కెప్టెన్సీ బాధ్యతలతో సతమతమవుతున్న సూర్యకుమార్

టీమిండియా టీ20 కెప్టెన్సీ బాధ్యతలు చేపట్టినప్పటి నుంచి విధ్వంసకర బ్యాటర్ సూర్యకుమార్ యాదవ్ తన అసలు సిసలైన ఫామ్‌ను కోల్పోయి తీవ్రంగా ఇబ్బంది పడుతున్నాడు. కెప్టెన్సీ ఒత్తిడి అతని బ్యాటింగ్‌పై స్పష్టమైన ప్రభావాన్ని చూపుతోందని గణాంకాలే చెబుతున్నాయి. గతంలో బౌలర్లకు చుక్కలు చూపించిన సూర్య, ఇప్పుడు పరుగులు చేయడానికి నానా తంటాలు పడుతున్నాడు. ఆసియా కప్‌లో భాగంగా శుక్రవారం శ్రీలంకతో జరిగిన సూపర్ ఫోర్ మ్యాచ్‌లోనూ అతని పేలవ ఫామ్ కొనసాగింది.గత ఏడాది జులైలో రోహిత్ శర్మ నుంచి సూర్యకుమార్ కెప్టెన్సీ పగ్గాలు అందుకున్నాడు. అప్పటి నుంచి అతని బ్యాటింగ్ గణాంకాలు గణనీయంగా పడిపోయాయి. కెప్టెన్‌గా ఇప్పటివరకు 21 మ్యాచ్‌లలో 19 ఇన్నింగ్స్‌లు ఆడిన సూర్య, కేవలం 19.35 సగటుతో 329 పరుగులు మాత్రమే చేశాడు. ఇందులో రెండు అర్ధ సెంచరీలు ఉన్నాయి. ఆశ్చర్యకరంగా, బాధ్యతలు తీసుకున్న తర్వాత కేవలం ఆరుసార్లు మాత్రమే 20 పరుగుల మార్కును దాటగలిగాడు. 2024 అక్టోబర్‌లో బంగ్లాదేశ్‌పై చేసిన శతకమే కెప్టెన్‌గా అతనికి చివరి చెప్పుకోదగ్గ ఇన్నింగ్స్.ఈ ఏడాది (2025) సూర్యకుమార్ ప్రదర్శన మరింత దారుణంగా ఉంది. 10 ఇన్నింగ్స్‌లలో కేవలం 12.37 సగటుతో 99 పరుగులు మాత్రమే సాధించాడు. అతని అత్యధిక స్కోరు 47 నాటౌట్. కెప్టెన్సీకి ముందు 43.33గా ఉన్న అతని బ్యాటింగ్ సగటు ఇప్పుడు 37.59కి పడిపోవడం ఆందోళన కలిగించే విషయం. ప్రస్తుతం జరుగుతున్న ఆసియా కప్‌లో ఐదు ఇన్నింగ్స్‌లలో 23.66 సగటుతో కేవలం 71 పరుగులే చేశాడు.దుబాయ్‌లో శ్రీలంకతో జరిగిన మ్యాచ్‌లో మిగతా బ్యాటర్లు రాణిస్తున్నా, సూర్యకుమార్ మాత్రం తడబడ్డాడు. క్రీజులో కుదురుకోవడానికి సమయం తీసుకున్నప్పటికీ, లంక స్పిన్నర్ వనిందు హసరంగ బౌలింగ్‌లో విఫలమయ్యాడు. స్వీప్ షాట్ ఆడేందుకు ప్రయత్నించి బంతిని అంచనా వేయడంలో విఫలమవడంతో అది నేరుగా ప్యాడ్లను తాకింది. దీంతో 13 బంతుల్లో 12 పరుగులు చేసి ఎల్బీడబ్ల్యూగా వెనుదిరిగాడు. డీఆర్‌ఎస్ తీసుకున్నా ఫలితం మారలేదు. ఈ వరుస వైఫల్యాలు సూర్యకుమార్‌పై కెప్టెన్సీ భారం ఎంతగా ఉందో స్పష్టం చేస్తున్నాయి