ఇజ్రాయెల్‌కు వ్యతిరేకంగా తెహ్రీక్-ఎ-లబ్బైక్ పాకిస్థాన్ అనే ఇస్లామిక్ పార్టీ చేపట్టిన భారీ ర్యాలీ హింసాత్మకంగా మారింది

పాకిస్థాన్‌లోని లాహోర్ నగరం రణరంగాన్ని తలపించింది. ఇజ్రాయెల్‌కు వ్యతిరేకంగా తెహ్రీక్-ఎ-లబ్బైక్ పాకిస్థాన్  అనే ఇస్లామిక్ పార్టీ చేపట్టిన భారీ ర్యాలీ హింసాత్మకంగా మారింది. పోలీసులకు, నిరసనకారులకు మధ్య జరిగిన తీవ్ర ఘర్షణల్లో ఒక పోలీస్ అధికారి మరణించగా, అనేక మంది ప్రదర్శనకారులు కూడా ప్రాణాలు కోల్పోయారు. ఈ ఘటనలతో లాహోర్‌లో జనజీవనం పూర్తిగా స్తంభించిపోయింది.పాలస్తీనాకు మద్దతుగా ఇస్లామాబాద్‌లోని అమెరికా రాయబార కార్యాలయం వద్ద నిరసన తెలిపేందుకు టీఎల్‌పీ మద్దతుదారులు శుక్రవారం లాంగ్ మార్చ్ ప్రారంభించారు. ఇందులో భాగంగా ఈరోజు లాహోర్‌లో పోలీసులు రోడ్లపై అడ్డుగా పెట్టిన కంటైనర్లను ఆందోళనకారులు తొలగించేందుకు ప్రయత్నించడంతో ఉద్రిక్తతలు మొదలయ్యాయి. ఈ క్రమంలో నిరసనకారులు పోలీసులపై కాల్పులు జరిపారని, ఈ ఘటనలో ఒక అధికారి మరణించగా, మరికొందరు గాయపడ్డారని పంజాబ్ పోలీస్ చీఫ్ ఉస్మాన్ అన్వర్ తెలిపారు. అయితే, పోలీసుల కాల్పుల్లోనే తమ మద్దతుదారులు ఎంతోమంది చనిపోయారని, గాయపడ్డారని టీఎల్‌పీ వర్గాలు ఆరోపించాయి.ఈ ఘర్షణల్లో టీఎల్‌పీ పార్టీ అధినేత సాద్ రిజ్వీకి కూడా తీవ్రమైన బుల్లెట్ గాయాలయ్యాయని, ప్రస్తుతం ఆయన పరిస్థితి విషమంగా ఉందని పార్టీ ఒక ప్రకటనలో వెల్లడించింది. గాయపడటానికి కొద్దిసేపటి ముందు విడుదలైన ఒక వీడియోలో, సాద్ రిజ్వీ కాల్పులు ఆపాలని భద్రతా బలగాలను కోరుతూ, చర్చలకు తాను సిద్ధంగా ఉన్నానని చెప్పడం కనిపించింది. ఆ సమయంలో కూడా కాల్పుల శబ్దాలు వినిపించాయి.ఈ హింసాత్మక ఘటనల్లో నిరసనకారులకు చెందిన పలు వాహనాలు దగ్ధమయ్యాయి. ఇప్పటికే శనివారం జరిగిన ఘర్షణలకు సంబంధించి పోలీసులు 100 మందికి పైగా ఆందోళనకారులను అరెస్టు చేశారు. గాజా యుద్ధం ముగిసి శాంతి నెలకొంటున్న సమయంలో టీఎల్‌పీ హింసకు దిగడాన్ని అర్థం చేసుకోలేకపోతున్నామని పాకిస్థాన్ ఉప అంతర్గత వ్యవహారాల మంత్రి తలాల్ చౌదరి వ్యాఖ్యానించారు