ఉద్యోగమయ్యాక కోడింగ్ నేర్చుకుని మరీ..సెక్యూరిటీ గార్డు నుంచి సాఫ్ట్‌వేర్ ఇంజినీర్‌గా

బాగా చదువుకుంటునే మంచి ఉద్యోగం వస్తుంది.. లైఫ్‌లో బాగా సెటిల్ అవ్వొచ్చు అంటూ చిన్నప్పటి నుంచి సంవత్సరాల పాటు చదివిస్తుంటారు చాలా మంది. అయితే ఇంత చదివినా ఉద్యోగం రాక చాలా మంది అవస్థలు పడుతుంటే.. అసలేమీ చదువుకోకుండానే సాఫ్ట్‌వేర్ ఇంజినీర్ అయిపోయాడో కుర్రాడు. అలా అని అతడేమీ నకిలీ ధ్రువపత్రాలు పెట్టలేదు, ఎలాంటి గ్యాంబ్లింగూ చేయలేదు. ముఖ్యంగా తన గురించి బాగా తెలిసిన.. అందులోనూ తాను సెక్యూరిటీ గార్డుగా పని చేసిన కంపెనీలోనే సాఫ్ట్‌వేర్ ఇంజినీర్ ఉద్యోగం సంపాదించుకున్నాడు. మరి ఇదంతా ఎలా సాధ్యం అయింది, అసలు ఓ సెక్యూరిటీ గార్డుకు సదరు కంపెనీ ఇంత పెద్ద ఉద్యోగం ఎలా ఇచ్చిందో మనం ఇప్పుడు తెలుసుకుందాం పదండి.

డిగ్రీలు, ధ్రువపత్రాల కంటే నిజమైన నైపుణ్యానికే విలువ ఇవ్వాలనే సూత్రాన్ని ప్రముఖ టెక్నాలజీ సంస్థ జోహో (Zoho) మరోసారి నిరూపించింది. ఒకప్పుడు తమ కంపెనీలోనే సెక్యూరిటీ గార్డుగా పని చేసిన ఓ వ్యక్తికి.. సాఫ్ట్‌వేర్ ఇంజినీర్‌గా పదోన్నతి కల్పించింది. అస్సాం రాష్ట్రానికి చెందిన అబ్దుల్ అలీం అనే యువకుడు ఈ అద్భుతమైన అవకాశాన్ని దక్కించుకున్నారు. అలీం ఒకప్పుడు జోహో కంపెనీ ఆవరణలో సెక్యూరిటీ గార్డుగా పని చేసేవారు. ఆయన విధి కేవలం భద్రతను పర్యవేక్షించడం మాత్రమే. అయితే తన ఉద్యోగంతో సంతృప్తి చెందని అలీం.. తన జీవితాన్ని మార్చుకోవాలని నిశ్చయించుకున్నారు.

ముఖ్యంగా ఆ కంపెనీలో పని చేసే ఉద్యోగులను చూసి తాను కూడా వారిలా మంచి ఉద్యోగాన్ని దక్కించుకోవాలనుకున్నారు. కోడింగ్ నేర్చుకుంటే జీవితం బాగుంటుందని భావించిన అతడు.. తన పని వేళలు ముగిశాకా కోడింగ్ నేర్చుకోవడంపై దృష్టి పెట్టారు. ఆన్‌లైన్‌లో వీడియోలు చూస్తూ.. పుస్తకాలు చదువుతూనే సొంతంగా కోడింగ్ నేర్చుకున్నారు. రాత్రుళ్లు తక్కువగా నిద్రపోతూ.. ఎక్కువ సమయాన్ని కోడింగ్ నైపుణ్యాలను పెంచుకోవడానికి వాడుకున్నారు. తనకు కోడింగ్ మీద ఎంత పట్టు వచ్చిందో తెలుసుకోవడానికి సొంతంగా ఒక అప్లికేషన్‌ను కూడా రూపొందించారు.

అంతటితో ఆగకుండా తాను రూపొందించిన అప్లికేషన్‌, తాను సంపాదించుకున్న నైపుణ్యాలను అబ్దుల్ అలీం జోహో కంపెనీ ఉన్నతాధికారుల దృష్టికి తీసుకెళ్లారు. కంపెనీ యాజమాన్యం ఆయన ప్రతిభను, అంకితభావాన్ని గుర్తించింది. ఇక్కడ అలీంకు అధికారిక ఇంజనీరింగ్ డిగ్రీ ఉందా? లేదా? అనే విషయాన్ని కూడా పట్టించుకోకుండా.. ఆయనలో ఉన్న నిజమైన ప్రతిభకు విలువ ఇచ్చింది. ఎవరూ ఊహించని విధంగా ఆయనకు సాఫ్ట్‌వేర్ ఇంజినీర్‌గా పదోన్నతి కల్పించింది. తన కలల ఉద్యోగాన్ని.. తాను సెక్యూరిటీ గార్డుగా పని చేసిన చోటే దక్కించుకోవడంతో.. అతడి ఆనందానికి అవధులు లేకుండా పోయాయి. ప్రస్తుతం ఇందుకు సంబంధించిన వార్త నెట్టింట వైరల్ అవుతుండగా.. అంతా షాక్ అవుతున్నారు.

సర్టిఫికేట్లు, చదువు వంటివి ఏమీ చూడకుండా.. వ్యక్తి టాలెంట్‌ను మాత్రమే పరిగణలోకి తీసుకుని సెక్యూరిటీ గార్డుకు సాఫ్ట్‌వేర్ ఇంజినీర్ ఉద్యోగాన్ని కట్టబెట్టడం చాలా సంతోషంగా ఉందంటూ అనేక మంది ప్రశంలు కురిపిస్తున్నారు. జోహోకు సెల్యూట్ అంటూ కామెంట్లు చేస్తున్నారు. మరి అబ్దుల్ అలీం సక్సెస్ చూస్తే మీకేమనిపిస్తుందో కామెంట్ల రూపంలో తెలియజేయండి.