబరు 22 (సోమవారం) నుంచి దసరా ఉత్సవాలు ప్రారంభమై అక్టోబరు 2 దాకా కొనసాగుతాయి. పశ్చిమ్ బెంగాల్‌, ఒడిశా, గుజరాత్‌లతో పాటు విజయవాడ ఇంద్రకీలాద్రిపై దసరా వేడుకలు అంగరంగ వైభవంగా సాగుతాయి.

ఇండోర్‌ నిర్వాహకులు అమ్మవారి విగ్రహాన్ని ఏనుగు అంబారీపై ఊరేగించి ఘనంగా మండపంలోకి తీసుకొస్తారు. అనంతరం గర్బా నృత్యాలతో దేవీ నవరాత్రి ఉత్సవాలకు శ్రీకారం చుడతారు. వీఐపీ పరస్పర్‌ నగర్‌లోని 30 ఎకరాలకుపైగా విస్తరించిన గ్రౌండ్‌లో దక్షిణ భారత ఆలయాల నిర్మాణ శైలిలో ఈ మండపం రూపుదిద్దుకుంది. తెలుగు రాష్ట్రాల సహా దక్షిణాది, ఉత్తరాదిలకు చెందిన 500 మందికిపైగా కళాకరులు గత మూడు నెలలుగా ఈ మండపం పనుల్లో నిమగ్నమై ఉన్నారు. కృష్ణగిరి పీఠాధాపతి వసంత్‌ విజయానంద్‌ గిరి మహరాజ్‌ మార్గదర్శకత్వంలో భక్తులు ఇచ్చిన విరాళాలతో ఈ దేవీ నవరాత్రి ఉత్సవాలకు ఏర్పాట్లు జరుగుతున్నాయి.

వేడుకల వేళ పంజాబీ సింగర్ దలేర్‌ మెహందీ, లఖ్‌వీర్‌ సింగ్‌ లఖా, ఉస్మాన్‌ మీర్, శివమణి వంటి ఆర్టిస్ట్‌ల ప్రదర్శనలు ఉంటాయి. అలాగే, అఖిల భారత కవి సమ్మేళనాలు కూడా నిర్వహిస్తారు. 25,000 చదరపు అడుగుల విస్తీర్ణంలో యాగశాలను నిర్మించారు. ఇందులో దేశ నలుమూలల నుంచి వచ్చిన 108 మంది పండితులతో యజ్ఞాలు, హోమాలు, ప్రత్యేక పూజలు నిర్వహించనున్నారు. ఉత్సవాలను తికించేందుకు వేలాది మంది వచ్చే అవకాశం ఉండటంతో వారికి ఎటువంటి ఇబ్బందులు లేకుండా వాహనాల పార్కింగ్, భోజన శాలలు, భద్రతా చర్యలు తీసుకున్నారు.

అలాగే, భక్తుల కోసం ప్రత్యేకంగా బంగారు కలశాలను కూడా అందుబాటులో ఉంచారు. వీటి ధర రూ.30 వేల- రూ.1 లక్ష వరకు ఉంటుందని అంచనా. ఎన్నో ప్రత్యేకతలతో గిన్నిస్‌ వరల్డ్‌ రికార్డ్స్‌లో నమోదయ్యే స్థాయిలో ఈ ఉత్సవాలకు ఏర్పాట్లు చేస్తున్నట్లు నిర్వాహకులు వెల్లడించారు.