దేవరచర్ల గ్రామంలో దసరా పండుగ వేళ ఘోరం

ఆపదలో ఉన్న ప్రాణాన్ని కాపాడబోయిన ఇద్దరు యువకుల ప్రాణాలు గాల్లో కలిసిపోయాయి. దసరా పండుగ ఉత్సాహం మధ్య జరిగిన ఈ హృదయ విదారక సంఘటన.. నల్గొండ జిల్లా దేవరచర్ల గ్రామంలో చోటు చేసుకుంది. అయ్యో పాపం.. పండుగ కోసమని బంధువుల ఇళ్లకి వచ్చి.. తిరిగిరాని లోకాలకు వెళ్లిపోయారంటూ స్థానికులు కన్నీరు మున్నీరవుతున్నారు. పూర్తి వివరాల్లోకి వెళ్తే..

నల్గొండ జిల్లా చందంపేట మండలం పరిధిలోని దేవరచర్ల గ్రామంలోని దిండి వాగులో పండుగ పూట అత్యంత దురదృష్టకర సంఘటన జరిగింది. మొత్తం ముగ్గురు వ్యక్తులు గల్లంతయ్యారు. ఇందులో ఇద్దరు యువకులు ప్రాణాలు కోల్పోగా.. ఒక బాలుడి ఆచూకీ ఇంకా లభ్యం కాలేదు. దసరా పండుగ వేళ తెనాలి నుండి బంధువుల ఇంటికి వచ్చిన 10 ఏళ్ల బాలుడు సాయి ఉమాకాంత్ ప్రమాదవశాత్తు ఉధృతంగా ప్రవహిస్తున్న దిండి వాగులో పడిపోయి.. నీటి ప్రవాహంలో కొట్టుకుపోవడం చూసి స్థానికులు వెంటనే అప్రమత్తమయ్యారు.

సాహసంతో ప్రాణత్యాగం..

వాగులో కొట్టుకుపోతున్న ఆ పసివాడిని చూసి, అక్కడే ఉన్న ఇద్దరు యువకులు క్షణం కూడా ఆలోచించకుండా.. తమ ప్రాణాలకు తెగించి వాగులోకి దూకారు. పిల్లాడిని రక్షించాలనే ఏకైక లక్ష్యంతో వారు చేసిన ఈ నిస్వార్థ ప్రయత్నం విఫలమైంది. వాగు ప్రవాహం తీవ్రతకు ఆ ఇద్దరు యువకులు సైతం నీటిలో కొట్టుకుపోయారు. ఈ దుర్ఘటనలో మృతి చెందినవారు రాము (30), గోప (21)లను గుర్తించారు. వీరిలో రాము ఎంబీబీఎస్ విద్యార్థి కావడం మరింత బాధాకరం. బాలుడు సాయి ఉమాకాంత్ ఆచూకీ కోసం స్థానిక ప్రజలు, పోలీసులు, ఎన్డీఆర్‌ఎఫ్ బృందాలు గాలింపు చర్యలు ముమ్మరం చేశాయి.

పండుగ వేళ అలుముకున్న విషాదం..

సాహసం చేసి మృత్యువాత పడిన ఆ ఇద్దరు యువకుల త్యాగం మాటల్లో చెప్పలేనిది. బంధువుల ఇంట సంతోషంగా పండుగ జరుపుకోవాల్సిన సమయంలో.. ఆ కుటుంబాలలో తీవ్ర విషాదం అలుముకుంది. కొడుకును కోల్పోయిన ఆ తల్లిదండ్రుల రోదనలు, సాహసం చేసిన యువకులను తలచుకొని గ్రామస్థుల బాధ హృదయ విదారకంగా ఉంది.

ప్రమాదం జరిగిన వెంటనే స్థానికులు పోలీసులకు సమాచారం ఇవ్వడంతో.. అప్పటికప్పుడే సహాయక చర్యలు మొదలయ్యాయి. అయితే.. దిండి వాగు ఉధృతి కారణంగా గల్లంతైన బాలుడిని గుర్తించడం రెస్క్యూ బృందాలకు సవాలుగా మారింది. ఈ ఘటన యావత్ దేవరచర్ల గ్రామాన్ని శోకసంద్రంలో ముంచింది. ఆపదలో ఉన్న వారిని కాపాడాలనే మానవత్వం, సాహసం ఎంత గొప్పదైనా.. అనుకోని ప్రమాదాలు ఎంత కఠినంగా ఉంటాయో ఈ సంఘటన నిరూపించింది.