ఆర్సీబీకి రూ. 16,500 కోట్ల భారీ డీల్? యాడ్ రూల్స్ ఎఫెక్ట్.. విక్రయానికి సిద్ధమైన డయాజియో, బిడ్ రేసులో అదానీ, పూనావాలా

రాయల్ ఛాలెంజర్స్ బెంగళూరు (RCB) ఇండియన్ ప్రీమియర్ లీగ్ (IPL) ఫ్రాంచైజీ యాజమాన్యం త్వరలోనే మారే అవకాశం ఉంది. RCB పేరెంట్ కంపెనీ అయిన డయాజియో, ఈ జట్టును దాదాపు 2 బిలియన్ డాలర్లు (భారత కరెన్సీలో సుమారు రూ. 16,500 కోట్లకు పైగా) అమ్మెందుకు ప్రయత్నాలు చేస్తోందని ప్రముఖ క్రీడా వెబ్‌సైట్ క్రిక్‌బజ్ నివేదించింది. కేంద్ర ప్రభుత్వం లిక్కర్ బ్రాండ్ల ప్రకటనలపై, ముఖ్యంగా సర్రోగేట్ యాడ్స్‌పై, కఠినమైన నియమాలను తీసుకురావడంతో, ఫ్రాంచైజీని నిర్వహించడం లాభదాయకం కాదని డయాజియో భావిస్తున్నట్లు సమాచారం. ఇది భారత క్రీడా ఫైనాన్స్‌లో ఒక కీలక పరిణామంగా చూడొచ్చు.
RCBని కొనుగోలు చేసేందుకు పలువురు పెద్ద వ్యాపార దిగ్గజాలు, పెట్టుబడి సంస్థలు ఆసక్తి చూపుతున్నట్లు తెలుస్తోంది. సీరమ్ ఇన్‌స్టిట్యూట్ ఆఫ్ ఇండియా సీఈఓ అధార్ పూనావాలా, JSW గ్రూప్ నుండి పార్థ్ జిందాల్, అదానీ గ్రూప్‌తో పాటు ఢిల్లీకి చెందిన ఒక ప్రముఖ కంపెనీ కూడా బిడ్ వేసేందుకు సిద్ధమవుతున్నాయట. వీరే కాక, అమెరికాకు చెందిన మరో రెండు ప్రైవేట్ సంస్థలు కూడా ఈ రేసులో ఉన్నట్లు క్రిక్‌బజ్ నివేదిక వెల్లడించింది. భారత క్రికెట్‌పై ఉన్న అపారమైన బ్రాండ్ విలువ, విరాట్ కోహ్లీ వంటి స్టార్ ప్లేయర్ల ప్రభావం కారణంగా RCB ఒక ఆకర్షణీయమైన పెట్టుబడి సాధనంగా మారింది.
భారత ప్రభుత్వం తీసుకొచ్చిన కొత్త, కఠినమైన యాడ్ నియమాలే డయాజియో తన IPL ఆస్తుల నుండి వైదొలగడానికి ప్రధాన కారణంగా కనిపిస్తున్నాయి. లిక్కర్ కంపెనీలు తమ ప్రధాన ఉత్పత్తుల ప్రకటనలకు బదులుగా, ఆ పేరుతో ఉన్న సోడా లేదా వాటర్ వంటి ఇతర ఉత్పత్తులను ప్రచారం చేసే "సర్రోగేట్ అడ్వర్టైజింగ్" పద్ధతిని నియంత్రించేందుకు ప్రభుత్వం తీసుకున్న చర్యలు ఈ నిర్ణయాన్ని ప్రభావితం చేశాయి. ముఖ్యంగా, ఆరోగ్య మంత్రిత్వ శాఖ IPLలో పొగాకు, ఆల్కహాల్ ప్రకటనలపై నిషేధం విధించాలని BCCIని కోరిన నేపథ్యంలో ఈ ఫ్రాంచైజీ విక్రయం మరింత ప్రాధాన్యతను సంతరించుకుంది.
ఈ భారీ విలువతో జరిగే డీల్ గనుక కార్యరూపం దాల్చితే, IPL చరిత్రలోనే ఇది అత్యంత ఖరీదైన ఫ్రాంచైజీ విక్రయాల్లో ఒకటిగా నిలిచే అవకాశం ఉంది. డయాజియోకు ఇది వ్యూహాత్మక నిర్ణయం కాగా, కొనుగోలుకు ఆసక్తి చూపుతున్న సంస్థలకు IPL వేదిక ద్వారా భారత క్రీడా రంగంలో, ప్రపంచ స్థాయిలో తమ ఉనికిని మరింత బలోపేతం చేసుకోవడానికి ఇది అద్భుతమైన అవకాశం. అయితే, తుది కొనుగోలుదారు ఎవరు, ఈ $2 బిలియన్ల విలువైన డీల్ ఎప్పుడు పూర్తవుతుందనే దానిపై క్రీడా మరియు వ్యాపార వర్గాల్లో ఉత్కంఠ నెలకొంది.