భారత సంతతికి చెందిన యూఎస్ టాప్ అఫీషియల్ అరెస్ట్

భారత సంతతికి చెందిన సుప్రసిద్ధ విదేశాంగ నిపుణుడు, రక్షణ వ్యూహకర్త ఆష్లే జె.టెల్లీస్‌ను అమెరికా అధికారులు అరెస్టు చేశారు. అమెరికా దేశ రక్షణకు సంబంధించిన సమాచారాన్ని చట్టవిరుద్ధంగా కలిగి ఉన్నారని, అలాగే చైనా అధికారులతో రహస్య సమావేశాలు జరిపినట్లు ఆరోపణలు ఉన్నాయి. ఈక్రమంలోనే యూఎస్ అధికారులు ఆయన్ను అరెస్టు చేసినట్లు వర్జీనియా తూర్పు జిల్లా యూఎస్ అటార్నీ కార్యాలయం ప్రకటించింది.

కార్నెగీ ఎండోమెంట్ ఫర్ ఇంటర్నేషనల్ పీస్‌లో సీనియర్ ఫెలోగా, టాటా చైర్‌ ఫర్ స్ట్రాటజిక్ అఫైర్స్‌గా పని చేస్తున్న 64 ఏళ్ల టెల్లీస్‌‌పై ఉన్న అభియోగాలను యూఎస్ న్యాయవాది లిండ్సే హాలిగన్ ఒక పత్రికా ప్రకటనలో వెల్లడించారు. 2001 నుంచి ఆయన డిఫార్ట్‌మెంట్ ఆఫ్ వార్‌లో కాంట్రాక్టర్‌గా పని చేస్తుండగా.. ఆయన దేశ రక్షణకు సంబంధించిన సమాచారాన్ని చట్టవిరుద్ధంగా కల్గి ఉన్నట్లు ఆరోపణలు వచ్చాయి. ఈక్రమంలోనే ఆయన ఇళ్లల్లో అధికారులు సోదాలు నిర్వహించారు. అక్కడే వారికి సీక్రెట్, టాప్ సీక్రెట్ అని రాసి ఉన్న వెయ్యికి పైగా పత్రాలను కనిపించగా.. వాటిని స్వాధీనం చేసుకున్నారు.

ఇది మాత్రమే కాకుండా ఇటీవలే ప్రభుత్వ శాఖలో పని చేస్తున్న తన సహ ఉద్యోగినిని రహస్య పత్రాలకు సంబంధించి ప్రింట్‌లు తనకు ఇవ్వమని ఆష్లే అడిగినట్లు ఫెడరల్ అధికారులు ఆరోపించారు. ఈక్రమంలోనే యూఎస్ ఎయిర్ ఫోర్సులోని సైనిక సామర్థ్యాలకు సంబంధించిన పత్రాలను ప్రింట్ చేసినట్లు తెలిపారు. మరోవైపు గత కొన్ని ఏళ్లుగా ఆష్లే చైనా అధికారులతో రహస్య సమావేశాలు జరిపాడని కూడా వివరించారు. 2022, 2023 ఏప్రిల్ 11వ తేదీన బీజింగ్ అధికారులతో జరిగిన విందులోనూ ఆయన పాల్గొన్నట్లు గుర్తించారు.

కొద్ది రోజుల క్రితం కూడా ఇలాంటి భేటీనే జరగ్గా.. చైనా అధికారుల నుంచి ఆష్లేకు గిఫ్టుగా బ్యాగు లభించిందని తెలిపారు. ఈ కేసుకు సంబంధించి దర్యాప్తు కొనసాగుతోందని.. ఈ చర్య అమెరికన్ పౌరుల భద్రత, రక్షణకు తీవ్ర ముప్పు కలిగించిందని యూఎస్ అటార్నీ లిండ్సే హాలిగన్ పత్రికా ప్రకటనలో తెలిపారు. ఈ కేసులో ఆష్లే టెల్లీస్ నేరానికి పాల్పడినట్లు రుజువు అయితే.. టెల్లీస్‌కు గరిష్టంగా 10 సంవత్సరాల జైలు శిక్ష, 2,50,000 డాలర్ల జరిమానా, సంబంధిత సామగ్రిని కోల్పోయే అవకాశం ఉంది. అయితే ప్రస్తుతం నమోదైన ఫిర్యాదు కేవలం ఆరోపణ మాత్రమే అని.. నేరం నిరూపితమయ్యే వరకు టెల్లీస్‌ను నిరపరాధిగానే పరిగణిస్తామని అమెరికా ప్రభుత్వం స్పష్టం చేసింది. చూడాలి మరి ఏం జరగనుంది అనేది.