వారసత్వ ఆస్తికి ఆ ఒక్క ముక్కే అడ్డంకి,,ఎన్ఆర్ఐల పాలిట 'విలన్' డాక్యుమెంట్

అమెరికాలో లక్షలు, కోట్లు సంపాదించినా.. భారత్‌లో ఆస్తులు, బ్యాంకు ఖాతాలు, పెట్టుబడులు అంటే మనసులో సంతోషం. కానీ ఆ సంతోషం ఎంత త్వరగా వస్తుందో, అంతకంటే పది రెట్లు వేగంగా ఆవిరైపోతోంది. కారణం.. కేవలం ఒకే ఒక్క డాక్యుమెంట్: సక్సెషన్ సర్టిఫికేట్.. పెట్టుబడి నిపుణుడు సార్థక్ అహుజా తన లింక్డ్‌ఇన్ పోస్ట్‌లో చెప్పినట్టు ఈ ఒక్క పత్రం లేకపోతే, విదేశాల్లో ఉండే భారతీయులు తమ వారసత్వ ఆస్తులపై పట్టు సాధించడానికి ఏళ్లు తరబడి కోర్టుల చుట్టూ తిరగక తప్పడం లేదు. తల్లిదండ్రులు చనిపోయిన తర్వాత, ఆస్తులను తమ పేరు మీదకు మార్చుకోవడానికి వెళ్లినప్పుడే వారికి అసలు షాక్ తగులుతోంది. రిజిస్టర్డ్ వీలునామా లేకుంటే... ఆస్తులు, బ్యాంకు ఖాతాలు, డీమ్యాట్ హోల్డింగ్‌లు అన్నీ ఫ్రీజ్ అవుతాయి.

అహుజా మాటల్లో చెప్పాలంటే ‘‘వీలునామా లేకపోతే సక్సెషన్ సర్టిఫికేట్ పొందడం ఈ భూమ్మీద అత్యంత కష్టమైన పనుల్లో ఒకటి!’ ఆస్తిని క్లెయిమ్ చేసుకోవాలంటే ముందుగా జిల్లా కోర్టులో దరఖాస్తు చేసుకోవాలి. ఆ తర్వాత, 45 రోజుల పాటు అభ్యంతరాలు ఏమైనా ఉన్నాయేమోనని పబ్లిక్ నోటీస్ ఇవ్వాలి. ఈ బ్యూరోక్రాటిక్ ప్రాసెస్ మొత్తం వారసత్వాన్ని అటకెక్కించేస్తుంది. ఈ ప్రక్రియ సామాన్యులకే కష్టం అనుకుంటే, ఎన్‌ఆర్‌లకు ఇది పెద్ద టాస్కే. కోర్టు కేసుల కోసం వారు ఇండియాకు పదేపదే రావడానికి కుదరదు.

విదేశీ పత్రాలను అపోస్టిల్ చేయించాలి, ఇక్కడ పనుల కోసం పవర్ ఆఫ్ అటార్నీ ఇవ్వాలి, ఇంకా బోలెడన్ని పత్రాలు సమర్పించాలి. వీటన్నిటికీ తోడు, ఖర్చు కూడా తడిసి మోపెడవుతుంది. అహుజా అంచనా ప్రకారం... దీనికి అయ్యే మొత్తం ఖర్చు రూ.10 లక్షల నుంచి రూ.20 లక్షల వరకు ఉంటుంది! ముఖ్యంగా ఢిల్లీలో అయితే కోర్టు ఫీజు ఆస్తి విలువలో 4% ఉంటుంది. లాయర్లు అదనంగా 2–5% వసూలు చేస్తారు. ఈ మొత్తం తతంగం 6 నెలల నుంచి 18 నెలల వరకు సాగడం ఖాయం.

మరి ఇంతటి న్యాయపరమైన అడ్డంకి తప్పించుకోవడం ఎలా? పరిష్కారం చాలా సులభమని, నామినేషన్ అప్‌డేట్, రిజిస్టర్ వీలునామా ఈ రెండు ఉంటే సరిపోతుందని నిపుణులు చెబుతున్నారు. రిజిస్టర్డ్ వీలునామా: అన్నింటికంటే ముఖ్యంగా, మీ తల్లిదండ్రులు రిజిస్టర్డ్ వీలునామా రాయడం అత్యవసరం. అందులో ఎవరు వారసులు, ఏ ఆస్తి ఎవరికి చెందుతుందో స్పష్టంగా తెలియజేయాలి.

అమెరికాలో సంపాదించడం గొప్పే. కానీ స్వదేశంలో మీ కుటుంబ ఆస్తులు సురక్షితంగా, సులభంగా మీ చేతికి రావాలంటే... ఈ రెండు పనులను జాప్యం చేయకుండా పూర్తి చేయాలి. లేదంటే, కష్టపడి సంపాదించిన కోట్లు కేవలం ఒక డాక్యుమెంట్ లేకపోవడం వల్ల న్యాయపరమైన చిక్కుల్లో పడి, ఏళ్లు గడిచినా మీ చేతికి అందకపోయే ప్రమాదం ఉంది.