భారత్‌లో అంటువ్యాధులను మించిపోయిన అసంక్రమిత వ్యాధులు

భారతదేశ ఆరోగ్య రంగంలో ఒక నిశ్శబ్ద విప్లవం సంభవించింది. దశాబ్దాలుగా దేశ ప్రజారోగ్యాన్ని గడగడలాడించిన క్షయ, డయేరియా, న్యుమోనియా వంటి అంటువ్యాధుల శకం ముగిసి, కొత్త శత్రువులు తెరపైకి వచ్చారు. అభివృద్ధి చెందుతున్న దేశానికి ప్రతీకలుగా నిలిచిన ఈ అంటువ్యాధుల స్థానంలో ఇప్పుడు జీవనశైలికి సంబంధించిన దీర్ఘకాలిక, అసంక్రమిత వ్యాధులు ప్రధాన కిల్లర్లుగా అవతరించాయి. గుండె జబ్బులు, ఊపిరితిత్తుల సమస్యలు, పక్షవాతం వంటివి నేడు భారతీయుల పాలిట యమపాశాలుగా మారాయి. ప్రపంచ ప్రఖ్యాత వైద్య పత్రిక 'ది లాన్సెట్' ప్రచురించిన 'గ్లోబల్ బర్డెన్ ఆఫ్ డిసీజ్  తాజా విశ్లేషణ ఈ చేదు నిజాన్ని ప్రపంచం ముందుంచింది. ఈ నివేదిక కేవలం గణాంకాల సమాహారం కాదు, భారతదేశం తన ఆరోగ్య విధానాలను, వైద్య పెట్టుబడులను, ప్రజల జీవనశైలిని పునః సమీక్షించుకోవాల్సిన ఆవశ్యకతను నొక్కి చెబుతున్న ఒక హెచ్చరిక గంట. ఈ మార్పు మన ఆరోగ్య వ్యవస్థపై, సమాజంపై, ప్రతి ఒక్కరి జీవితంపై తీవ్రమైన ప్రభావాన్ని చూపనుంది.దాదాపు 16,500 మందికి పైగా పరిశోధకుల అంతర్జాతీయ బృందం రూపొందించిన ఈ GBD నివేదిక, భారతదేశ ఆరోగ్య ముఖచిత్రంలో వచ్చిన పెను మార్పులను అంకెలతో సహా వివరిస్తోంది.నివేదికలో కొన్ని సానుకూల అంశాలు కూడా ఉన్నాయి. 1990తో పోలిస్తే 2023 నాటికి భారతదేశంలో మొత్తం మరణాల రేటు  గణనీయంగా తగ్గింది. 1990లో ప్రతి లక్ష జనాభాకు 1,513గా ఉన్న మరణాల రేటు, 2023 నాటికి 871కి తగ్గింది. ఇది వైద్య రంగంలో సాధించిన ప్రగతికి, మెరుగైన జీవన ప్రమాణాలకు నిదర్శనం. ఇదే కాలంలో భారతీయుల సగటు ఆయుర్దాయం  కూడా సుమారు 13 సంవత్సరాలు పెరిగింది. 1990లో సగటున 58.5 ఏళ్లుగా ఉన్న ఆయుష్షు, 2023 నాటికి 71.6 ఏళ్లకు చేరింది.అయితే, ఈ విజయం ఒక కొత్త సవాలును తెరపైకి తెచ్చింది. ఆయుర్దాయం పెరగడం అంటే, ప్రజలు ఎక్కువ కాలం జీవిస్తున్నారు. దీనివల్ల వయసుతో పాటు వచ్చే దీర్ఘకాలిక వ్యాధుల బారిన పడే అవకాశం కూడా పెరుగుతోంది. ఇక్కడే అసలు సమస్య మొదలవుతోంది. ప్రపంచంలోని అనేక దేశాలు 2010 నుంచి 2019 మధ్య కాలంలో దీర్ఘకాలిక వ్యాధుల మరణాల రేటును తగ్గించుకోగలిగితే, భారతదేశం మాత్రం దీనికి విరుద్ధమైన ధోరణిని ప్రదర్శించింది. ఈ కాలంలో మన దేశంలో NCDల కారణంగా సంభవించే మరణాలు పెరిగాయి. ముఖ్యంగా 80 ఏళ్లలోపు వయసులో దీర్ఘకాలిక వ్యాధులతో మరణించే ప్రమాదం పురుషులు, మహిళలు ఇద్దరిలోనూ పెరిగింది. మరింత ఆందోళనకరమైన విషయం ఏమిటంటే, పురుషులతో పోలిస్తే మహిళల్లో ఈ మరణాల ప్రమాదం మరింత వేగంగా పెరగడం.