‘హనుమాన్ కల్పిత హిందూ దేవుడు’.. విగ్రహం ఏర్పాటుపై రిపబ్లికన్ నేత వ్యాఖ్యలు

అమెరికాలో హనుమంతుడి విగ్రహం ఏర్పాటుపై రిపబ్లికన్ నేత అభ్యంతర వ్యక్తం చేయడమే కాదు. అనుచిత వ్యాఖ్యలు చేశారు. ‘ఆయన కల్పిత హిందూ దేవుడు’ అని, క్రైస్తవ దేశమైన అమెరికాలో ఆ విగ్రహం ఎందుకు ఏర్పాటు చేశారని టెక్సాస్‌కు చెందిన రిపబ్లికన్ అలెగ్జాండర్ డంకన్ ప్రశ్నించారు. ‘స్టాచ్యూ ఆఫ్ యూనియన్’ పేరుతో హ్యూస్టన్ నగరం సమీపంలోని షుగర్‌ల్యాండ్ అష్టలక్ష్మి ఆలయంలో 90 అడుగుల పొడవైన ఆంజనేయుడి కాంస్య విగ్రహాన్ని 2024లో త్రిదండి చిన్నజీయర్ స్వామీ ప్రారంభించారు. అమెరికాలోని అత్యంత పొడవైన హిందూ దేవుళ్ల విగ్రహాల్లో ఇది కూడా ఒకటి. ఈ విగ్రహం ఏర్పాటుపై డంకన్ విమర్శలు గుప్పిస్తూ ఎక్స్ (ట్విట్టర్)లో పోస్ట్ పెట్టారు. దీనిపై సోషల్ మీడియాలో తీవ్ర ఆగ్రహం వ్యక్తమవుతోంది.

‘‘టెక్సాస్‌లో కల్పిత హిందూ దేవుడి కల్పిత విగ్రహం ఏర్పాటుకు క్రైస్తవ దేశమైన మనం ఎందుకు అనుమతించాలి’’ అని హనుమంతుడి విగ్రహం వీడియోను ఎక్స్‌లో షేర్ చేశారు. ‘‘బైబిల్‌ ప్రకారం నేను తప్ప వేరొక దేవుడు నీకు ఉండకూడదు. ఆకాశంలో గానీ, భూమిపై గానీ, స్వర్గంలో గానీ, సముద్రంలో గానీ ఏదైనా విగ్రహాన్ని నీవు పూజించకూడదు ’’ అని బైబిల్ వ్యాక్యాలను మరో పోస్ట్‌లో పెట్టారు. ఈ పోస్ట్‌లు క్షణాల్లో వైరల్ కావడంతో హిందూ అమెరికన్ ఫౌండేషన్ సహా నెటిజన్ల నుంచి తీవ్ర విమర్శలు వెల్లువెత్తుతున్నాయి. ‘ఆయన హిందూ వ్యతిరేకి’ అంటూ మండిపడుతున్నారు.

‘‘మీ పార్టీకి చెందిన సెనేట్ అభ్యర్థిపై క్రమశిక్షణ చర్యలు తీసుకోవాలి? ఎందుకంటే ఆయన రిపబ్లికన్‌ల మార్గదర్శకాలకు విరుద్ధంగా ప్రవర్తిస్తూ హిందూ వ్యతిరేక ద్వేషాన్ని ప్రదర్శిస్తున్నారు.. అంతేకాదు, ఒకటో సవరణలోని ఎస్టాబ్లిష్‌మెంట్ క్లాజ్ పట్ల కూడా అవమానకరమైన వైఖరి బయటపెట్టారు’’ అంటూ టెక్సాస్ రిపబ్లికన్ పార్టీని హిందూ అమెరికన్ ఫౌండేషన్ ట్యాగ్ చేసింది. అలాగే, అమెరికా రాజ్యాంగం ప్రజలు తమకు నచ్చిన మతాన్ని ఆచరించే స్వేచ్ఛ కల్పించిందని పలువురు నెటిజన్లు గుర్తుచేస్తున్నారు.

‘‘మీరు హిందువు కానంత మాత్రాన అది తప్పు కాదు.. ఏసు భూమిపై జీవించడానికి దాదాపు 2000 ఏళ్లకు ముందు వేదాలు పుట్టాయి..అవి అసాధారణ గ్రంథాలు.. క్రైస్తవ మతంపై స్పష్టమైన ప్రభావాలు ఉన్నాయి... కాబట్టి మీ మతాన్ని ప్రభావితం చేసే పురాతన 'మతం'ను గౌరవించడం, దాని గురించి తెలుసుకోవడం తెలివైన పని.’ జోర్డాన్ క్రౌండర్ అనే ఓ నెటిజన్ కౌంటర్ ఇచ్చారు. గతేడాది ఆగస్టులోనే ఈ విగ్రహాన్ని ప్రారంభించారు. చైనాాలోని ఈ విగ్రహం విడి భాగాలను తయారుచేసి.. టెక్సాస్‌కు తీసుకెళ్లి అక్కడ ఒక్కటిగా చేశారు.