సొంత పిల్లలనే లైంగిక వేధించాడంటూ..ఎలాన్ మస్క్ తండ్రిపై సంచలన ఆరోపణలు

ప్రపంచ కుబేరుడు, ప్రముఖ వ్యాపారవేత్త ఎలాన్ మస్క్ తండ్రి ఎరోల్ మస్క్‌పై సంచలన లైంగిక వేధింపుల ఆరోపణలు వెలుగులోకి వచ్చాయి. ఆయన తన ఐదుగురు సొంత పిల్లలతోపాటు సవతి తల్లి పిల్లలను లైంగికంగా వేధించారని ఓ అంతర్జాతీయ మీడియా సంస్థ తెలిపింది. దీంతో అంతర్జాతీయ వ్యాప్తంగా ఉన్న ప్రజలంతా ఇది నిజమేనా అని అడుగుతున్నారు. అసలిందులో వాస్తవాలేమున్నాయని ప్రశ్నిస్తున్నారు.

'ది న్యూయార్క్ టైమ్స్' నివేదిక ప్రకారం.. ఈ ఆరోపణలు 1993 నాటివి. దాదాపు 32 ఏళ్లుగా ఎరోల్ మస్క్.. తన పిల్లలను లైంగికంగా వేధిస్తున్నాడని చెబుతోది. అంతేకాకుండా ఈ నివేదిక లేఖలు, ఈమెయిల్స్, కోర్టు పత్రాలు, కుటుంబ సభ్యులతో చేసిన ఇంటర్వ్యూల ఆధారంగా రూపొందించినట్లు వివరించింది. ముఖ్యంగా ఎరోల్ మస్క్ సవతి కుమార్తెనే నేరుగా ఈ విషయాలు చెప్పినట్లు కూడా తెలిపింది. గతంలోనే ఆమె తన బంధువులకు.. ఓసారి తన సవతి తండ్రి ఎరోల్ మస్క్ తనను అసభ్యంగా తాకాడని చెప్పినట్లు స్పష్టం చేసింది. సంవత్సరాల తర్వాత అదే సవతి కుమార్తె ఎరోల్ మస్క్ తన లోదుస్తులను వాసన చూస్తూ పట్టుకున్నట్లు కూడా ఆరోపించిందని పేర్కొంది. దీనితో పాటు ఇద్దరు కుమార్తెలు, ఒక సవతి కుమారుడు కూడా లైంగిక వేధింపుల ఆరోపణలు చేసినట్లు ఆ నివేదికలో పేర్కొన్నారు.

 ఈ ఆరోపణలపై మూడు వేర్వేరు దర్యాప్తులు కూడా జరిగాయని నివేదిక తెలిపింది. అయితే ఇందులో రెండు కేసులపై ఎలాంటి చర్యలు తీసుకోకుండానే మూసివేశారని కూడా చెప్పుకొచ్చింది. ఇక మూడో దర్యాప్తు ఇప్పటికీ కొనసాగుతోందని వివరించింది. ఈ ఆరోపణలన్నింటినీ ఎరోల్ మస్క్ తీవ్రంగా ఖండించారు. అవి నిజం కావంటూనే.. నిర్ధారించబడని ఆరోపణలు అంటూ కొట్టిపారేశారు. తానసలు పిల్లలను లైంగికంగా వేధించలేదని.. అలాంటప్పుడు ఎలాంటి ఆధారాలూ ఉండవని తెలిపింది. ఈ ఆరోపణలు తన కుమారుడు ఎలాన్ మస్క్ నుంచి డబ్బులు లాగడానికి కుటుంబ సభ్యులు చేసిన ఒక కుట్ర అని ఆయన ఆరోపించారు.

ఎలాన్ మస్క్ తన తండ్రితో ఉన్న సంబంధం గురించి చాలా అరుదుగా మాట్లాడుతుంటారు. కానీ 2017లో రోలింగ్ స్టోన్‌కు ఇచ్చిన ఇంటర్వ్యూలో ఆయన తన తండ్రి గురించి చేసిన వ్యాఖ్యలు అందరి దృష్టిని ఆకర్షించాయి. "మీరు ఆలోచించగల ప్రతి చెడ్డ పనిని నా తండ్రి చేశారు" అని ఆయన అన్నారు. తన బాల్యాన్ని గుర్తు చేసుకుంటూ.. తన సోదరులు కింబల్, తోస్కా తల్లితో ఉండగా, తాను పదేళ్ల వయసులో తండ్రితో ఉండటానికి వెళ్లాలని నిర్ణయించుకున్నానని మస్క్ చెప్పారు. “నా తల్లి ముగ్గురు పిల్లలతో ఉండటం చూసి, నా తండ్రి ఒంటరిగా, చాలా బాధగా ఉన్నారని నేను భావించాను, అందుకే నేను ఆయనకు తోడుగా ఉండాలని అనుకున్నాను. అప్పట్లో ఆయన ఎలాంటి వ్యక్తి అనేది నాకు నిజంగా అర్థం కాలేదు.. అలాగే నేను తీసుకున్న ఆ నిర్ణయం మంచిది కాదు” అని మస్క్ అన్నారు. అంతేకాకుండా తన తండ్రి ప్రణాళిక ప్రకారం చెడ్డపనులు చేసే వ్యక్తిగా కూడా మస్క్ అభివర్ణించారు.

ఎరోల్ మస్క్ మొత్తంగా మూడు వివాహాల ద్వారా కనీసం తొమ్మిది మంది పిల్లలకు జన్మనిచ్చాడు. వీరిలోనే ఈయన సవతి పిల్లలు కూడా ఉన్నారు. అయితే లైంగిక ఆరోపణలు బయటకు వచ్చాకా.. కుటుంబ సభ్యులు ఎలాన్ మస్క్‌ను సంప్రదించగా ఆయన వారికి సాయం కూడా చేసినట్లు నివేదికలో వెల్లడించారు. అయితే ఆయన ఏ విధంగా జోక్యం చేసుకున్నారనే దానిపై మాత్రం ఎలాంటి క్లారిటీ లేదు.