ఆ జిల్లాలోనే కొత్త యూనివర్సిటీ.. .. మంత్రి నారా లోకేష్

ఏపీలో కొత్త విశ్వవిద్యాలయం ఏర్పాటు దిశగా అడుగులు పడుతున్నాయి. ఈ విషయాన్ని ఏపీ విద్యాశాఖ మంత్రి నారా లోకేష్ అసెంబ్లీలో ప్రకటించారు. అసెంబ్లీ సమావేశాల్లో భాగంగా ప్రశ్నోత్తరాల కార్యక్రమంలో చిత్తూరు ఎమ్మెల్యే గురజాల జగన్ మోహన్ రావు, తుని ఎమ్మెల్యే దివ్య అడిగిన ప్రశ్నలకు మంత్రి నారా లోకేష్ సమాధానమిచ్చారు. ఈ క్రమంలోనే చిత్తూరు జిల్లాలో కొత్త యూనివర్సిటీ ఏర్పాటు చేయనున్నట్లు తెలిపారు. చిత్తూరు జిల్లాలో ప్రస్తుతం ద్రవిడియన్ యూనివర్సిటీ, అపోలో యూనివర్సిటీ ఉన్నాయని నారా లోకేష్ గుర్తుచేశారు.

ద్రవిడియన్ యూనివర్సిటీ ప్రభుత్వం ఆధ్వర్యంలో.. అపోలో యూనివర్సిటీ ప్రైవేట్ కింద ఉన్నాయని వెల్లడించారు. అయితే సీఎం చంద్రబాబు మరో యూనివర్సిటీ ఏర్పాటు చేస్తామని జిల్లా ప్రజలకు మాట ఇచ్చారన్న నారా లోకేష్.. ఆ మేరకు చిత్తూరు జిల్లాలో ప్రభుత్వ లేదా ప్రైవేటు యూనివర్సిటీ ఏర్పాటు చేసే దిశగా ఆలోచన చేస్తున్నామని వెల్లడించారు. విద్యార్థుల భవిష్యత్తు ఆలోచన చేసి ఈ విషయంలో నిర్ణయం తీసుకుంటామని అన్నారు.

మరోవైపు కాకినాడ జిల్లా తుని నియోజకవర్గంలోని రావికంపాడు హైస్కూలును జూనియర్ కాలేజీగా అప్‌గ్రేడ్ చేయాలని తుని నియోజకవర్గం ఎమ్మెల్యే యనమల దివ్య విజ్ఞప్తి చేశారు. ఈ విజ్ఞప్తిపై స్పందించిన మంత్రి నారా లోకేష్.. వైసీపీ హయాంలో జూనియర్ కాలేజీలు నిర్వీర్యం అయ్యాయని ఆరోపించారు. తాము వాటిని పునరుద్ధరిస్తూ మెరుగైన సదుపాయాలు కల్పిస్తున్నట్లు వెల్లడించారు.కూటమి ప్రభుత్వం తీసుకుంటున్న చర్యలతో ఏపీలోని జూనియర్ కాలేజీలలో అడ్మిషన్లు 40 శాతం పెరిగాయని నారా లోకేష్ వెల్లడించారు. ఇంటర్ విద్యార్థులకు మధ్యాహ్న భోజనం, పోటీ పరీక్షల కోసం ప్రత్యేకంగా మెటీరియల్ అందిస్తున్నామని వివరించారు. మరోవైపు భవిష్యత్తులో రాష్ట్రంలోని ప్రతి మండలంలో ఒక జూనియర్ కాలేజీ ఉండేలా చర్యలు చేపట్టినట్లు నారా లోకేష్ వివరించారు.

మరోవైపు విద్యార్థులకు ఏపీ ప్రభుత్వం యూనిఫామ్ అందిస్తున్న సంగతి తెలిసిందే. అయితే ఈ యూనిఫాంల తయారీని గతంలో చేనేత సంఘాలకు ఇవ్వాలని ప్రభుత్వం ఆలోచన చేసింది. అయితే వివిధ కారణాలతో ఇది సాధ్యం కాలేదని నారా లోకేష్ వెల్లడించారు. చేనేతల అభివృద్ధి, సంక్షేమానికి తమ ప్రభుత్వం కట్టుబడి ఉందని అన్నారు. చేనేత ఉత్పత్తులను ప్రోత్సహించడానికి ప్రత్యేక బృందాన్ని ఏర్పాటు చేయనున్నట్లు అసెంబ్లీలో ప్రకటించారు.

అలాగే చేనేతల కోసం మంగళగిరిలో వీవర్స్ శాల ఏర్పాటు చేశామన్న నారా లోకేష్.. కొత్త డిజైన్లు, బ్రాండింగ్ మీద చర్యలు చేపడుతున్నామని వివరించారు. మరోవైపు సెప్టెంబర్ 25న అమరావతిలోని వెలగపూడిలో ఉపాధ్యాయ నియామక పత్రాల పంపిణీ కార్యక్రమాన్ని నిర్వహిస్తున్నట్లు నారా లోకేష్ ప్రకటించారు. ఈ కార్యక్రమానికి ఎమ్మెల్యేలు అందరినీ ఆహ్వానిస్తున్నట్లు తెలిపారు.