సీఎం చంద్రబాబు పర్యటనకు ముందు బాంబు కలకలం

ముఖ్యమంత్రి చంద్రబాబు పర్యటనకు ముందు బాంబు బెదిరింపు కలకలం రేపుతోంది. తిరుపతిలోని శ్రీ వెంకటేశ్వర వ్యవసాయ యూనివర్సిటీలో బాంబు ఉందని గుర్తుతెలియని వ్యక్తుల నుంచి బెదిరింపు మెయిల్ వచ్చింది. అందులో సీఎం చంద్రబాబు దిగే హెలిప్యాడ్ వద్ద 5 ఆర్‌డీఎక్స్‌, ఐఈడీలు అమర్చినట్లు ఉంది. దీంతో అప్రమత్తమైన యూనివర్సిటీ సిబ్బంది.. పోలీసులకు సమాచారం అందించారు. వెంటనే రంగంలోకి దిగిన భద్రతా బలగాలు.. బాంబ్, డాగ్ స్వ్కాడ్‌తో యూనివర్సిటీకి చేరుకుని తనిఖీ చేస్తున్నాయి. తరగతి గదుల నుంచి విద్యార్థులందరినీ బయటకు పంపి.. హెలిప్యాడ్ పరిసర ప్రాంతాలన్నీ జల్లెడ పడుతున్నాయి భద్రతా బలగాలు. అనుమానం వచ్చిన ప్రతి వస్తువును దూరంగా తీసుకెళ్లి క్షుణ్ణంగా తనిఖీ చేస్తున్నారు.

ఇదే కాదు.. ఇంతకుముందు కూడా తిరుపతిలో బాంబులు ఉన్నట్లు బెదిరింపులు వచ్చాయి. అక్టోబర్ 3న తిరుపతిలోని పలు ప్రాంతాలకు బాంబు అమర్చినట్లు గుర్తుతెలియని వ్యక్తులు బెదిరింపులకు పాల్పడ్డారు. వీటిని ఐఎస్ఐ, మాజీ ఎల్‌టీటీఈ మిలిటెంట్లు చేసినట్లు అనుమానాలు వ్యక్తమయ్యాయి. తిరుపతి ఆర్టీసీ బస్టాండ్‌తో పాటు విష్ణు నివాసం, శ్రీనివాసం, గోవిందరాజుల స్వామి ఆలయం, కపిల తీర్థం ఆలయం పరిసర ప్రాంతాల్లో బాంబులు పేలుతాయని బెదిరించారు. వీటితో తాజా బెదిరింపులకు ఏమైనా సంబంధం ఉందా అనే ఆందోళనలు వ్యక్తమవుతున్నాయి.

ఈ ఏడాది ఫిబ్రవరి 6న తిరుపతిలోని శ్రీ వెంకటేశ్వర వ్యవసాయ కళాశాలకు గుర్తుతెలియని నంబర్‌ నుంచి ఫోన్ కాల్ వచ్చింది. క్యాంపస్‌లో బాంబు అమర్చినట్లు ఫోన్‌లో బెదిరించారు. తర్వాత అది బూటకమని తేలింది. కాగా, తిరుపతి విమానాశ్రయం, నగరంలోని అనేక ప్రముఖ హోటళ్లకు వరుస బెదిరింపులు వచ్చిన రెండు నెలల తర్వాత ఈ కాల్ వచ్చింది.

సీఎం చంద్రబాబు పర్యటన రద్దు..!

ఇటీవల తిరుపతి వచ్చేందుకు సిద్ధమైన ఏపీ సీఎం చంద్రబాబు నాయుడు.. ఆఖరి క్షణంలో ఆగిపోవాల్సి వచ్చింది. వాతావరణం అనుకూలంగా లేకపోవడం వల్ల ఆయన తిరుపతి పర్యటన రద్దు అయింది. అమరావతి, తిరుపతి మధ్య ఆకాశం మేఘావృతమై ఉండటంతో ఏవియేషన్‌ అధికారులు హెలికాప్టర్‌కు అనుమతి ఇవ్వలేదు. దీంతో ముఖ్యమంత్రి పర్యటన రద్దయింది.

ఇటీవల తమిళనాడులో కూడా బాంబు బెదిరింపులు కలకలం సృష్టించాయి. రాజ్‌భవన్‌తో పాటు సీఎం ఎంకే స్టాలిన్, బీజేపీ కార్యాలయం, నటి త్రిష.. ఇలా తదితరుల ఇళ్లకు కూడా ఈ-మెయిల్‌ ద్వారా బాంబు బెదిరింపులు వచ్చాయి. అయితే పోలీసుల తనిఖీల్లో ఈ బెదిరింపులు బూటకమని తేలింది. ఈ ఘటనపై పోలీసులు కేసు నమోదు చేశారు. కాగా వరుసగా జరుగుతున్న ఇలాంటి ఘటనలు ఆందోళన కలిగిస్తున్నాయి.