అందుకే ఇన్ని రోజులు సైలెంట్‌గా ఉన్నా..కోట వినుత సెల్ఫీ వీడియో

తిరుపతి జిల్లా శ్రీకాళహస్తి రాజకీయాలు మరోసారి వేడెక్కాయి. శ్రీకాళహస్తి జనసేన బహిష్కృత నేత కోట వినుత డ్రైవర్ రాయుడు హత్యోదంతం మరోసారి వార్తల్లోకి ఎక్కింది. చనిపోకముందు రాయుడు తీసినట్లుగా చెప్తున్న సెల్ఫీ వీడియో.. ఇప్పుడు హాట్ టాపిక్‌గా మారింది. సుమారుగా 19 నిమిషాలు ఉన్న ఆ వీడియోలో రాయుడు.. శ్రీకాళహస్తి టీడీపీ ఎమ్మెల్యే సుధీర్ రెడ్డి మీద చేసిన వ్యాఖ్యలు ఇప్పుడు చర్చనీయాంశమయ్యాయి. అయితే ఈ వ్యవహారం ఇలా ఉండగానే.. కోట వినుత సెల్ఫీ వీడియో విడుదల చేశారు. రాయుడు సెల్ఫీ వీడియో వైరల్ అవుతున్న సమయంలోనే వినుత కోట వీడియో విడుదల చేయడం ప్రాధాన్యం సంతరించుకుంది. డ్రైవర్ రాయుడు హత్య కేసులో తమకు ఎలాంటి ప్రమేయం లేదంటూ ఈ సెల్ఫీ వీడియోలో కోట వినుత చెప్పుకొచ్చారు. తాము తప్పు చేయలేదు కనుకే.. 19 రోజుల్లోనే బెయిల్ మీద బయటకు వచ్చామంటున్నారు. త్వరలోనే క్లీన్‌చిట్‌తో బయటపడతామంటున్నారు వినుత కోట..

" అందరికీ నమస్కారం. నేను వినుత కోట.. మీ తెలుగింటి ఆడబిడ్డను.. మనసు నిండా పుట్టెడు బాధతో మీ ముందుకు వచ్చా. చేయని తప్పుకు మేము జైలుకు వెళ్లినందుకు నాకు బాధ లేదు. కానీ.. మేము చంపామని ప్రచారం చేయడం చాలా బాధ కలిగిస్తోంది. అతని మరణంలో ( డ్రైవర్ రాయుడు) మా ప్రమేయం లేదని కోర్టు భావించింది కాబట్టే 19 రోజుల్లో నాకు బెయిల్ ఇచ్చింది. నెలలోనే అందరికీ బెయిల్ వచ్చింది. విదేశాల్లో లక్షల జీతం వదులుకుని రాజకీయాల్లోకి వచ్చింది.. ప్రజలకు మేలు చేయాలనే కానీ, ప్రాణాలు తీయడానికి కాదు. అలాంటి మనస్తత్వం మాకు లేదు. ఈ కేసులో క్లీన్‌చీట్‌తో బయటకు వస్తాం. ఈ కేసు చెన్నై కోర్టులో విచారణలో ఉన్నందున ఇంతకుమించి మాట్లాడలేం. మేము ఏ తప్పూ చేయలేదు. నిజాలు శివయ్యకు తెలుసు. ధైర్యంగా పోరాడతాం. పవన్ కళ్యాణ్‌ గారిని కలిసేందుకు ప్రయత్నిస్తున్నా. అందుకే ఇన్ని రోజులు దీనిపై మాట్లాడలేదు. త్వరలోనే దీనికి సంబంధించిన అన్ని ఆధారాలు, వీడియోలను బయటపడతా.." - కోట వినుత

డ్రైవర్ రాయుడు వీడియోలో ఏం ఉంది?

మరోవైపు రాయుడు సెల్ఫీ వీడియోగా చెప్తున్న దానిలో సంచలన ఆరోపణలు ఉన్నాయి. వినుత కోట, ఆమె భర్త కోట చంద్రబాబును చంపాలని కుట్ర చేసినట్లు ఆరోపణలు ఉన్నాయి. ఇందుకోసం ఎమ్మెల్యే సుధీర్ రెడ్డి రూ.30 లక్షలకు కుదుర్చుకున్నారని.. ముందుగా రూ.20 లక్షలు ఇచ్చారని రాయుడు సెల్ఫీ వీడియోలో ఆరోపించారు. వినుత కోట దంపతులను చంపేందుకు రెండుసార్లు ప్రయత్నించినట్లు ఆరోపించారు. కొట్టే సాయి ప్రసాద్ తనను ఎమ్మెల్యే సుధీర్ రెడ్డికి పరిచయం చేశాడని... తన నుంచి వినుత కోట దంపతుల సమాచారం సేకరించేవారని ఆరోపించారు.

అప్పట్లో ఏం జరిగిందంటే?

వినుత కోట దంపతుల వద్ద శ్రీనివాసులు అలియాస్ రాయుడు డ్రైవర్‌గా పనిచేసేవాడు. అయితే జులై 7న రాయుడు హత్యకు గురయ్యాడు. అయితే డ్రైవర్ రాయుడు హత్య కేసులో వినుత కోట, ఆమె భర్త చంద్రబాబుతో పాటు మరో ముగ్గురిని చెన్నై పోలీసులు అరెస్టు చేశారు. అయితే చెన్నై కోర్టు వినుత కోటకు బెయిల్ మంజూరు చేసింది.