టీసీఎస్‌లో నైపుణ్యాలు లేని ఉద్యోగుల తొలగింపు ప్రక్రియ

దేశీయ ఐటీ దిగ్గజం టాటా కన్సల్టెన్సీ సర్వీసెస్  చేపట్టిన ఉద్యోగుల తొలగింపు ప్రక్రియ ఇప్పుడు అమెరికాలో తీవ్ర దుమారానికి కారణమైంది. సంస్థ అనుసరిస్తున్న నియామక, తొలగింపు విధానాలపై పలు అనుమానాలు వ్యక్తం చేస్తూ ఇద్దరు అమెరికన్ సెనెటర్లు కంపెనీ సీఈవో కె.కృత్తివాసన్‌కు నేరుగా లేఖ రాయడం సంచలనం సృష్టిస్తోంది. టీసీఎస్ ఇటీవలే అమెరికాలోని జాక్సన్‌విల్లే కార్యాలయంలో సుమారు 60 మంది ఉద్యోగులను తొలగించింది. ఇదే సమయంలో, 2025 సంవత్సరానికి గాను 5,505 హెచ్-1బీ వీసాలకు కంపెనీ అనుమతి పొందడాన్ని సెనెట్ జ్యుడిషియరీ కమిటీ చైర్మన్ చార్లెస్ గ్రాస్‌లే, సభ్యుడు రిచర్డ్ డర్బిన్ తీవ్రంగా తప్పుపట్టారు. సెప్టెంబర్ 24న సీఈవోకు రాసిన లేఖలో, "ఒకవైపు అమెరికన్లను ఉద్యోగాల నుంచి తొలగిస్తూ, మరోవైపు వేలాదిగా హెచ్-1బీ వీసాల కోసం దరఖాస్తు చేసుకోవడం ఏమిటి అని వారు నిలదీశారు. తమ దేశంలో అర్హులైన ఉద్యోగులను టీసీఎస్ గుర్తించలేకపోతోందనడాన్ని నమ్మలేకపోతున్నామని వారు వ్యాఖ్యానించారు.వయసు పైబడిన అమెరికన్ ఉద్యోగులను ఉద్దేశపూర్వకంగా తొలగించి, వారి స్థానంలో దక్షిణాసియా దేశాల నుంచి హెచ్-1బీ వీసాలపై తక్కువ జీతాలకు ఉద్యోగులను నియమించుకుంటున్నారనే ఆరోపణలు టీసీఎస్‌పై చాలాకాలంగా ఉన్నాయి. దీనిపై అమెరికాకు చెందిన ‘ఈక్వల్ ఎంప్లాయ్‌మెంట్ ఆపర్చునిటీ కమిషన్’ ఇప్పటికే దర్యాప్తు చేస్తోంది. ఈ నేపథ్యంలో, అమెరికన్ల స్థానంలో హెచ్-1బీ వీసాదారులను నియమిస్తున్నారా వారి జీతభత్యాల్లో ఏమైనా తేడాలు ఉన్నాయా వంటి కీలక ప్రశ్నలకు అక్టోబర్ 10వ తేదీలోగా పూర్తి వివరాలతో సమాధానం ఇవ్వాలని సెనెటర్లు టీసీఎస్‌ను ఆదేశించారు.మరోవైపు, టీసీఎస్ ప్రపంచవ్యాప్తంగా ‘సిబ్బంది పునర్వ్యవస్థీకరణ’ పేరుతో నైపుణ్యాలు పెంచుకోని ఉద్యోగులను తొలగిస్తోంది. 2025-26 ఆర్థిక సంవత్సరంలో దాదాపు 12,000 మందిని (2% సిబ్బందిని) తగ్గించుకోనున్నట్లు జూలైలోనే ప్రకటించింది. తొలగించిన ఉద్యోగులకు వారి సర్వీసును బట్టి 3 నెలల నుంచి రెండేళ్ల వరకు వేతనాన్ని ప్యాకేజీగా అందిస్తోంది. అయితే, 8 నెలలకు పైగా ఏ ప్రాజెక్టులోనూ లేకుండా బెంచ్‌పై ఉన్నవారికి కేవలం మూడు నెలల వేతనం మాత్రమే చెల్లిస్తోంది.