కేంద్రం కొత్త పథకం.. ఏపీలో ఆ నాలుగు జిల్లాల రైతులకు పండగే

రైతుల కోసం అనేక కార్యక్రమాలు అమలు చేస్తున్న కేంద్ర ప్రభుత్వం.. తాజాగా మరో పథకం అమలుకు శ్రీకారం చుట్టింది. రైతులకు పెట్టుబడి సాయం అందించేందుకు పీఎం కిసాన్ యోజన, ప్రకృతి వైపరీత్యాల కారణంగా పంటనష్టం సంభవించినప్పటికీ అన్నదాతలను ఆదుకోవాలనే ఉద్దేశంతో వాతావరణ ఆధారిత బీమా, పీఎం ఫసల్ బీమా యోజన వంటి పథకాలను కేంద్రం అమలు చేస్తోంది. తాజాగా నీటిపారుదల సౌకర్యాలను మెరుగుపరచటం, వ్యవసాయ ఉత్పాదకత పెంపు, రైతులకు సులభంగా రుణాలు అందించే ఉద్దేశంతో ప్రధానమంత్రి ధనధాన్య కృషి యోజన అనే పథకాన్ని కేంద్రం తీసుకువచ్చింది. దేశవ్యాప్తంగా ఎంపిక చేసిన వంద జిల్లాలలో ధనధాన్య కృషి యోజనను ప్రధానమంత్రి నరేంద్ర మోదీ శనివారం ప్రారంభించారు.

మరోవైపు ప్రధానమంత్రి ధనధాన్య కృషి యోజనకు ఏపీలోని నాలుగు జిల్లాలను కూడా ఎంపిక చేశారు. అనంతపురం, శ్రీసత్యసాయి జిల్లా, అల్లూరి సీతారామరాజు జిల్లా, అన్నమయ్య జిల్లాలను ధనధాన్య కృషి యోజనకు ఎంపిక చేశారు. ఈ పథకంలో భాగంగా ఈ జిల్లాల్లో వ్యవసాయ ఉత్పాదకత పెంచేందుకు చర్యలు చేపడతారు. అందులో భాగంగా పంటల మళ్లింపు, పంట మార్పిడి విధానాల ద్వారా సేద్యాన్ని లాభసాటిగా మార్చేందుకు ప్రోత్సాహం అందిస్తారు. అలాగే స్థిరమైన వ్యవసాయ పద్ధతుల అనుసరణ, పంటను నిలువ చేసుకునేందుకు పంచాయతీ, మండల స్థాయిలో సౌకర్యాల కల్పనపై దృష్టి సారిస్తారు. రైతులకు ఉపయోగకరంగా ఉండేలా వారికి సులభంగా రుణాలు అందేలా చూస్తారు. రైతుల ఆర్థిక పరిస్థితిని మెరుగుపరచడం కూడా ఈ పథకం ఉద్దేశం.

ఇక ప్రధానమంత్రి ధనధాన్య కృషి యోజన అమల్లో భాగంగా ప్రతి జిల్లాకు ఓ సీనియర్ ఐఏఎస్ అధికారిని నోడల్ ఆఫీసర్‌గా నియమించారు. పథకం కోసం దేశంలో వ్యవసాయపరంగా తక్కువ ఉత్పాదకత ఉన్న జిల్లాలను ఎంపిక చేశారు. ఆయా జిల్లాల్లో ఉత్పాదకత పెంచేందుకు చర్యలు తీసుకుంటారు. ధనధాన్య కృషి యోజన కోసం ఆరేళ్లలో రూ.24 వేల కోట్లు కేంద్రం ఖర్చు చేయనుంది. మొత్తం 36 పథకాలను సమ్మిళితం చేసి ధనధాన్య కృషి యోజనఅమలుచేస్తారు. ఈ పథకం ద్వారా 1.7 కోట్లమంది రైతులకు ఉపయోగం కలుగుతుందని అధికారులు అంచనా వేస్తున్నారు.