ఆంధ్ర పెట్టుబడుల 'స్పైసీ' ఘాటు.. పొరుగు రాష్ట్రాలకు సెగ: మంత్రి లోకేశ్ ఆసక్తికర ట్వీట్

ఆంధ్రప్రదేశ్‌లో పెట్టుబడుల పరంపర కొత్త పుంతలు తొక్కుతోంది. ముఖ్యంగా విశాఖపట్నం అంతర్జాతీయ టెక్నాలజీ హబ్‌గా రూపుదిద్దుకుంటున్న నేపథ్యంలో, ఐటీ శాఖ మంత్రి నారా లోకేశ్ చేసిన ఆసక్తికర ట్వీట్ ఇప్పుడు చర్చనీయాంశమైంది. విశాఖలో గిగా వాట్ సామర్థ్యంతో డేటా సెంటర్ ఏర్పాటుకు టెక్ దిగ్గజం గూగుల్‌తో రాష్ట్ర ప్రభుత్వం రెండు రోజుల క్రితం చారిత్రాత్మక ఒప్పందం కుదుర్చుకున్న విషయం తెలిసిందే. అమెరికా వెలుపల గూగుల్ పెట్టబోయే అతిపెద్ద డేటా సెంటర్ ఇదే కావడం రాష్ట్రానికి దక్కిన అసాధారణ విజయాన్ని సూచిస్తోంది.
ఈ బృహత్తర పెట్టుబడుల నేపథ్యంలో, రాష్ట్రానికి వస్తున్న పరిశ్రమల గురించి మంత్రి లోకేశ్ ట్విట్టర్ (ఎక్స్) వేదికగా ఘాటుగా స్పందించారు. "ఆంధ్రా వంటకాలు స్పైసీ అంటారు. మా పెట్టుబడులు కూడా అలాగే అనిపిస్తున్నాయి. కొంతమంది పొరుగువారు ఇప్పటికే ఆ మంట అనుభవిస్తున్నారు" అని ఆయన ట్వీట్ చేశారు. అభివృద్ధి, పెట్టుబడుల ఆకర్షణ విషయంలో ఆంధ్రప్రదేశ్ సాధిస్తున్న వేగాన్ని అంగీకరించలేని కొన్ని పొరుగు రాష్ట్రాలను ఉద్దేశించి లోకేశ్ ఈ సెటైరికల్ వ్యాఖ్యలు చేసినట్లుగా స్పష్టమవుతోంది. ముఖ్యంగా, రాష్ట్రానికి పెట్టుబడులు రావడంపై ఒక పొరుగు రాష్ట్ర మంత్రి విమర్శలు చేసిన సందర్భంలో లోకేశ్ ఈ విధంగా బదులిచ్చారు.
కేవలం గూగుల్ డేటా సెంటర్‌తోనే ఆగిపోకుండా, విశాఖను 6,000 మెగావాట్ల సామర్థ్యం కలిగిన డేటా సెంటర్ల హబ్‌గా మార్చేందుకు ప్రభుత్వం కృషి చేస్తోందని మంత్రి లోకేశ్ వెల్లడించారు. ఈ భారీ పెట్టుబడుల వల్ల లక్ష మందికి పైగా యువతకు ప్రత్యక్షంగా, పరోక్షంగా ఉపాధి అవకాశాలు లభిస్తాయని ఆయన ధీమా వ్యక్తం చేశారు. గూగుల్ రాకతో కేబుల్ ల్యాండింగ్ స్టేషన్లు, పునరుత్పాదక ఇంధనం, ఆర్టిఫిషియల్ ఇంటెలిజెన్స్ (AI) వంటి అనుబంధ పరిశ్రమలు కూడా రాష్ట్రానికి తరలివస్తాయని, ఇది రాష్ట్ర ఆర్థిక వ్యవస్థపై రూ.48 వేల కోట్ల మేర ప్రభావం చూపుతుందని ప్రభుత్వం అంచనా వేస్తోంది.
రాష్ట్రంలో వేగవంతమైన వ్యాపార నిర్వహణ (స్పీడ్ ఆఫ్ డూయింగ్ బిజినెస్) విధానాలు, కేంద్ర-రాష్ట్ర ప్రభుత్వాల సమన్వయమే ఇంతటి భారీ పెట్టుబడులకు కారణమని లోకేశ్ అభివర్ణించారు. కొందరు అడ్డుకోవాలని చూసినప్పటికీ, 'డబుల్ ఇంజిన్ బులెట్ ట్రైన్' తరహా వేగంతో ఆంధ్రప్రదేశ్ అభివృద్ధి పథంలో దూసుకుపోతోందని ఆయన పేర్కొన్నారు. గూగుల్ వంటి అంతర్జాతీయ కంపెనీల విశ్వాసాన్ని చూరగొనడం ద్వారా రాష్ట్రం ఇప్పుడు దేశంలోనే పెట్టుబడులకు అత్యంత అనుకూలమైన గమ్యస్థానంగా నిలుస్తోంది.