రేపటి నుంచి కొత్త రైలు నిబంధనలు: ప్రయాణికులకు కీలక సమాచారం..!

భారతీయ రైల్వే తాజాగా ప్రయాణికులకు సంబంధించి కీలక మార్పులు చేసింది. రైల్వే బోర్డు తీసుకున్న తాజా నిర్ణయం ప్రకారం, ఇకపై జనరల్‌ రిజర్వేషన్‌ టికెట్ల బుకింగ్ సమయంలో ఆధార్‌ అథంటికేషన్‌ తప్పనిసరి కానుంది.ఈ మార్గదర్శకాలు అక్టోబర్‌ 1 నుండి అధికారికంగా అమల్లోకి రానున్నాయి. మారిన నిబంధనల ప్రకారం, జనరల్‌ టికెట్ బుకింగ్ సమయంలో ఆధార్ నంబర్ ఎంటర్ చేయడం తప్పనిసరి. అయితే, ఇది టికెట్లు విడుదలైన ప్రారంభ 15 నిమిషాలకు మాత్రమే వర్తించనుంది.రైల్వే బోర్డు వెల్లడించిన వివరాల ప్రకారం, టికెట్ల బుకింగ్ వ్యవస్థలో పారదర్శకత తీసుకురావడమే కాకుండా, ఏజెంట్లు మరియు బ్రోకర్లు టికెట్లు బ్లాక్ చేసే మోసాలను అడ్డుకోవడమే లక్ష్యం. దీనివల్ల సాధారణ ప్రయాణికులకు మరింత అవకాశాలు లభించనున్నాయి.ఈ ఆధార్‌ అథంటికేషన్ విధానం IRCTC వెబ్‌సైట్ మరియు మొబైల్ యాప్ రెండింటిలోనూ అమలులో ఉంటుంది. రైల్వే అధికారులు వెల్లడించినట్టు, కొన్ని సాఫ్ట్‌వేర్‌ల సహాయంతో ఏజెంట్లు టికెట్లు ముందుగానే బుక్‌ చేసేస్తున్నట్టు గుర్తించారు. దీంతో, సాధారణ ప్రయాణికులకు టికెట్లు దక్కడం కష్టమవుతోంది.ఇకపై రాత్రి 12:20 గంటలకు టికెట్ల బుకింగ్‌ మొదలవుతుంది. మొదటి 15 నిమిషాల్లో టికెట్లు బుక్ చేయాలంటే ఆధార్ అథంటికేషన్ తప్పనిసరి. ఆ తర్వాత, టికెట్లు అందుబాటులో ఉన్నట్టైతే, ఆధార్ లేకుండానే బుకింగ్ చేయొచ్చు.ఇక, స్టేషన్‌లో ఉన్న రిజర్వేషన్ కౌంటర్ల వద్ద టికెట్ బుకింగ్ విషయంలో మాత్రం ఈ నిబంధన వర్తించదు. కౌంటర్ బుకింగ్ విధానంలో ఎలాంటి మార్పులు చేయలేదని రైల్వేశాఖ స్పష్టం చేసింది.రైల్వే బోర్డు ఈ మార్పులకు అనుగుణంగా అన్ని జోన్లు, సెంటర్ ఫర్ రైల్వే ఇన్ఫర్మేషన్ సిస్టమ్స్ (CRIS), మరియు IRCTCకి ప్రత్యేక సర్క్యూలర్ పంపింది. ప్రస్తుతం జనరల్‌ టికెట్ల అడ్వాన్స్‌ బుకింగ్ 60 రోజుల ముందు ప్రారంభమవుతోంది.ఈ కొత్త నిబంధనలతో పండుగల సీజన్‌లో టికెట్ల కోసం జరిగే పోటీకి కొంతమేర ఊరట కలగనుంది. మోసపూరితంగా టికెట్లు బ్లాక్ చేసే ప్రయత్నాలను నియంత్రించేందుకు ఇది ఒక మంచి నిర్ణయం కానుంది.