మన కాలేజీలను ఎవరూ పట్టించుకోరు! అమెరికా యూనివర్సిటీల ఆందోళన

అమెరికా అధ్యక్షుడు డొనాల్డ్ ట్రంప్ పోకడలు, వాణిజ్య యుద్ధాలు.. విదేశాలకే కాదు, స్వదేశంలోనూ ఇబ్బందికరంగా మారాయి. జాతీయ భద్రత పేరుతో.. అంతర్జాతీయ విద్యార్థులను ఇబ్బంది పెట్టేందుకు ట్రంప్ యంత్రాంగం తీసుకొచ్చిన కొత్త నిబంధనల పట్ల వ్యతిరేకత వస్తోంది. అమెరికాలోని ఉన్నత విద్యాసంస్థల సంఘాలు.. ఆ నిబంధనలు వెనక్కు తీసుకోవాల్సిందిగా తాజాగా ప్రభుత్వానికి విజ్ఞప్తి చేశాయి. కొత్త రూల్స్ వల్ల విద్యార్థుల చదువుకు ఆటంకం కలగడమే కాకుండా.. అమెరికా ఉన్నత విద్యాసంస్థలకు కూడా నష్టం వస్తుందని ఆవేదన వ్యక్తం చేశారు. ఇలా అయితే అమెరికా యూనివర్సిటీలపై విదేశీ విద్యార్థులు ఆసక్తి చూపరని చెప్పారు.

ఎఫ్-1 వీసాపై అమెరికాలో చదువుతున్న అంతర్జాతీయ విద్యార్థులు, జే-1 వీసా కలిగిన ఎక్ఛేంజ్ విజటర్ల 'డ్యురేషన్ ఆఫ్ స్టేటస్' (D/S)ను మారుస్తూ డిపార్ట్‌మెంట్ ఆఫ్ హోం ల్యాండ్ సెక్యూరిటీ (DHS) ఇటీవల కొత్త నిబంధనలు తీసుకొచ్చింది. కోర్సు కాలంతో సంబంధం లేకుండా.. అందరికీ నాలుగేళ్ల వీసా వ్యవధిని ఫిక్స్ చేసింది. దీన్ని అమెరికా ఉన్నత విద్యాసంస్థలు వ్యతిరేకిస్తున్నాయి. అమెరికా ఉన్నత విద్యాసంస్థల అసోషియేషన్.. అమెరికన్ కౌన్సిల్ ఫర్ ఎడ్యుకేషన్‌తో పాటు మరో 53 సంఘాలు అసంతృప్తి వ్యక్తం చేశాయి.

కొత్త నిబంధనలు తప్పుల తడకగా ఉన్నాయన్నాయి అమెరికా ఉన్నత విద్యా సంస్థల సంఘాలు. లేని సమస్యను ట్రంప్ పరిష్కరించడానికి కొత్త నిబంధనలు తీసుకొచ్చారని ఎద్దేవా చేశారు. ఈ రూల్స్ అమలైతే అంతర్జాతీయ విద్యార్థులు అవకాశాలు కోల్పోతారని, వారు అమెరికా యూనివర్సిటీలను ఎంచుకోకుండా చేస్తుందని ఆందోళన వ్యక్తం చేశారు. అందుకే తాజాగా ఈ సంఘాలన్నీ.. కొత్త నిబంధనలు వెనక్కు తీసుకోవాలని DHSను కోరాయి.

పాత రూల్స్ ప్రకారం.. ఎఫ్-1, జే-1 వీసా వీసాలు కలిగిన విద్యార్థులకు.. కోర్సు ఎంత కాలం ఉంటే.. అంత కాలం వీసా గడువు ఉండేది. ఒకవేళ.. వేరే కాలేజీకి ట్రాన్స్‌ఫర్ అయినా, కొత్త కోర్సు తీసుకున్నా.. అమెరికాలో చట్టబద్ధంగా ఉండేందుకు వీలు ఉండేది. ఇక కోర్సు ముగిసిన తర్వాత అమెరికా వదిలి వెళ్లడానికి, వేరే కాలేజీకి మారడానికి, ఓపీటీ లేదా హెచ్1బీ వీసాకు అప్లై చేసుకోవడానికి 60 రోజుల గ్రేస్ పీరియడ్ ఉండేది. ఇంగ్లీష్ లాంగ్వేజ్ ప్రోగ్రామ్స్‌పై పరిమితి ఉండేది కాదు. కానీ ఆగస్టు 28 ICE (ఇమ్మిగ్రేషన్ అండ్ కస్టమ్స్ ఎన్‌ఫోర్స్‌మెంట్) రూల్స్‌లో ఇవన్నీ మారాయి.

ఏమిటీ కొత్త రూల్స్?

కోర్సుతో కాలంతో సంబంధం లేకుండా అందరికీ అత్యధికంగా 4 ఏళ్ల గడువును విధించారు. వేరే కాలేజీ లేదా కోర్సుకు మారాలన్నా కఠినమైన నిబంధనలు తీసుకొచ్చారు. గ్రేస్ పీరియడ్‌ను 60 నుంచి 30 రోజులకు తగ్గించారు. ఇంగ్లీష్ లాంగ్వేజ్ ప్రోగ్రామ్స్‌పై 24 నెలల పరిమితి విధించారు. నాలుగేళ్ల కంటే ఎక్కువ సమయం పట్టే కోర్సులు (పీహెచ్‌డీ, జాయింట్ డిగ్రీ, మెడికల్ రెసిడెన్సీ) తీసుకుంటే.. కచ్చితంగా ఎక్స్‌టెన్షన్ ఆఫ్ స్టేటస్ (EOS)కు దరఖాస్తు చేసుకోవాలి. వీటివల్ల ఎక్కువ సమయం వృథా అవడమే కాకుండా ప్రభుత్వంపై భారం పడుతుంది. విద్యార్థుల చదువుకు కూడా అడ్డంకులు ఎదురవుతాయి. అందుకే అమెరికాలోని చాలా విద్యాసంస్థలు కొత్త రూల్స్‌ను వ్యతిరేకిస్తున్నాయి.