ఆసియా కప్ సూపర్ ఫోర్స్‌లో పాక్‌పై భారత్ ఘన విజయం

ఆసియా కప్ 2025 సూపర్ ఫోర్స్ దశలో జరిగిన కీలక మ్యాచ్‌లో దాయాది పాకిస్థాన్‌పై భారత జట్టు అద్భుత విజయాన్ని నమోదు చేసింది. దుబాయ్ అంతర్జాతీయ క్రికెట్ స్టేడియం వేదికగా జరిగిన ఈ మ్యాచ్‌లో టీమిండియా 6 వికెట్ల తేడాతో పాక్‌ను చిత్తు చేసింది. యువ ఓపెనర్లు అభిషేక్ శర్మ, శుభ్‌మన్ గిల్ మెరుపు బ్యాటింగ్‌తో భారత్ విజయంలో కీలక పాత్ర పోషించారు.172 పరుగుల లక్ష్యంతో బరిలోకి దిగిన భారత్‌కు ఓపెనర్లు అదిరిపోయే ఆరంభాన్ని ఇచ్చారు. అభిషేక్ శర్మ (39 బంతుల్లో 74; 6 ఫోర్లు, 5 సిక్సర్లు), శుభ్‌మన్ గిల్ (28 బంతుల్లో 47; 8 ఫోర్లు) పాక్ బౌలర్లపై ఎదురుదాడికి దిగారు. వీరిద్దరూ తొలి వికెట్‌కు కేవలం 9.5 ఓవర్లలోనే 105 పరుగుల భాగస్వామ్యం నెలకొల్పి గెలుపునకు బలమైన పునాది వేశారు. గిల్ ఔటైన తర్వాత వచ్చిన కెప్టెన్ సూర్యకుమార్ యాదవ్ (0) డకౌట్ అయినా, అభిషేక్ తన జోరు కొనసాగించాడు. కీలక సమయంలో అభిషేక్ ఔటయ్యాక, తిలక్ వర్మ (19 బంతుల్లో 30 నాటౌట్) బాధ్యతాయుతంగా ఆడి జట్టును విజయ తీరాలకు చేర్చాడు. దీంతో భారత జట్టు 18.5 ఓవర్లలో 4 వికెట్లు కోల్పోయి 174 పరుగులు చేసి విజయాన్ని అందుకుంది.అంతకుముందు టాస్ ఓడి బ్యాటింగ్‌కు దిగిన పాకిస్థాన్ జట్టు నిర్ణీత 20 ఓవర్లలో 5 వికెట్ల నష్టానికి 171 పరుగులు చేసింది. పాక్ బ్యాటర్లలో ఓపెనర్ సాహిబ్జాదా ఫర్హాన్ (45 బంతుల్లో 58) అర్ధ సెంచరీతో రాణించాడు. చివర్లో ఫహీమ్ అష్రఫ్ (8 బంతుల్లో 20) వేగంగా ఆడటంతో పాకిస్థాన్ గౌరవప్రదమైన స్కోరు చేయగలిగింది. భారత బౌలర్లలో శివమ్ దూబే రెండు వికెట్లు పడగొట్టగా, హార్దిక్ పాండ్యా, కుల్దీప్ యాదవ్ చెరో వికెట్ తీశారు. ఈ విజయంతో ఆసియా కప్ ఫైనల్ రేసులో భారత్ మరింత ముందంజ వేసింది.