భక్తుల కోసం.. వచ్చే రెండు నెలల్లో.. టీటీడీలో కీలక సంస్కరణలు

తిరుమల తిరుపతి దేవస్థానంలో వచ్చే రెండు నెలల్లో కీలక సంస్కరణలు చోటుచేసుకునే అవకాశాలు కనిపిస్తున్నాయి. ఈ విషయాన్ని టీటీడీ బోర్డు ఛైర్మన్ బీఆర్ నాయుడు వెల్లడించారు. టీటీడీలో బదిలీలను అమలు చేయడంలో జాప్యం కొంత అసంతృప్తికి కారణమైందన్న ఆయన.. ఆలయ పరిపాలనా వ్యవహారాలపై కూడా ప్రభావం చూపిందని అభిప్రాయపడ్డారు. గత వైసీపీ హయాంలో కొంతమంది అధికారులను తిరుమల ఆలయంలో కీలక పదవులకు నియమించారన్న టీటీడీ ఛైర్మన్ బీఆర్ నాయుడు.. ఇటీవలి వరకు వారు పదవుల్లో కొనసాగారని అన్నారు. పరిపాలన పునర్వవస్థీకరణలో భాగంగా కొంతమంది అధికారులను బదిలీ చేశామన్న టీటీడీ ఛైర్మన్.. వీరిలో కొంతమంది సున్నిత సమాచారాన్ని లీక్ చేసేవారని ఆరోపించారు.

ముఖ్యమంత్రి నారా చంద్రబాబు నాయుడు నిబద్ధత, దార్శనికత, లక్షలాది మంది భక్తుల ఆకాంక్షలకు అనుగుణంగా టీటీడీ పరిపాలనను క్రమబద్ధీకరించే దిశగా ఇది తొలి అడుగుగా టీటీడీ ఛైర్మన్ అభివర్ణించారు. తిరుమలకు వచ్చే శ్రీవారి భక్తులకు మరింత మెరుగ్గా సేవలు అందించేందుకు, మెరుగైన దర్శన అనుభవం అందించే ఉద్దేశంతోటీటీడీ బోర్డు వచ్చే రెండు నెలల్లో కీలక సంస్కరణలను తీసుకువచ్చే పనిలో ఉందని టీటీడీ ఛైర్మన్ బీఆర్ నాయుడు అన్నారు.

చంద్రగిరి కోదండరామాలయంలో పవిత్రోత్సవాలు

మరోవైపు చంద్రగిరిలోని కోదండరామస్వామి ఆలయంలో అక్టోబ‌రు 12 నుంచి మూడు రోజులపాటు పవిత్రోత్సవాలు జరుగుతున్నాయి. ఈ పవిత్రోత్సవాలకు శనివారం అంకురార్పణ జరగ్గా.. నేటి నుంచి ప్రారంభమయ్యాయి. కోదండరామస్వామి ఆలయంలో ఏడాది పొడవునా అర్చనలు, ఉత్సవాలు నిర్వహిస్తుంటారు. అయితే ఇలాంటి సమయాల్లో తెలియక దోషాలు జరుగుతుంటాయి. ఈ దోషాల వలన ఆలయ పవిత్రతకు ఎలాంటి లోపం రానీయకుండా పవిత్రోత్సవాలు నిర్వహిస్తారు.

పవిత్రోత్సవాల్లో భాగంగా అక్టోబరు 12వ తేదీ ఉదయం ఏడు నుంచి చతుష్టానార్చన, పవిత్రప్రతిష్ఠ నిర్వహించారు. సాయంత్రం పవిత్ర హోమాలు జరుగుతాయి. రేపు యాగ‌శాల‌లో వైదిక కార్యక్రమాలు నిర్వహిస్తారు. అక్టోబరు 14వ తేదీ ఉదయం మ‌హా పూర్ణాహూతి, కుంభప్రోక్షణ, స్నప‌న తిరుమంజ‌నం, చ‌క్రస్నానం, వీధి ఉత్సవం నిర్వహిస్తారు. ఈ విషయాన్ని తిరుమల తిరుపతి దేవస్థానం ఓ ప్రకటనలో వెల్లడించింది.