దగ్గు సిరప్ కలకలం: రాష్ట్రాలకు కేంద్రం కీలక ఆదేశాలు!

మధ్యప్రదేశ్‌లో దగ్గు మందు (కాఫ్ సిరప్) తాగిన పసిపిల్లలు మరణించడంతో దేశవ్యాప్తంగా ఒక్కసారిగా ఆందోళన తలెత్తింది. ఈ ఘటన నేపథ్యంలో ఇప్పటికే అనేక రాష్ట్రాలు దగ్గు మందుల పంపిణీ, వినియోగంపై కఠిన నిఘా ఏర్పాటు చేశాయి.కేంద్రం కూడా వైద్యారోగ్య శాఖ అధికారులను అప్రమత్తం చేసింది. ఇక తాజాగా, రాష్ట్ర ప్రభుత్వాలు మరియు కేంద్ర పాలిత ప్రాంతాలకు కేంద్రం తీవ్రమైన సూచనలు జారీ చేసింది. ఈ మార్గదర్శకాలను తప్పనిసరిగా పాటించాలని స్పష్టంగా తెలియజేసింది.డీసీజీఐ అడ్వైజరీ – ముడి పదార్థాల తనిఖీలు తప్పనిసరి జాతీయ ఔషధ నియంత్రణాధికారి డాక్టర్ రాజీవ్ సింగ్ రఘువంశీ అన్ని రాష్ట్రాల ఔషధ నియంత్రణ సంస్థలకు అధికారికంగా ఒక అడ్వైజరీ పంపారు. అందులో, దగ్గు మందులు మరియు ఇతర ఔషధాల తయారీలో ఉపయోగించే ముడి పదార్థాలు, సహాయక పదార్థాలు (excipients) ను తయారీకి ముందు కచ్చితంగా పరీక్షించాలని స్పష్టం చేశారు.ఇలాంటి కఠిన తనిఖీలు ముందు నుంచే అమలులో ఉన్నట్లయితే, గతంలో రాజస్థాన్, జమ్మూ, విదేశాల్లో చోటుచేసుకున్న పిల్లల మరణాలు నివారించగలిగేవి అని నిపుణులు అభిప్రాయపడుతున్నారు.విషపూరిత ద్రావకాల ముప్పు – తగిన చర్యలు తీసుకోవాలి.గతంలో జరిగిన పలు పరిశోధనల ప్రకారం, కొన్ని సిరప్‌లలో డైథిలిన్ గ్లైకాల్ మరియు ఇథిలీన్ గ్లైకాల్ వంటి పారిశ్రామిక వాడుకల కోసం ఉన్న విషపూరిత ద్రావకాలు కలిగి ఉన్నాయని నిర్ధారణైంది. ఇవి సరిగ్గా తనిఖీ చేయకపోవడం వల్లే ప్రమాదాలు సంభవిస్తున్నట్లు చెబుతున్నారు.ఈ నేపథ్యంలో, మధ్యప్రదేశ్‌లో తాజాగా జరిగిన సంఘటనతో కేంద్రం అన్ని రాష్ట్రాలు మరియు కేంద్ర పాలిత ప్రాంతాలు దగ్గు సిరప్ తయారీలో వాడే ముడి పదార్థాలపై మరింత గట్టి నిఘా పెట్టాలని సూచించింది.తనిఖీల్లో తలెత్తిన లోపాలు – కేంద్రం హెచ్చరికడ్రగ్ కంట్రోలర్ జనరల్ ఆఫ్ ఇండియా (DCGI) ఇటీవల చేపట్టిన తనిఖీల్లో, అనేక దగ్గు సిరప్ తయారీ సంస్థలు ప్రతి బ్యాచ్‌కు అవసరమైన పరీక్షలు చేయకపోవడమే కాకుండా, అమల్లో ఉన్న ప్రమాణాలను పాటించడంలో విఫలమయ్యాయని తేలిందని కేంద్రం వెల్లడించింది.1945 డ్రగ్స్ రూల్స్ ప్రకారం, ప్రతి బ్యాచ్‌ను అమోదిత ప్రయోగశాలల్లో పరీక్షించడం, సంబంధిత పూర్తి రికార్డులు నిర్వహించడం తప్పనిసరి అని కేంద్రం గుర్తు చేసింది. ఈ నియమాలను ఉల్లంఘిస్తే కఠిన చర్యలు తప్పవని గట్టిగా హెచ్చరించింది.